Read Angguruk Yali ROMA 2 Bible Online

ROMA 2 - Angguruk Yali bible

ROMA 2

¹Nare, ap sa welahenonen hori winon fahet siyag ane ari-ari turuk lahep ulug enebug uruk lahen angge famen hinggareg hubam werehon seleg toho ha fug teg lahen. Hori winon unubam alem werehon kong turuk lahenon ari fam hinggareg hubam alem werehon oho kong turuk lahen. Hori winon unubam werehon kong turuk lahenon ari hag toho hinggareg hubam oho ambi rohon wereg.

²Iren turuk ane ari Allahn fuki roho kim isaruk lit Aren alem kong tuhu ane ari nit nonoluk.

³Nare, alem hubam wereg angge famen horiyen tohon fahet hil fano roho pen haruk lahenma Allahn unggum kong tuhu sambil ino nuwatmisi ulug longgo ihi ha reg peruk lahen?

⁴Allahn indi imbik wamburuk lit yuwag toho ap indi enesug lit wereg angge re haren apmaya fesemin peruk lahen? Allah ap indi enesug lit werehon inowen haren siyag ane turuk lahenon umbusuhun ulug hiyag hutuk lit komo haptuk ane hat hapeleg?

⁵Siyag ane embesemin puk fug angge hindi sohu roho welahenon ariyen Allah olokap turuk lit alem angginon hinggareg hubam umbat taruk lahenma Allahn unggum fano roho kong tuhu sambil ino olok ane inam aruhu.

⁶Aben turuk ane hikit toho Aren ayeg ware fuhu.

⁷Aben yet nisahupteg fano pukag ulug inindi imbik wamburuk lit siyag am fug angge fano roho welamuhuk ane yami ruruk inap arimano mondabi onoluk welamuhup ane hiyag isahu.

⁸Ininggareg fahet eneg enesehet toho wenggel haruk lit pikir ane urukon holuk fug angge hare-hare ane fahet eneg wenggel harukmu Allahn indi isa fug angge olok hahureg unggum unubam umbuhu.

⁹Ap obog toho arimanowen siyag ane eneg turuk lit werehen Allahn unusuruk lit uyuhen sobir isahu. Atam Yahudi inap fam ari roho tuhureg fobik oho Yunani inap fam tuhu.

¹⁰Ap obog toho arimanowen fano ane eneg turuk lit werehen Allahn wel eneptuk lit enehiyehap enebuhureg lehoma umbusuhu. Atam Yahudi inap fam ari roho tuhureg fobik oho Yunani inap fam tuhu.

¹¹Allahn ap tu suwon, ap tu toron ulug onorohole kim isaruk eleg.

¹²Musa wene enepelehen siyag ane turuk latuson arimano Musa wene enepeleg toho weregman eneg siyag amuhup. Musa wene apma wereg lit siyag ane turuk latuson arimano Musa wene fam haharehon hikit toho unggum angginon unubam aruhu.

¹³Musa wene hahareg lit werehon inisanggo fam eneg holtukon fahet Allahn fano peruk eleg. Musa wene haharoho werehon hikit toho ininggik fam turukon fahet eneg Allahn fano peruk.

¹⁴Allah unuk enepeleg inap Musa wene ngi reg elehon arimanowen ininggareg inindiyen milal taruk lit Musa wene haharoho werehon hikit toho turuk halug it arimanowen Musa wene ngi reg eleg angge famen ininggareg inindiyen Musa wene apma kuruk.

¹⁵Musa wene apma kurukon ariyen ninindimu hahareg lit wereg ulug inamap turukmu inindi wenggel haruk ane ari famen oho fag atuk. Unundaman wenggel haruk lit ininggarehen alem unubam umbat teheg along pal teheg turuk lit unundaman wenggel haruk.

¹⁶Ap inindimu wenggeltuk ane hiraho lit werehon wene hiyag isaruk lahiyon hikit toho Allahn inamap tuhureg Yesus Kristus unuk fam unggum kong tuhu sambil ino anden uruk lahiyon aru seleg aruhu.

¹⁷Nare, an Yahudi nahun Musa wene apma welahi uruk lit Allah amloho welahi ulug hinggareg wel taruk lahen.

¹⁸Allahn peruk ane alem noluk teg lit Musa wene fam milal naptusama siyahon fanowon anden alem haloho emberuk lahi,

¹⁹inil hupnihon ininggik seneko hondog eneptug laruk lahi, hik tegma werehon fahet iral hag toho wereg lit seleg og isaruk lahi,

²⁰enepeleg toho werehon inindi anggarap eneptuk lahi, sohu-sohu ane turuk inap milal eneptuk lahi, Musa wene fam haharoho werehon kim haruk lit mun ane man ane alem noluk teg lahi peruk lahen.

²¹Ap winon fano milal eneptuk lahi uruk lahen angge famen nungge fahet hinggareg milal taruk lahen fug? ”Yoholiyangge wa fug,” ulug komo eneptuk lahen angge famen nungge fahet hinggarehen yoholiyangge waruk lahen?

²²”Ap unuhesi yarog ta fug,” ulug hori komo eneptuk lahen angge famen nungge fahet hinggarehen hiyap yarog taruk lahen? ”Usa ane siyag ulug nirim,” uruk lahen angge famen usa ibam wereg angge nungge fahet hinggareg hilaruk lahen?

²³Musa wene apma welahi uruk lahen angge famen hinggarehen Musa wene sokowa feseruk lit Allah abug uruk lahen.

²⁴Tam haharoho imbibahon hikit toho, ”Hiren turuk lahep ane ari fahet wene enepeleg inaben oho Allah abug uruk,” ulug haharoho imbibahon hikit toho teko laruk.

²⁵Musa wene fam haharoho werehon fuki roho holtuk halug ambilahap pal eneptuk ane ari famen hindi fanowap habuk teg. Musa wene osokowa feseruk laruhunmu ambilahap pal haptusa angge famen paleg elehon hag toho welahen.

²⁶Ap ambilahap paleg elehonen Musa wene fam imbibahon hikit toho turuk halug at ino ambilahap palehon men ambi reg eleg?

²⁷Ambi roho wereg halug ap ambilahap paleg eleg angge Musa wene hikit toho turuk ahun inowen hat hubam alem werehon kong turuk laruhu. Hat Musa wene fam haharoho imbibahon hinggikmu ki reg lit hambilahap paleg lahen angge famen Musa wene sokowa feseruk lahenma it palimu wereg lit hat sen hasug lamuhup.

²⁸Yahudi inap urukon ahap selmon kim halug Yahudi ahun tu uk fug teg. Ambilahap paltuk ane fahet urukon ahap selmon paltukon fahet uk fug teg.

²⁹Yahudi inap fahet we tem toho urukon undama hiraho lit werehon fahet eneg Yahudi ahun tu uk hag teg. Ambilahap paltuk ane fahet tem toho urukon Allah fam inindi wenggel harukon fahet eneg inindimu ambilahap paleg inap wereg uk hag teg. Allah hime fanowon inowen ap inindi anggen fam paltuk halug ari fano, indam haharoho imbibahon ino fam ahap selmon paltuk halug ari siyag. Ap kinangmonen ininggareg wel ta fug teg. Hinindi anggen fam paleg welahebon Allahn eneg wel enebuk teg.