Read Angguruk Yali KISAH RASUL-RASUL 6 Bible Online

KISAH RASUL-RASUL 6 - Angguruk Yali bible

KISAH RASUL-RASUL 6

¹Yesus umaliki wene holtuk inap anggolo atuk latfagma Yahudi inap famen Yunani enele roho uruk latfag inap arimanowen Ibrani enele urukon unubam enele siyag toho uruk latfag. Enele siyag toho uruk lit suburu wenema emberukon hiyap yuwohon Yunani hiyap og isaruk lahep fug ulug suwahal uruk latfag.

²Ari ulug suwahal uruk latfagma Yesus otsi nisanggowen arimanowen Yesus umaliki wene holtuk inap obog toho palu enepfareg enele uruk lit, ”Nori, niren wene hiyag esela angge famen we suburu eneg og isaruk laheyon ari siyag peruk lahe.

³Nori, ari fahet hiren ap sabiren Allah hime fanowon unubam wereg lit inindi fano wenggel harukon ap winonen it fahet fano perukon eneg hiyag eneplihipmu iren hiyap yuwohon suburu og isaruk lamuhupmu

⁴niren sembahyang uruk lit wene eneg hiyag hisaruk lamuhuk,” ibag.

⁵Ibag ane ari wene holtuk inap obog toho arimanowen tem toho ehep ibareg ap hiyag enepfahon ununuk te: Stefanus Allah hime fanowon ubam weregma we tem peruk latfahon ino men, Filipus men Prokhorus men Nikanor men Timon men Parmenas men Nikolaus Antiokhia ahun famen Yahudi ahun aruhuk ulug watfareg welatfag ahun ino men itano hiyag enepfag.

⁶Hiyag enepfareg Yesus otsi enembeg hondog enepfagma Yesus otsiyen ininggik ununggulmu emberuk lit sembahyang ibag.

⁷Allah wene o pumbuk atogman atogma hiyal atfagma Yesus umaliki o Yerusalem werehon anggolo atfagma imam inap anggolo arimano oho wene holtuk lit tem peruk latfag.

⁸Stefanus ino Allahn indi reg lit ineyap tibagma poholmonen turuk ane fano ane aren ap anggolo sehelimuwen turuk latfag.

⁹Stefanusen ari roho turukmu Yahudi inap famen Libertini uruk latfag inap arimano[2] inibam Kirene men Aleksandria inap arimano men waharuk latfag. Yahudi inap famen inibam Kilikia men Asia men welatfahon arimano oho it men ambiyeg mangno roho waharuk latfag. Watfareg Stefanus men enele pulung-palang urukmen

¹⁰Stefanus ubam Allah hime fanowon wereg lit indi anggarap turukmu ele ine roho hiyag isarukmu iren hebeloho at ubam uk fug teg latfag.

¹¹Hebeloho at ubam uk fug teg latfareg ap winon unubam ari-ari iyek ulug hiyag isaruk lit, ”Hun ariyen Musa men Allah men fahet un ane urukmu hiyarukuk iyek,” ulug amul eneptuk latfag.

¹²Amul enepfagma ap anggolo arimano enele sahal paluluk uruk lit Yahudi inap iniknisi men Musa wene onoluk inap arimano menen enehummu het-pet hibareg Stefanus senetil laruk lit ap suwon palu roho wereg ambeg hondoholug libag.

¹³Hondoholug libareg sibiling-sibiling ane uruk inap winon hondog enepfagma iren enele si-si ane uruk lit, ”Ap tuwen likiya hupmu Allah ibam men Musa wene men siyahap turuk.

¹⁴Yesus Nazaret ahun inowen Allah ibam aru halog tuhureg Musan hiyag nisibag ane oho elehap tuhu urukmu holtukuk,” uruk latfag.

¹⁵Ari urukmen ap suwon palu roho welatfahon arimano obog tohowen Stefanus yet harukmen at orohole umbagpag turuk lit malaikat orohole hag teg latfag.