Read Angguruk Yali KISAH RASUL-RASUL 3 Bible Online

KISAH RASUL-RASUL 3 - Angguruk Yali bible

KISAH RASUL-RASUL 3

¹Misihim sambil mo haya ririkim sembahyang wina sambil uruk hag toho Petrus men Yohanes men sembahyang ul ulug Allah ibam libag.

²Larukmen ap misig uyug siyag angge indag tibagma oriyen paya roho imbik watfag. Ap uyug siyahon ino Allah ibam kuruk inap unubam uang heng eneptuk laruhu ulug oriyen likiya hupmu paya roho sok unuk ”Fanowon” iraham imbik waharuk latfag.

³Ap uyug siyahon inowen Petrus men Yohanes men Allah ibam kul ulug waharukmu yer isibareg uang tot og nemek ulug heng enepfag.

⁴Petrus men Yohanes men it itanowen at kim hibareg Petrusen at ubam ele uruk lit, ”Nare, nit yet nisimin,” ibagma

⁵ap uyug siyahon inowen an og numusa angge tot wereg ulug it kilap enesug latfag.

⁶Kilap enesug latfagma Petrusen te, ”Mun angge man angge fano-fano angge hat og humon te wereg eleg, we werehon eneg hat og humul. In atug laruk lamin. Yesus Kristus Nazaret ahun ino unuk fam ari hiyag hutuk lahi,” ibag.

⁷Ari ibareg Petrusen at ino inggik pikit fil lisoho unduhuk fibag. Unduhuk fibagma ap ino uyug ine atfareg uyug umanggen wirik atfagma in atfareg la hag teg latfag.

⁸La hag teg latfagma it men ambiyeg Allah ibam kuruk lit ahiyehen si ril laruk lit Allah wel turuk latfag.

⁹At uyug fano atfareg laruk lit Allah wel til larukmu ap obog toho arimanowen at yet hibag.

¹⁰Yet hibareg at uyug siyag teg lit sok unuk ”Fanowon” iraham wereg lit ap fam uang heng eneptukmu harukukon ino tu ulug yet hibag. Yet hibareg nangginoho uyug fano aha ulug yihi ibareg enekol haruk latfag.

¹¹Ap uyug fano atfahon ino Yohanes men Petrus men ambiyeg larukmu yer isibareg ap anggolo arimanowen yihi nenekolen-e uruk lit o misig wirig latfahon unuk Salomo ino fam Petrus men kibag ambeg ino palu arik kuruk latfag.

¹²Kuruk latfagma Petrusen ap anggolo arimano yer isibareg ele uruk lit, ”Hit Israel hinaben ap aru fam tehe ane fahet henekolen yihi ulug nungge fahet uruk lahep? It ininggareg inindi inine fam ap aru fanowap tehesa peruk lit kilap nisaruk lahep?

¹³Nunumbasi Abraham Ishak Yakub Inikni Allah inowen amingmingangge Yesus lehoma emberisi. At ino hiren Pilatus og irik larikipmu aren lole fesemin irisi angge famen hiren un ane At ubam lombog tirikip.

¹⁴Allahn mumal tarisiyon fanowon tem toho uruk ahun ino fahet ninirim irikipteg siyag ane til noruk lit ap unusuruk latisi ahun ino lol nisimin irikip.

¹⁵Mondabi onoluk wereg ane alem senetuk ahun ino hiren ware feserikipmu Allahn ap war atukon wereg ambehen At ino olukap tirisi. Ari tirisi ane niren yet harukukteg hiyag hisaruk lahe.

¹⁶Ap hiren haruk lahebon aruwen Yesus unuk fahet wenggel hehekma At unuk ari famen ap aru uyug ineyap tehek. At ubam wenggel hehek ane ariyen ap aru hit henelukeman fano aha,” ibag.

¹⁷”Nori, honowesiyen turuk latusa ane men hiren turuk latikip ane men henepelehen ari roho turuk latikibon ari an noluk.

¹⁸Mesias Allahn monde fik waruhuk ibahon ino aben wabuhup ulug Allahn tam wene hiyag isaruk latfag inap arimano hiyag isibagma haharoho imbibahon hikir amag ulug Allah indimuwen perisi.

¹⁹Ari fahet siyag ane turuk lahebon Allahn ambolma embesemisiyen hinindi fano roho wenggel hemek.

²⁰Nikni Allahn ap kinangmon inindi sakowap enebuhuk ulug Yesus fahet tu Mesias aruhu ulug tam unduhuk fibahon ino hunubam monde fuhu.

²¹At ino poholma weregman eneg Allahn tam ap wene hiyag isaruk latfag inap hiyag isibagma haharoho imbibahon hikit toho mun angge man angge Allahn kerap tuhu.

²²Atam Musan hiyag isaruk lit, ’An hag toho wene hiyag hisaruk laruhu ahun eke Hinikni Allahn hit henere misig unduhuk fuhu. Unduhuk fuhumu At inowen mun ane man ane hiyag hisarukon hiren holtuk lamuhup.

²³Ap san wene hiyag isarukon ino holtuk laruhu fug halug at ino ori sehelimuwen longgo uhu.’

²⁴Ap atam wene hiyag isaruk latfahon hun Samuel famen ak tibareg ombolimonen oho ketiya teko laruk ane it tam onoluk atfareg fag toho hiyag isaruk latfag.

²⁵Atam wene hiyag isaruk latfag inap unumalikisi hit welahep. Allahn Abraham fam ele hiyag utuk lit hit hunumbusagsi unubam sali ibahon tu, ’Ap obog toho kinangma werehon hat humbusagsi hi enebuhubon Anden it fanowap enebuhuk,’ ulug sali ibag ane aru hit hunubam atisi.

²⁶Hiren siyag ane turuk lahebon umbusuhupmu Aren hi henebuhu ulug Allahn amingmingangge unduhuk ferisiyon ino atam hit fahet monde ferisi,” ulug Petrusen hiyag isibag.