Read Angguruk Yali KISAH RASUL-RASUL 8 Bible Online

KISAH RASUL-RASUL 8 - Angguruk Yali bible

KISAH RASUL-RASUL 8

¹Saulus inowen oho Stefanus ware feserukmu yet hibareg indimuwen fano ware fesehesa pibag. Welatfagma Yerusalem inap Yesus fam wenggel haruk latfahon anggolo unusuruk latfagma o Yerusalem ino embeselug o Yudea men Samaria men ap wereg ke hirag arik libag. Yesus otsi nisanggowen eneg o Yerusalem welatfag.

²Yerusalem welatfagma Allah fahet enekol toho fano wenggel haruk latfag inaben Stefanus wareg angge paya roho helep elma kilapfareg ninindi ulug fong watuk latfag.

³Saulus inowen undama olok anggolo haruk lit Yesus ubam wenggel haruk inap unusimin ulug yami enebil laruk lit o eke keheg o eke keheg abet hiyabet ininggik lisoho walug o penjara kilap eneptuk latfag.

⁴O Yerusalemen wilip atfareg hirag arik libag ambeg arimanowen wene ap hiyag isaruk latfag.

⁵Hiyag isaruk latfagma Filipus ino oho o Samaria pumbuk suwon eke wirihon ino fam libareg Mesias Allahn monde ferisi ulug ap hiyag isaruk latfag.

⁶Filipusen wene hiyag isarukmu holtuk lit ap ouk warukon hihir eneptukmu yet hibareg it obog toho welatfahon arimanowen tem toho hiyag nisaruk ulug inindi wenggel haruk latfag.

⁷Filipusen hihir eneptukmu ap unundama siyag angge werehon enele ngi hum uruk lit wilip atukmu unuyug siyahon men enelenggen siyahon men fano atuk latfag.

⁸Fano atuk latfagma ap o pumbuk ino fam welatfahon arimanowen enehiyeg anggolo haruk latfag.

⁹O pumbuk ino ap misig unuk Simon usane turuk latfag ahun welatfagma ap welatfahon arimanowen an fahet enekol haruk lit wel nabukag ulug usane turuk latfag.

¹⁰Usane turuk lit weregma Samaria inap suwonen oho toronen oho, ”At ine roho werehon aru Allahn ineyap turukmu turuk,” uruk lit at ele ap anggolowen holfag.

¹¹Aren indam angge usane turuk lit ap enekolap enepfagma at ele eneg holtuk latfag.

¹²At ele holtuk latfag angge famen Filipusen Allah misig eneg Hinikni wereg ulug Yesus Kristus hit Honowe wereg ulug hiyag isarukmu hol hibareg wene fano ulug abet hiyabet inindi wenggel haruk latfagma Filipusen ikma pilap eneptuk latfag.

¹³Simon ino oho wene fano ulug wenggel haruk latfagma Filipusen at ikma pilapfagma Filipus men likiya hupmu ambiyeg welatfag. Filipus men weregma poholmonen turuk ane anggolo Filipusen turukmu haruk lit Simonen yihi uruk lit akol haruk latfag.

¹⁴Yesus otsi Yerusalem werehon arimanowen Samaria inap obog toho wene holtuk urukmu hol hibareg Petrus men Yohanes men pen isa lalihip ulug mon enepfag.

¹⁵It piren itano mon enepfagma o ino libareg, ”Samaria inap Allah hime fanowon unubam amag,” ulug Allah fam sembahyang ibag.

¹⁶Samaria inap arimano Yesus unuk fam Filipusen ikma pilap enepfag angge famen Allah hime fanowon ap misig ubam oho wambik watfag fug.

¹⁷Wambik watfag fugmu Petrus men Yohanes menen ininggik ap ununggulmu imbibagma Allah hime fanowon it unubam oho wambik watfag.

¹⁸Yesus otsiyen ap ununggulmu ininggik emberukmu Allah hime fanowon wambik waharukmu hun Simonen yet hibareg Yesus otsi unubam ele uruk lit,

¹⁹”Hiren an ninggik ineyap naplihipmu anden oho ap ununggulmu ninggik embeminmu Allah hime fanowon unubam wambik watmisiyon fahet uang onggo og hisamin,” ibag.

²⁰Ari ibagma Petrus inowen pet turuk lit, ”Haret huanget war amek! Allah hime fanowon ap og isaruk ane uang fam ayeg waroho waruk peruk lahenma!

