Read Angguruk Yali ROMA 1 Bible Online

ROMA 1 - Angguruk Yali bible

ROMA 1

¹An Paulus Yesus Kristus amingmingangge welahiyon ino Allahn hat mon haptuk laruhuk ulug mumal naptisi. Mumal naptisireg wene hiyag isaruk laruhun ulug unduhuk nubaharisiyon inowen suwesingga tu emberuk lahi.

²Allahn atam wene hiyag isaruk latfag inap arimano hiyag isaruk lit wene tu inam aruhu ulug unubam sali ibag ane fahet iren haharoho imbibag.

³Haharoho imbibahon ari At amloho fahet imbibag. At amloho ino kinangman Dauren ondohowonen endetfag ulug aben peruk angge famen

⁴Allah inggarehen peruk ane namloho aru Anden indag tarikik peruk. Allahn Yesus ap warehon wereg ambehen olukap tibareg unduhuk fibagma Yesus Kristus ino nit Nonowe atfag.

⁵At amloho inowen turuk latisi ane ariyen nit ninineyap neneptisireg wene enepeleg inap enembeg lahupteg wene hiyag isahupmu An nunuk fam wenggel haruk lit An napma welamuhup ulug mon neneptisi.

⁶Hir oho wene henepeleg hinap welatikip angge famen Yesus Kristus amingmingangge atikip.

⁷Hit obog toho o Roma welahebon Allahn indi henesug lit wol heneptisireg mumal heneptisiyon arimano fahet suwesingga tu emberuk lahi. Ninikni Allah, Nonowe Yesus Kristus menen unubabut fano reg lit hit hinindi yuwahap heneptuk lamuhup ulug sembahyang uruk lahi.

⁸Hiren Allah fam tem toho hinindi wenggel haruk lahebon fahet o pumbuk kema-kema werehonen holtusama tam iminon anden Yesus Kristus unuk fam Allah Nikni uruk lit hit fahet sembahyang uruk lahi.

⁹Likiya hupmu hit fahet sembahyang uruk lahiyon Allahn oho yet niyaruk lit oluk teg. Allah amingmingangge roho wereg lit amlohowen turuk latfag awene ino nahiyeg toho hiyag isaruk lahi.

¹⁰Allahn fano puhureg lamihin uhu sambil misihim hit pen hisa waruhuk ulug Allah fam heng turuk lahi.

¹¹Anden wene fanowon og hisaruk lit hinindi wirikap henebuhuken pen hisa waruhuk peruk lahi.

¹²An oho hir oho Allah fam ninindi fano roho wenggel haruk lit welaheyon ariyen hit men ambiyeg mangno amuhukteg an nindi oho yuwag aruhu.

¹³Nori, anden indam angge hit henembeg waruhuk ulug misihim-misihim wenggel haruk latikik angge famen alem winon nubam atuk ane famen hit henembeg wam fug teg lahireg hit honoluk toho welamok. O pumbuk winon Yahudi inap eleg ambeg tirikik hag toho hit sehelimu anggen fanowon anden fok tuhukmu su aruhu ulug wenggel haruk latikik.

¹⁴Yunani inap men Yunani inap fuhon men, alem onoluk inap men enepeleg inap men it arimano obog toho enengge anden paleg lahi.

¹⁵Paleg lahi angge ari fahet hit Roma welahep hinap fahet oho wene hiyag hisa waruhuk peruk lahi.

¹⁶Wene fanowon aru fahet ninggali ulug hirag atuk lahi fug. Ap sa at ubam wenggel haruk halug wene fanowon inowen eneg atam Yahudi inap fanowap enebuhureg fobik Yunani inap oho Allah ineyon inowen fanowap enebuhu.

¹⁷Allah wene fanowon aru famen Allahn ap ili og eneptuk ane inam atisi. Allah ubam likiya hupmu inindi wenggel haruk inap arimano eneg Aren fano peruk lit ili og enebuhu. ”Ap indi pikit toho werehon ino Allah fam indimu wenggel haruk lit wereg ane ariyen oluk teg lit welaruhu,” ulug haharoho imbibahon aru ihi ane hikit toho imbibag.

