Read Angguruk Yali KISAH RASUL-RASUL 4 Bible Online

KISAH RASUL-RASUL 4 - Angguruk Yali bible

KISAH RASUL-RASUL 4

¹Petrus men Yohanes menen ap anggolo wene hiyag isarukmen imam inap men Allah ibam foroho latfag inap onowe suwon men Saduki inap men it enembeg waharuk latfag.

²Waharuk latfagma Petrus ha Yohanes ha itanowen Yesus oluk atisi hag toho ap warehon onoluk amuhup ulug ap anggolo hiyag isarukmu hol hibareg ap watfahon arimanowen onolok anggolo haruk latfag.

³Onolok anggolo hibareg it piren itano ininggik hele waroho ap siyag ane turukon kilap eneptuk ambeg o penjara kilap enepfag. O hup atfagma sono alem kong tuhuk ulug kilap enepfag.

⁴Kilap enepfag angge famen ap anggolo arimanowen Yesus otsiyen hiyag isarukon fahet tem toho hiyag nisaruk ulug holtuk latfahon arimano ap eneg teng-teng angge teng fuwaben 5.000 arimano welatfag.

⁵Welatfagma noholug likiyamon Yahudi inap onowesi men iniknisi ap suwon men Musa wene onoluk inap men imam onowesi ap suwon Hanas men Kayafas men Yohanes men Aleksander men imam onowesi suwon unumalikisi winon men o Yerusalemen unggum kong tul ulug palu ribag.

⁷Palu ribareg Petrus men Yohanes men itano hondog eneplug watfagma ap anggolo palu ribag ambeg welatfag inap arimanowen it unubam kapal isaruk lit, ”Ap sa ine fam ap sa unuk fam hiren til noruk lahep?” ulug kapal eneptuk latfag.

⁸Petrus ubam Allah hime fanowon weregma umung enepfahon ino fahet in atfareg hiyag isaruk lit, ”Hiren ap ki enesug lahebon men niniknisi welahebon men nori!

⁹Yoho ap uyug siyahon eke let teheyon ari fano ane tehe angge famen hiyag nisawag ulug umung neneptuk lit ap sa ine fam ap ari fanowap tehep ulug nunubam umung nesehep,” ibag.

¹⁰”Hit Israel hinap men ap obog toho welahebon honoluk amag. Yesus Kristus Nazaret ahun ino unuk fam til noruk lahe. At ino hiren e fam teloho ware feserikip angge famen Allahn ap war atuk ambehen nin olukap tirisiyon inowen ap aru fanowap tehekma hit henelukema unduhuk lit wereg,” ibag.

¹¹”Yesus ino helep elehet waruk inaben helep tu siyag ulug hik isaruk hag toho hiren hik isarikip angge famen At hiren hik isarikibon ino helep ubule yag atisi.

¹²Ap kinangmon fanowap eneptuk ane At ino famen eneg fano atuk. Pohol atogman atogma ap eke unuk fam nit fanowap nenebuk hahon eke At unuk hag toho suwalehon te wereg eleg,” ibag.

¹³Ari ibagma ap enele sahaluk oho palu atfahon arimanowen Petrus men Yohanes men fahet inindi anggar atuk ane milaluk fug angge enepeleg toho welatusa angge famen enembong se roho hiyag nisaruk ulug yihi uruk latfag. Yesus men ambiyeg laruk latuson it tiya ulug onoluk teg latfag.

¹⁴Ap uyug fano atfahon ino it iniraham unduhuk latfagma yet hibareg niren unubam ul fug ulug enele eleg angge welatfag.

¹⁵Welatfareg hit selma lalihip ulug hiyag isibagma enele uruk ambeg ino embeselug wilip atfagma it enemu enele sahaltuk lit,

¹⁶”Ap ariya unubam niren nungge ane hiyag usul? Ap piren ariyan aben tuk fug teg ane turusama Yerusalem inap obog toho onoluk atisimu niren awiya wa fug teg lahe.

¹⁷Iren ak teberusa ane ap anggolowen holuhupmu su aruhu rohon ap ariya per eneptuk lit ap misig fam oho Yesus unuk uruk lit hiyag isa fug ulug nenele ine roho komo enebul,” ibag.

¹⁸Enele ibareg it piren itano fam kik maniyek ulug wol enepfareg, ”Ap unubam henele uruk lit Yesus unuk we tem toho hiyag isa fug,” ulug komo enepfag.