²¹Haren Allah olohotma hindi pikit toho wenggel haruk lahen fugmu wene aru hat wa fug teg lahen.

²²Siyag ane wenggeltuk lahenon embesemihinmu Allahn hindi puhunap habuhuwen ubam sembahyang uruk lamin.

²³Siyag angge inowen hat hinggik pug hasug lit hamiye sihon inowen hindi sal haptukmu yet hiyaruk lahi,” ibag.

²⁴Ari ibagma Simonen, ”Hiren an pet nabehepma an siyag aruhuk tohon sembahyang Allah fam ilihip,” ibag.

²⁵Nonowe Yesusen turuk latisi ane niren yet harukuk ulug otsi piren itanowen ap wene hiyag isibareg o Yerusalem suhuloho laruk lit o Samaria pumbuk anggolo welatfahon ap wene hiyag isil laruk latfag.

²⁶Welatfagma malaikat misig Ninikni Allahn Filipus ambeg lamihin ulug monde fibagma watfareg ele uruk lit, ”In atmihinteg Yerusalemen o Gaza laruk abunggalem anggen ke larukon ino ahamu fil pikit ari lamihin,” ibag.

²⁷Ari ibagma Filipus ino in atug libag. Libareg yet harukmen Etiopia ahun misig ap suwon waharuk latfag. Etiopia inap onowe suwon hiyap unuk Kandake ino amingmingangge roho wereg lit aren angge foroho latfag ahun waharuk latfag. At ino o Yerusalem sembahyang ik libareg suhuloho waharuk lit

²⁸kereta emberimu heriyegma wam kudan lisulug waharukmu buku atam Yesayan haharoho imbibahon il waharuk latfag.

²⁹Il waharuk latfagma Allah hime fanowon inowen Filipus fam, ”Folo-folo lamihinteg kereta waharukon iraham lamihin,” ibag.

³⁰Ari ibagma Filipus folo-folo kereta ino iraham libareg hol harukmen ap suwon inowen buku Yesayan hahatfahon urukmu hol hibareg, ”Nikni, uruk lahen ane ari hindi anggat teg lahen?” ulug umung hibag.

³¹Umung hibagma ap suwon inowen, ”Hiyag nutuk ahun elegma nangginoho nindi anggar am teg. Niraham tu hur arik lahik ma,” ibagma Filipus ino iraham hur arik lahibag.

³²Wene uruk latfahon ino Yesayan haharoho imbibahon il laruk lit, ”Wam domba wabulteg senggeltul ulug walug laruk hag toho Ar oho walug larusa. Domba umalik aben oruk kong turukmu ele uk fug angge wereg hag toho Ar oho ele eleg angge weregma watusa.

³³At siyahap turuk lit un ane ubam lombog turusama Allah ibil atisi. Kinangma tuman il hiraho fusuhupmu At unggul unukon fahet ap san hiyag isaruk laruhu?” ulug Yesayan hahatfag ane tu uruk latfag.

³⁴Ari il laruk lit Filipus fam, ”Suwesingga Yesayan hahatfahon tu inggareg fahet hahatfag ano, ap winon fahet hahatfag ano, ap sa fahet hahatfag ulug kapal hiyaruk lahi,” ibag.

³⁵Ibagma Filipusen ap inowen ibag ane ino fahet ele atog lisoho wibareg Yesus wene hiyag itil laruk latfag.

³⁶Hiyag itil laruk lit ik wereg ambeg horogma libareg ap suwon inowen Filipus fam, ”Nare yet himin, ik ahandi wereg. Ikma pilap nabuk hag teg halug pilap napmihin,” ibag.

³⁷Ari ibagma Filipusen, ”Haren we tem toho Yesus fahet hindimu wenggel haruk lahen halug ikma pilap hapmin,” il larikim hun inowen, ”Yesus Kristus Allah amloho ubam tem toho wenggel haruk lahi,” ibag.

³⁸Ari ibareg Etiopia ahun inowen kereta tiya welamek ibareg Filipus men ap suwon ino men ik ahummu kibareg Filipusen ap suwon ino ikma pilapfag.

³⁹Ikma pilapfagma ikman lahik waharuk lit kim harukmen Ninikni Allah hime fanowon inowen Filipus hondoholug libagma eleg latfag. Eleg latfagma ahiyeg toho ibam fil laruk latfag.

⁴⁰Filipus ino libareg o Asdod weregma aben kim hibag. O ariyen wene hiyag isil laruk lit o pumbuk obog toho hiyag isil laruk latfareg o Kaisarea libag.