¹⁸Ap kinangmonen Allah fahet ninirim peruk lit siyag ane turukon ari famen mondabi fanowon ino hondo rebeseruken Allah indimu olok harisi ane ari poholman ebenam atisi.

¹⁹Ap kinangmonen Allah fahet onoluk am tehon ari Allah inggarehen inamap tibag ane ariyen onoluk teg lit wereg.

²⁰Allah ebe mondabi ine reg lit umbagpag turukon hirahoma weregma aben ha fug teg angge famen mun angge man angge kinangma werehon At inggiken wal tibareg seneg lit werehon ari famen inindi anggar atuk lit onoluk teg inaben nenepeleg ulug awiya wa fug teg.

²¹Allah fahet onoluk teg angge famen At ubam Ninikni uruk lit wel turuk latusa fug. Amu angge fahet fano angge peruk lit inindi sohu roho wereg lit mondabi hik atisi.

²²Mun angge man angge fahet ninindi anggat teg lahe uruk angge famen enepelehen ket-ker ane turuk.

²³Allah mondabi fano werehon eleg am fuhon ino pilaptuk lit iren ubalmangge lahabul ulug ap kinangmon filik turukon men suwe men inggik uyug wereg angge men kinang ke hag til laruk angge men arimano fam Allah hag toho welaruhu ulug wirim turuk.

²⁴Ari turuk latusama ininggareg inindimuwen tul peruk ane ari turuk lamag ulug Allahn il embeserisimu ininggarehen enebe siyahap taruk latusa.

²⁵Allahn tem toho peruk ane apmayap turuk lit iren sibiling-sibiling ane urukon ino ubalmangge palimuwap turusa. Aren wal tibareg kinangma imbibahon arimano fam wel turuk lit wal tibag ahun ino enepeleg toho wereg lit inindi sohu-sohu ane turuk. Wal tibag ahun ino fam eneg wel turukmen mo ilig am wirig am turuk laruhu. Amin.

²⁶Ari turuk latusama Allahn it inindimu siyag ane tul perukon turuk lamag ulug Allahn il embeserisimu ap ininggali atuk ane turuk latusa. Turuk latusareg unuhesi arimanowen enehunsi men sebe roho nohoruk ane embeselug it hiyap-hiyap eneg labog-labog atuk lit sebe roho nohoruk latusa.

²⁷Ari hag toho enehunsiyen oho unuhesi men sebe roho nohoruk ane embeselug it ap eneg arimano pabi ruruk lit unuwali inahanen misigmu nohoruk lit labog-labog atuk latusa. Ari turuk latusa ane ari fam ayeg war atmisi ulug ininggareg siyahap taruk latusa.

²⁸Iren Allah fahet nonoluk teg lahe uruk angge famen At ubam wenggel haruk ane embeseruken unundaman siyag ane eneg wenggel haruk lit werehen Allahn siyag amag ulug il embeserisimu aben tuk fug teg ane eneg turuk latusa:

²⁹Siyag ane eke hag eke hag turukon, inindimu onolok harukon, enebuwap fahet eneg wenggel harukon, siyag ane eneg wenggeltukmen inindi filik turukon, ap enengge fahet nangge lalep perukon, ap pinggi unusurukon, onori men hili roho werehon, sibiling-sibiling ane urukon, enembilik fam fano ane uruk angge famen inindimuwen ap unusele perukon, onori enebug inisanggo kilabeg urukon,

³⁰un ane fahet onori unubam lombohap eneptukon, Allah siyag ulug abug urukon, olok ane turukon, hat hapeleg hahun urukon, ininggareg wel taruk lit hemetog til norukon, olok haruk ane fahet eneg inindi anggat tohon, ikni isinga enele holtuk elehon,

³¹inindi ambolma werehon, ambilik piren tohon, ap indi enesug eleg angge irim toho werehon, ari turuk lit wereg inap arimano fahet uruk lahi.

³²Ari roho turuk inap Allahn unggum unubam emberuk lit pinggi unuselep ane ari it onoluk angge famen it ininggarehen siyag ane turuk lit ap winonen oho siyag ane turukmu yer isalug fano ane turuk lahep ulug winik-wonog uruk lit wereg.