Read Angguruk Yali ROMA 15 Bible Online

ROMA 15 - Angguruk Yali bible

ROMA 15

¹Nit ninine roho werehon arimanowen it inine elehon ler eneptuk lit nininggareg fahet eneg nenehiyeg toho wenggel haruk lamuhuk fug.

²Ap winon fano wereg lit inindi wirik toho welamag ulug it arimano enehiyeg toho welamuhup ane fahet eneg nit nenebe wal taneg obog tohowen yami ruruk lamuhuk.

³Kristus inowen oho inggareg fahet eneg wenggel haruk lit nahiyeg toho welaruhuk ulug yami ruruk latfag fug. Kristus ino fahet haharoho imbibag ane aru, ”Hat pet haptuk lit habug urusa ane ari An nubam atisi.”

⁴Mun angge man angge fahet haharoho imbibahon ari niren kim haruk lit nit ninindi anggar amag ulug haharoho imbibag. Ninindi se aruhu ulug haharoho imbibag ane ari niren fobik fano aruhu ane fahet seneg lit ninindi imbik wamburuk lit nangno ruruk lamuhuk.

⁵Ninikni Allah ninindi wirikap neneptuk lit seyap neneptuk ahun inowen Yesus Kristusen peruk hag toho hir oho honori men sebe roho welamuhup ulug mangnowap heneptuk laruhu.

⁶Ari roho wereg lit henele misig hinindi misig wereg lit Ninikni Allah ino Nonowe Yesus Kristus Ikni wereg ulug wel turuk lamuhup.

⁷Nit obog tohowen Allah wel turuk lamuhuken Nonowe Yesus Kristus inowen indi nenesug latisi hag toho hiren oho hit-hit hinindi roho welamuhup.

⁸Anden peruk lahi ane iminon tu: Allahn niniknisi unumbasi unubam sali ibahon pisan isamin fug ulug tem toho irikik pibagma Kristus ino ap enembilahap palehon enemingmingangge atfag.

⁹Allah unuk enepeleg inap o pumbuk winon arimanowen Allah indi nenesug lit wereg ulug At wel turuk lamuhup. Ari ulug haharoho imbibag ane aru, ”O pumbuk enemu inap sehelimu wereg lit Hat wel haptuk lit Hat hunuk fahet sini yunggultuk laruhuk.”

¹⁰Eke haharoho imbibahon tu, ”Hit henemu hinap famen Allah umalikisi men mangno atuk lit henehiyeg toho welamuhup.”

¹¹Nin eke imbibahon tu, ”Hit o pumbuk henemu hinap famen obog tohowen Allah wel turukmu hununggul unuk henemu-henemu welahebon arimanowen unuk palimuwap turuk lamuhup.”

¹²Nin eke Yesayan haharoho imbibahon tu, ”Hun Isai ino e irat hag toho weregma asimit wilip aruhu. Wilip aruhuwon ino o pumbuk obog toho fer enesug laruhuwen in aruhu. O pumbuk obog tohowen nit fet nenesug laruhuwon waruhu ulug nangno ruruk lamuhup.”

¹³Allahn fanowap nenebuhu ulug nangno ruruk laheyon inowen hit hinindi yuwahap heneptuk lit henehiyehap henebuhu. Allah hime fanowon inowen hit hinineyap heneptukmu hit hinindi tem toho wenggel haruk lit Allahn fanowap nenebuhu ulug nangno ruruk lamuhup.

¹⁴Nori, hit fano ane turuk lit hinindimu honoluk toho welahebon ariyen hit-hit komo-komo atuk lahep ha reg peruk lahi.

¹⁵Anden ari peruk lahi angge famen Allahn indi niyaruk lit wene fanowon ninggikmu emberisimu hit honoluk toho welamag ulug suwesingga aru emberuk lit alem amu-amuwon fag toho hiyag hisaruk lahi.

¹⁶An Yesus Kristus amingmingangge wereg lit Allah wene fanowon ino o pumbuk winon Allah unuk enepeleg inap hiyag isaruk laruhun ulug Allahn mumal naptisimu Allah fahet hubu lahaptukon imam hag toho welahi. Allah fahet mun angge man angge emberuk hag toho it o pumbuk winon arimano oho Allah it fahet ngi aruhureg fano ngi ahi puhuwen Allah hime fanowon inowen it fanowap enebuhu.

