Read Angguruk Yali ROMA 11 Bible Online

ROMA 11 - Angguruk Yali bible

ROMA 11

¹Ihiyon fahet nin kapaloho iminon tu: Allahn umalikisi Israel inap miyaloho hik isarisi ano? Eleg-o nori, miyaloho hik isarisi fug. An ninggareg Israel nahun welahi, numba Abrahamen ondohowon famen nunggul unuk Benyamin nahun welahi.

²Allahn umalikisi tam mumal eneptisiyon arimano miyaloho hik isarisi fug. Elian tibag ane fahet wene atamon fam haharoho werehon henepeleg? Hun Elian Israel inaben siyag ane turukon fahet Allah hiyag utuk lit,

³”Nikni Allah, ap wene hiyag isawag ulug mumal eneptikinon arimano obog toho pinggi unusuruk lit hat fahet hubu lahaptuk ibam arimano obog toho halog toho lin isarusama we an namu misig eneg noluk welahimu aben il hiraho fusuhuk peruk lit wereg,” ulug Elian Allah hiyag itfag.

⁴Elia inowen Allah fam hiyag itfagma Allahn hebeloho nungge ulug hiyag itfag? ”Ap teng-teng angge sabiren 7.000 arimano Baal alukema hur atusareg misihim oho ubam sembahyang urusa fuhon umbat tarikik,” ulug Allahn Elia hebeloho hiyag itfag.

⁵Indam tibahon hag toho ketiya oho Allahn indi isaruk lit ap tor angge mumal tarisiyon wereg.

⁶Inggarehen indi enesug lit mumal eneptisi halug ininggiken fano ane turuson yet isarisireg mumal eneptisi fug. Ininggik fam fano ane turuson yet helep halug Aren indi enesug lit wereg ane fahet niren indi enesug lit wereg ehe ha fug teg.

⁷Ari fahet niren nangginoho peruk lamul? Israel inaben yami ruruk latuson hiyaharusa fug angge famen Aren mumal tarisiyon arimanowen eneg yami ruruk lit hiyaharusa. Ap winon inindi sohu roho werehon arimano haharehon hikit toho wereg,

⁸”It ap arimano inil fulug tukag ulug Allahn unusirisi, inil siyag amag ulug hupni feserisi, inisanggo siyag amag ulug lare feserisi, Allahn tirisi ane inowen ketiya oho ari roho wereg.”

⁹Dauren eke haharoho emberuk lit, ”Allah olohotma seni esetuk ambeg sapna kahale feruk lit yebangge yep amag. Enele ying eneptuk lit sunu roho hondo enebukag.

¹⁰Inilen yet hahup tohon inil hubun amag, enembol fohu reg lit welamag ulug mondabi simbuk tebesuhun.”

¹¹Ihi ane fahet nin kapaloho iminon tu: Allahn mondabi ying amag perisimu unuyug kik toho kinangma ying atusa? Eleg-o nori, mondabi ying atusa fug. It kinangma ying atusa ane ariyen o pumbuk winon Allah unuk enepeleg inap wene fanowon holtusa. It tam wene holtusa ane fahet enehummu siyag amuhupteg enele sahaltuk lamuhup.

¹²It Yahudi inap kinangma ying atusa ane ariyen ap obog toho arimano tung inap atusa. It apma atusa ane ariyen o pumbuk winon palimu atusama Yahudi inap in atuk lit wene holuhup halug o pumbuk winon arimano obog toho mondabi palimu amuhup.

¹³Hit Yahudi hinap fuhon hunubam nele uruk lahi. Yahudi inap fuhon enembeg lamihin ulug Allahn mon naptisimu Allahn mon naptisi ane fahet fano anggolo peruk lit hiyag hisaruk lahi.

¹⁴Anden hit wene hiyag hisaruk lahiyon ari famen an ninggareg nori yuhon enehummu siyahap eneptuk lit wene holukag ulug miyal eneptuk lahi. Miyal eneptuk lahiyon ari famen winonen wene fanowon holuhupmu Allahn fanowap enebuhu peruk lahi.

¹⁵Allahn Yahudi inap arimano miyaloho hik isarisi ane ariyen ap kinangmon obog toho wene holtuk lit mangno atusama nin fobik Allahn ininggik lisoho unduhuk fesuhumu ap war atuk ambehen mondabi onoluk welamuhup fug?

¹⁶Suburu roti aben wiratuk lit atam wiratukon fano wirako laruk halug olukon fumag minggiroho werehon ino oho fano wereg peruk. Allahn e alem An ngi reg lahi perukmu e inggik oho ngi reg lit wereg.

