Read Angguruk Yali ROMA 16 Bible Online

ROMA 16 - Angguruk Yali bible

ROMA 16

¹Nori, nit nenerek Febe o Kengkrea inap wene holtukon arimano ler eneptukon ino hiren at fahet fano wenggel haruk lamuhup.

²Hiyap ino henembeg waharuk halug wene holtuk inaben turuk hag toho Nonowe Yesus unuk fam hinindi roho wereg lit hondoko hinibam kilabuhup. Hinibam kilabuhupteg at seher angge reg halug let turuk lamuhup. Aren oho ap anggolo ler eneptuk lit an oho let naptuk latisi.

³Nori Yesus Kristus iyabuk ambiyeg waruk laheyon Priskila men Akwila men hi eneptuk lahi ane aru hiyag isahup.

⁴An noluk fano welamag ulug nibil atusama ir oho unuselep. Unuselebon ari fahet anden eneg nori-e peruk lahi fug, Yahudi inap fuhon famen wene holtukon arimano obog tohowen oho it fahet nori-e pelep.

⁵It inibam wene holtuk inap werehon obog toho nori ulug hi eneptuk lahi ane aru hiyag isahup. Nare Epenetus anden nindi reg lahiyon ino hi ruruk lahi ane ari hiyag umuhup. Hun Epenetus ino Asia ahun famen Kristus awene tam holtisi.

⁶Maria sat toho hit let heneptuk latisiyon ino hi ruruk lahi.

⁷Nori Andronikus men Yunias men nununggul unuk misihon an men ambiyeg penjara kilap neneptuson itano oho hi eneptuk lahi. It piren itano an wene holuk fugmu it tam Yesus otsi atusama nonori winonen it fahet fano anggolo peruk.

⁸Ampliatus Nonowe Yesus fam nindi reg lahiyon ino nare ulug hi ruruk lahi.

⁹Urbanus Kristus iyabuk ambiyeg wituk laheyon ino men Stakhis nindi reg lahiyon ino men nori ulug hi eneptuk lahi.

¹⁰Apeles ino Kristus fahet wal harukmu indi yuwag toho werehon ino nare ulug hi ruruk lahi. Aristobolus uhe malik men at ibam werehon obog toho fahet nori ulug hi eneptuk lahi.

¹¹Nare Herodion nununggul unuk misig welaheyon ino men, Narkisus uhe malik men at ibam werehon Yesus unuk holtukon arimano men fahet nori ulug hi eneptuk lahi.

¹²Trifena men Trifosa men sat anggolo roho Nonowe iyabuk turukon itano fahet nehebi ulug hi eneptuk lahi. Persis nindi reg lahiyon Nonowe iyabuk fahet sat anggolo roho turuk latisiyon ino oho hi ruruk lahi.

¹³Nonowe Yesusen Rufus mumal tarisiyon ino nare ulug hi ruruk lit isinga ino oho an nisinga yuhon hag toho welatisimu nisinga ulug hi ruruk lahi.

¹⁴Asinkritus men Flegon men Hermes men Patrobas men Hermas men onori it men ambiyeg werehon arimano men fahet nori ulug hi eneptuk lahi.

¹⁵Filologus men Yulia men Nereus men erek hiyap angge men Olimpas men it men wereg lit wene holtuk inap obog toho arimano fahet nori nehebi ulug hi eneptuk lahi.

¹⁶Hit-hir oho Allah unuk uruk lit mako pug toho hi-hi atuk lamuhup. Yesus umalikisi wene holtuk inap obog tohowen hit hi heneptuk.

¹⁷Nori, wene hit hiyag hisarusama holtikip ane ino men seli roho wereg inap kahal enesug lamuhuben anden komo heneptuk lahi. Hit hinindi nonghongap hisaruk lit henebe minggit henebuhup tohon it men sebe roho welamuhup fug.

¹⁸Ari roho wereg inap arimano Nonowe Kristus amingmingangge roho welam fug anggeyen ininggareg enehum fahet eneg enesehet toho wenggel haruk. It ari roho wenggel haruk inaben enele inilaheg toho fano-fano ane uruk lit ap inindi pikiron arimano inindi hareya feseruk.

¹⁹Hiren wene fano holtikibon fahet ap obog toho onoluk atisimu anden oho hit fahet nahiyeg haruk lahi. Fano ane fuki roho wenggel haruk lit turuk lamuhupmu alem siyahon hit hunubam aruhu fug peruk lahi.

²⁰Allah ap kinangmon mangnowap eneptukon inowen Iblis siyahon ino waroho al senggeloho hit hunuyug apma hik isahu. Nonowe Yesus hit indi henesuhon inowen fet henesug lit welaruhu.

²¹Nare Timotius an let naptukon ino men Lukius men Yason men Sosipater men nit nununggul unuk misig welaheyon arimanowen nonori uruk lit hi heneptuk.

²²An Tertius suwesingga tu hahatuk lahiyon inowen Nonowe Kristus unuk fam hi heneptuk lahi.

²³Gayus ibam an hondoko kilap naptisimu welahi ahun inowen oho nori ulug hi heneptuk. At ino ibam wene holtuk inap obog toho wene ul ulug palu ruruk. Erastus o pumbuk aru fahet uang foroho ahun ino men nenere Kwartus menen oho hi heneptuk.

²⁴Nonowe Yesus hit indi henesuhon inowen fet henesug lit welaruhu.

²⁵Yesus Kristus fahet wene hiyag isaruk lahiyon fam Allahn ki henesug lit hinineyap heneptuk. Indam angge Allahn hirako foroho latfahon ino ketiya wene aru fam inam atisi.

²⁶Inam atisi ane aru indam oho Allah mondabi werehon inowen wene hiyag isaruk latfag inap nabi hiyag isarukmu iren suwesingga fam haharoho imbibag. Imbibag ane aru ap obog tohowen holuhupteg we tem peruk lamuhuben haharoho imbibag.

²⁷Allah misihen eneg mun ane man ane alem oluk teg lit werehon ino Yesus Kristus unuk uruk lit likiya hupmu mondabi wel turuk lamuhup. Amin.