¹⁷An Allah olohotma welahi ane ariyen Yesus Kristus unuk uruk lit wel tihi ha reg.

¹⁸An ninggarehen turuk latikik ane fahet nele uk fug teg lahi, Kristus inggikmu an wanggun fanowon hag toho welahimu Aren turuk latisi ane fahet eneg hiyag hisihi ha reg lahi. Allah unuk enepeleg inap arimano At awene holukag ulug hiyag isaruk lit ninggik fam oho turuk lahi.

¹⁹Allah hime fanowon inowen an nineyap naptisimu ap kinangmonen tuk fug teg ane poholmonen eneg tuk teg ane anden turuk latikik. Ari roho turuk lit o Yerusalemen ak teberikikteg walingguruk lit o pumbuk obog toho Ilirikum inap oho Kristus wene hiyag isaruk latikik.

²⁰Wene hiyag isil laruk lit Kristus unuk onoluk inap wereg ambeg lamin puk fug angge At unuk enepeleg inap eneg fano hiyag isa lamin perikik. Ari perikikteg ap winonen olun warusa ambeg anden o wiruhuk fug perikik.

²¹Haharoho imbibahon hikit toho turuk laruhuk perikik ane tu, ”Wene At fahet hiyag isarusa fuhon arimanowen At yet hahup. At fahet holtusa fuhon arimanowen wene holuhupteg inindi anggar aruhu.”

²²Nori, hit pen hisa waruhuk perikik angge famen wene hiyag isil norukmu alem ekeyon-ekeyon nubam atukmu henembeg waharikik fug.

²³We ketiya o pumbuk tuma fil werehon obog toho holtusama hiyag isihi hawon elehen mo ilig am wirig am turukmu pen hisa waruhuk perikik ane ino fahet ketiya henembeg waruhuk peruk lahi.

²⁴O Spanyol lahuk ulug nundaman peruk lahi angge re lahuk sambil ari eneg pen hisil waruhuk. Henembeg waruhukmu hit men ambiyeg tot weregma nindi yuwag atuk halug hiren o Spanyol ino hondoko numbahik lahup.

²⁵Ketiya re tuma inaben o Yerusalem wene holtuk inap fahet ninggikmu uang emberuson og isa lahuk ulug turuk lahi.

²⁶O Yerusalemen wene holtuk inap arimano winon enengge eleg angge werehon fahet Makedonia inap men Akhaya inap menen enele sahaltusareg ler enebuhuk ulug inindiyen uang emberusa.

²⁷Inindiyen uang embehe perusa angge famen anden paleg angge fahet emberusa peruk lahi. Yahudi inap o Yerusalem werehon arimanowen poholma wereg angge minggiroho og isarusama it o pumbuk winon werehon arimanowen kinangma wereg angge fam ayeg war isa hag toho og isarusa.

²⁸Og isa lahun ulug ninggikmu emberuson ari walug lahukteg it ininggikmu umbuhukteg hit hinibam pumbuk keyen tulug o Spanyol lahuk.

²⁹Kristus inowen an og nitisireg nineyap naptukmu hit henembeg pen hisa waruhukteg og hisahukon fahet ninggareg noluk toho welahi.

³⁰Nori, Yesus hit men an men Nonowe roho weregma Allah hime fanowon inowen indi nenesug lit werehen hit men an men ambiyeg sembahyang an fahet uruk lamuhuk ulug komo heneptuk lahi.

³¹Wene holtuk eleg inap o Yudea werehon arimanowen nubam siyag ane tuhup tohon ulug sembahyang uruk lit og isa lahun ulug ninggikmu emberuson walug larukmu wene holtuk inap o Yerusalem werehon arimanowen fano roho hondog nabuhuben sembahyang uruk lamul.

³²Allahn peruk ane hikit toho an oho nahiyeg toho hit henembeg waruhukteg hit men ambiyeg wereg lit nindi yuwag toho welaruhuk.

³³Allah ap seli roho werehon mangnowap eneptukon inowen hit obog toho fet henesug laruhu. Amin.