Read Angguruk Yali KISAH RASUL-RASUL 28 Bible Online

KISAH RASUL-RASUL 28 - Angguruk Yali bible

KISAH RASUL-RASUL 28

¹Iken nunusibag fugmu ik ilanma luwareg weregman aben Malta kinangma wahep ulug hiyag nisibagma nonoluk atfag.

²Malta inap welatfahon arimanowen nit fahet inindi nenesug lit let neneptuk latfag. Osit naruk lit sunen hambuk uruk uwagma ap arimanowen indok humon munggalfareg yet ta maniyek ulug nit obog toho wol nenepfag.

³Wol nenepfagma Paulusen esele wiroho wibareg indok yalfagma indok oloken pisanggo eke wilip atfareg Paulus inggikmu saluk teg lit welatfag.

⁴Inggikmu saluk teg lit weregma Malta inaben yet hibareg, ”Ap tu iken warehek fug angge famen pisanggowen warehekma oluk am fug tehen ap eke indam watisi lit teg. Ketiya ahime wahareg wat taruk,” ulug it-it enele sahaltuk latfag.

⁵Sahaltuk latfagma Paulusen pisanggo ino inggikmuwen teloho indokma hik isibareg welatfag.

⁶Ap arimanowen fitmisireg waroho kinangma ying atmisi ulug amusun toho kim haruk lit weregman at fano unduhuk latfag. Fano unduhuk latfagma ap arimanowen ap tu kinangmon fug, poholmon wambik wahareg wereg peruk latfag.

⁷Malta kinang welatuk uwag ambeg horogma kinang ino seneg ahun ap suwon eke ibam wirig latfag. Ap suwon unuk Publius inowen nit ibam hondoko kilap nenepfagma at nim weregma hup hinahan atfag.

⁸Weregma Publius ino ikni ouk anggolo waruk lit ebe inahan turuk lit hasu ruruk lit olma yinggig latfag. Yinggig latfagma Paulus kibareg unggulmu inggik imbibareg sembahyang uruk lit hihitfag.

⁹Hihitfagma Malta kinangma welatfag inap ouk warukon Paulus ambeg waharukmu hihir eneptuk latfag.

¹⁰Hihir eneptuk latfagma enehiyeg anggolo roho wereg lit hi neneptuk latfagma nit lul ulug turukmen mun angge man angge og nisibareg hi nenepfag.

¹¹Pikalem hinahan o Malta welatuk uwareg kou o Aleksandrian watfahon misig fam kuruk uwag. Kou ino mo heriyegma siyelu waharuk li werehen Malta kinang fam inditmu ino watfareg welatfag. Enehangge kou ino fam piren umalik ununuk Dioskuri lombog teg latfag.

¹²Kou ino fam luwareg Sirakusa luwareg hup hinahan welatuk uwag.

¹³O inowen tulug ik ayeg keyen hop-hop laruk lit Regium luwag. O ino noholug likiyamon larukmen homhomo kou olombik filen miyal nenebil laruk latfareg nininggik pireneg angge o Putioli luwag.

¹⁴O ino larukmen Allah wene holtuk inap enembeg luwagma iren nit men ambiyeg welamul ulug alele og nenepfagma hup sabirenam welatuk uwareg o Roma luwag.

¹⁵Kema larukmen o Roma wene holtuk inap welatfahon arimanowen nit waharuk urukmu hol hibareg kema hondog nenebik lul ulug o Forum Apius men o Tres Taberne men nonolohotma waharuk latfag. It waharukmu Paulusen yer isibareg Allah fam Nikni ulug sembahyang ibareg indi se roho welatfag.

¹⁶Luwagma Paulus penjara kilabuk fug angge o eke fam hamu welatmihin ulug hiyag itfagma sehen seneg ahun misig at foroho lit welatfag.

¹⁷Inggik hinahanam welatfareg Yahudi inap onowesi unubam nele imin ulug Paulusen wol enepfagma watfareg weregma ele hiyag isaruk lit, ”Nori, anden Yahudi inap fam siyag ane turuk lit nikni umban ibag ane oho apmayap tirikik fug angge famen o Yerusalemen hele wat naptusareg o Roma inap ininggikmu numbaharusa.