¹⁷E ino inggik winon kong tebeserisireg hit e asimit siyahon hag toho welatikip angge famen kong heneptuk lit e zaitun alem fanowon ino fam inggik winon weregma kilap heneptisimu ahaluwe fanowon inowen hit inggik keron hag toho welamag ulug asimit wilibi hunubahaku.

¹⁸Ari roho Allahn kilap heneptisimu inggik winon arimano apmayap turuk lit hit fahet hininggarehen wel taruk lamuhup fug. Hininggarehen wel tubat tul peruk lahep halug hit inggik hag toho welahepma alem hunubam wilip am fug teg, alem yahoma eneg inggik wilip atuk ulug wenggel haruk lit honoluk toho welamek.

¹⁹Hiren henele uruk lit, ”An fahet e asimit fanowon wilip amag ulug Allahn e inggik winon kong tebeserisireg ubalma kilap naptisi,” uruk lahep ano?

²⁰Fano ari uruk lahep. It inindi fano wenggel haruk eleg ane fahet Allahn kong tebeserisi, hit hinindi fano wenggel harikip ane fahet Allahn kilap heneptisimu fano unduhuk lahep. Hininggareg wel taruk lit hemet til laruk lam fug angge henekol toho welamok.

²¹Allahn e inggik wandabon aru nindi ulug umbat tarisi fug hag toho hit fahet oho nindi ulug hunumbahaku fug.

²²Nori, Allahn indi enesug ane men olok peruk ane men hinindi fano wenggel hemek. It kong toho wamburukon fahet olok haruk lit hit fahet indi henesug lit wereg. At nim sebe roho weregma eneg indi henesug laruhu, sebe roho welamuhup fug halug hir oho kong toho pilap henebuhu.

²³Pilap henebuhumu it tam kong toho pilap eneptisiyon arimano inindi sohu roho welamuhup fug halug alem ino fam ubalma yag enebuhu. Allah ine werehon inowen it hebeloho yag enebuk teg.

²⁴E zaitun anggen naruk eleg ahen inggik kong toho embeserukon hag toho hit welahepma e zaitun anggen naruk ahen ino ubam aben yaho fuk fug teg angge famen yaho hunubaharisi. Hit henemu hinap famen alem ino fam yaho hunubaharisimu it ininggareg enehen e zaitun fanowon ino ubam tem toho yag enebuhu.

²⁵Nori, hit hininggareg fahet mun ane man ane nonoluk ninap welahe puhup tohon anden hirako foroho lahiyon aru hiyag hisamin: Allahn Israel inap winon inindi sohuwa feserisireg Allah unuk enepeleg inap o pumbuk winon anggolo hondoko kilap enebik waruhu sambil ino eneg

²⁶Israel inap obog toho inindi anggarap eneptuk lit fanowap enebuhu. Atam haharoho imbibahon hag toho teko lahuwon tu, ”Windat henebuhu ahun ino o Sionen waruhureg Allah olohotma siyag ane turukon Yakub ubam werehon Aren miyaloho hik isahu.

²⁷Siyag ane iren turukon Anden elehap tuhuk ulug sali aru unubam emberuk lahi.”

²⁸It Yahudi inaben wene fanowon holtusa fureg Allah min seli roho wereg ane ariyen hit fano atikip. Allah min seli roho wereg angge famen iniknisi unumbasi fahet wenggel haruk lit Allahn it mumal eneptikik ulug indi isaruk lit wereg.

²⁹Allahn indi isaruk lit wol enepfag ane ari umbusukon famen tirikik peruk eleg.

³⁰Hiren indam Allah ele holtikip fug angge famen it Yahudi inaben Allah ele holtusa fug ane ariyen hit fahet indi hisarisi.

³¹It ketiya Allah ele holtuk elehon arimano hit indi hisaruk hag toho ir oho indi isaruk laruhu.

³²Allahn ap obog toho nindi enesug laruhuk peruk lit it obog toho nele holuhup tohon ulug inisanggo lar eneptisi.

³³Mun angge man angge alem Allah ngi reg lit wereg. Onoluk atuk ane men wenggel haruk ane men obog toho Allah ubam wereg. Aren peruk ane ap kinangmonen onoluk am fug teg, Aren turuk ane aben wenggeluk fug teg.

³⁴Ap san Allahn wenggeltuk ane oluk am teg? Ap san Allah fam ari-ari timihin ulug hiyag um teg?

³⁵Ap san Allah og itikik angge fahet paleg lahi ulug ubalmangge og uruhu?

³⁶Mun angge man angge alem At famen wereg, ondomi oho At famen wereg. At Allah eneg mondabi wel turuk lamuhup. Amin.