¹⁹Komo enepfagma Petrus men Yohanes menen te, ”Hininggarehen hinindi wenggel hemek: Hit henele apma welamul ano, Allah ele apma welamul ano? Allah olohotma tul pehep ane nunggeyon fano peruk lahep?

²⁰Ninisanggo fam holtukukteg ninilen oho yet harukuk ane ari ap hiyag isa fug anggeyen welahe ha fug teg,” ibag.

²¹Ari ibagma enele ine roho Yesus otsi itano komo enepfareg lalihip ulug wilip enepfag. Yesus otsiyen ap hihitfag ane ino yet hibareg ap anggolowen Allah wel turuk latfagma ir oho enekolen unggum kong tul pibag ane ino imbisibag.

²²Ap uyug siyahon fanowap tibahon ino indag tibag sali mo ilig am wirig am turukmu teng misig nubam hilag 40 atfagma welatfag.

²³Petrus men Yohanes men lalihip ulug wilip enepfagma onori enembeg libareg imam onowesi men iniknisi ap suwon menen nit nunubam ari-ari ehesareg komo nenebehesa ulug onori hiyag isaruk latfag.

²⁴Hiyag isaruk latfagma onoriyen hol hibareg it ambiyeg mangno roho Allah wel turuk lit, ”Ninikni, Haren pohol men kinang men ik men mun angge man angge obog toho Haren wal tirik inag.

²⁵Hat hime fanowon ino hamingmingangge ninikni Daud ubam weregma hawene ubam emberik inahon aren hiyag nisibahon tu, ’Ap kinangma werehonen nungge fahet ngik-ngog turuk? O pumbuk wal toho werehonen alem elegman nungge fahet saplangge yami ruruk?

²⁶Ninikni Allah men Aren mumal tarisiyon men tog abul ulug kinangma ap suwon welahe perukon arimano onowesi menen sehen inggila saloho wep turuk lit wereg.’

²⁷Ari hag toho hamingmingangge Yesus fanowon Haren mumal tarikinon ino min tog abul ulug Herodes men Pontius Pilatus men o pumbuk wal taneg wereg inap men Israel inap men o pumbuk aru fam palu rurusa.

²⁸Palu rurusa inap arimanowen tuhuk peruk ane Hat hinggik ineyon inowen atam tuhuk perik inahon hag toho turuk.

²⁹Ninikni, ap aruman ketiya nit nenebug uruk lit pet neneptukmu Haren yet nisimin. Niren Hat hawene nenele ine roho hiyag isaruk lamuhuken hamingmingangge welaheyon aruma ninineyap nenebin.

³⁰Hat hinggik fam let nenepmihinmu hamingmingangge Yesus unuk fanowon ino fam ap ouk warukon hihir eneptuk lit poholmonen turuk ane wal hahuken enehangge nunubam umbuhun.”

³¹Ari ulug sembahyang ibagma it palu roho wereg ambeg ino mek tibagma Allah hime fanowon unubam atfagma iren enekol eleg toho wene ap hiyag isaruk latfag.

³²Yesus fam inindi wenggel haruk latfag inap arimano inindi misig toho enebe mangno roho wereg lit ap misihen oho haren angge anden angge ulug alem haluk fug anggeyen we niren tohon eneg wereg peruk latfag.

³³Nonowe Yesus Allahn olukap tirisi ulug Yesus otsiyen enele ine roho uruk lit ap unubam fag toho hiyag isaruk latfag. It obog toho arimano Allahn likiya hupmu indi enesug lit fer enesug latfag.

³⁴It obog toho arimano misig oho inggikmu anggengge eleg hag toho welatfag fug. It yabuk men o men ngi rohon arimanowen ap winon fam ayeg waroho wibareg og isibag angge arimano Yesus otsi ininggikmu palu roho emberuk latfag.

³⁵Emberuk latfagma ap enengge ininggikmu elehon og esela perukon eneg fibir eneptuk latfag.

³⁶Ap misig unuk Yusuf Yesus otsiyen Barnabas suwalfag ahun (nit nenele roho ”onggon angge og isibag umalik”) unggul unuk Lewi ibam Siprus ahun welatfag.

³⁷At inowen kinang inggarehen tohon ap fam ayeg watfareg uang kinang onggo og itfahon arimano Yesus otsi ininggikmu imbik watfag.