¹⁸An fahet alem yami rurusareg alem nubam embelug nuwabuk hahon eleg latisimu inggik hele loloho wili fusul urusa.

¹⁹Ari urusa angge famen Yahudi inaben inggik hele loloho wilibuk fug urusama anden Kaisar ambeg lahukteg nele uhuk irikik. Irikik ane ari Yahudi inap siyahap enepmin ulug irikik fug.

²⁰Ari fahet hit yet hisaminteg hunubam nele imin ulug wol henebihi. Israel inaben nangno rurukon ino fahet an ninggik hele wareg lahiyon tu niyaruk lahep,” ulug hiyag isibag.

²¹Hiyag isibagma iren at ubam enele uruk lit, ”Nit nonori Yudea werehonen suwesingga hat fahet emberuson nit nenembeg waharisi fug. Nonori winon oho nit nenembeg waharusa fureg haren siyag ane tirikinon fahet oho alem hiyag nisarusa fug.

²²Haren peruk lahenon ari niren holuhuken misihim hiyag nisahun. Wene tu fahet ap kema-kema werehonen ninirim urukon holtukuk,” ibag.

²³Ari ibareg misihim nenele uhuken palu amuhuk ulug Paulus fam sali ibag. Sali ibag sambil ino hikir atfagma ap anggolo Paulus wereg ambeg palu arik watfag. Palu arik watfagma Allah ap obog toho Inikni aruhuwon fahet seleg toho hiyag isaruk latfag. Musa men atam wene hiyag isaruk latfag inaben haharoho imbibag ane ari Yesus fahet haharoho imbibag ulug seleg toho hiyag isaruk latfag. Mo lahik waharukmu ak tibareg wene hiyag isarukmen hupmu atfag.

²⁴Wene hiyag isarukmu holfag inap arimano winonen tem toho hiyag nesehek perukmen winonen te si ane hiyag nesehek peruk latfareg ap arimano wilip atuk lit

²⁵enele eke hag eke hag sahaltil laruk latfag. Enele sahaltil wilip atikim Paulusen, ”Anden nele misig iminon tu fuki roho holeg lamok. Allah hime fanowon inowen Yesaya hiyag utukmu tem toho niniknisi unumba fahet haharoho imbibag.

²⁶’Hinisanggo fam holuhup angge famen hinindimu honoluk aruhu fug, hinil fam hahup angge famen fuki roho hahup fug ulug hiyag isamihinen ap aruma enembeg lamihin.

²⁷It inil fam yet hahup tohon ulug inil hupni feserikik, inisanggo fam hol hahup tohon ulug inisanggo lare feserikik. Inindi fam wenggel hahup tohon ulug inindi sohuwa feserikik. An nambeg wamuhupteg hihit nenebin uhup tohon ulug Anden tebeserikik,’ ulug Yesayan ari tem toho haharoho imbibag.

²⁸Allahn ap fanowap enebuhu ane tu o pumbuk winon Allah unuk enepeleg inap hiyag isahupmu iren holuhupteg tem toho peruk lamuhuben ihi ane ari honoluk toho welamek,” ulug Paulusen hiyag isibag.

²⁹Hiyag isibagma Yahudi inap watfahon arimano laruk lit it-it umung-umung atuk lit enele sahaltil laruk latfag.

³⁰Libagma Paulus ino o onggo palfag ibam ino weregman mo piren atfagma ap ambeg watfahon obog toho hondoko ibam kilap eneptuk latfag.

³¹Kilap eneptuk latfagma ap arimano Paulus ambeg la fug ulug alele og eneptuk inap elegma wene hiyag isaruk lit, ”Ninikni Allah ap obog toho Inikni wereg,” ulug, ”Yesus Kristus Nonowe wereg,” ulug akol eleg toho wereg lit ambong se roho wene hiyag isaruk latfag.