Read Angguruk Yali ROMA 3 Bible Online

ROMA 3 - Angguruk Yali bible

ROMA 3

¹Ihi ane aru tem toho ihi halug Yahudi inap palimu welam teg? Enembilahap paltuk ane ariyen ap inindi fano am teg?

²Nori, anggolo palimu welam teg peruk lahiyon alem eke hag eke hag palimu wereg peruk lahi. Atam iminon tu: Allahn An nawene Yahudi inaben fano seneg lamuhup ulug ininggikmu imbibag.

³Ininggikmu imbibag angge famen it winonen oho fano roho seneg latusa fug. Iren sali pisan isarusa ulug ayeg waroho Allahn oho sali pisan isahu?

⁴Eleg-o nori. Allahn uruk ane tem toho eneg uruk angge famen ap kinangmon obog toho atam haharoho imbibahon hikit toho si ane eneg uruk: ”Haren wene uruk lahenon obog toho tem toho uruk lahenma fag aruhu. Alem hubam umbuhup halug Hat eneg palimu welaruhun.”

⁵Niren si ane uruk laheyon ariyen Allahn tem ane urukon ino inam atuk halug niren nungge ehe ha reg? Allahn olok ane nunubam emberuk halug At indi sohu reg lit emberuk ano? Ihi ane aru ap kinangmonen peruk ane fahet uruk lahi.

⁶Eleg-o nori, indi sohu reg lit emberuk eleg. Allahn olok ane nunubam umbuk fug teg lalepma alem angginon kinangma werehon nangginoho kong telep?

⁷Anden si ane uruk lahiyon ariyen Allahn tem ane urukon ino leho feruk lahimu at siyag ulug nungge fahet unggum nubam umbuhu?

⁸It ap arimanowen nit abilit neneptuk lit, ”Siyag ane tulon ariyen fano ane inam aruhuwen siyag ane eneg turuk lamulen maniyek ulug wol neneptuk lahep,” ulug abilit neneptuk lit uruk inap arimanowen tem toho uruk ano? Ap ari hag toho uruk inap Allahn unggum unubam umbuhureg unusuk hag tehen mondabi siyahap enebuhu.

⁹Nori, nangginoho peruk lamuhuk? Ap winon apma weregma nit Yahudi ninap palimu welahe ano? Ari roho welahe fug. Yahudi inap men ununggul unuk Yahudi fuhon men obog toho arimano siyag ane turukon apma wereg ulug palimu suwesingga fam haharoho imbihi.

¹⁰Wene atamon fam haharoho werehon tu tot imin, ”Ap misihen oho tem perukon eleg.

¹¹Ap misihen oho fuki roho wenggel ha fug anggeyen Allah yami rurukon eleg.

¹²Ap obog toho kebunggalem fanowon embeselug un ke laruk lit misihen oho fano ane tuk fug angge werehen it arimano fahet oho fano puk fug teg.

¹³It enenggolobag fam ap waroho kilaptuk ambeg hag toho wereg. Enembilik anggen handuhal turuk lit enele si ane eneg uruken enembilikmu pisanggo ayeg olokon wereg.

¹⁴Enele het-pet toho uruk lit ahum sipuk ane eneg uruk.

¹⁵Mep hinanggul ulug unuyug folo-folo laruk.

¹⁶Kema-kema laruk lit ap enebe unusil inindi siyahap enebil laruk lit

¹⁷onori men mangno atuk ane fahet wenggel haruk eleg.

¹⁸Ap arimano Allah fahet enekol toho wereg eleg.” Ari turuk ulug wene atamon fam hahareg lit wereg.

¹⁹Musa wene atamon haharoho imbibag ane Musa wene apma wereg inap fahet haharoho imbibahon ari nit nonoluk. Nit obog toho ari nonoluk angge famen iren siyag ane turuk lahe fug ulug awiya waruk inap arimano enembilik laroho welamag. Ap obog toho kinangma werehon fahet Allahn siyag peruk lit wereg.

²⁰Musa wene apma welahe peruk inap arimano fahet siyag ane turuk inap wereg ulug wene inowen inamap turuk. Inamap turukmu ap obog toho Musa wene apma welahe peruk inap arimano unubahet Allahn fano puk fug teg.

²¹Ketiya Allahn ap ili og enebuhuk pibag ane ari Musa wene sel fil weregma inam atisi. Inam atisiyon ino fobik inam aruhu ulug wene atam haharoho imbibahon men wene atam hiyag isaruk latfag inap nabi arimanowen haharoho imbibahon hikit toho inam atisi.

²²Yesus Kristus fam tem toho wenggel haruk lit wereg inap arimano tu siyag ari fano puk fug anggeyen obog toho Allahn ili og enebuhuk peruk lit wereg.

²³Ap obog toho siyag ane turuk lit weregma Allahn wel eneplep angge famen wel enebuk fug teg. Allahn ap kinangmon wel eneplep angge famen it obog toho siyag ane eneg turuk lit werehen wel enebuk fug teg.

²⁴Wel enebuk fug teg angge famen Allahn indi enesug lit wereg. Yesus Kristus inowen ap ininggik hele warehon lol eneptuk lit saplangge ili og eneptisi.

²⁵Yesus fam tem toho wenggel haruk inap arimano Yesus amep fam Allah men mangno amuhup ulug Allahn At unduhuk fibag.[1] Allah indi pikit teg lit aben siyag-siyag ane indam turuk latfag ane Aren imbisibahon arimano ketiya nambolma embesemin ulug Yesus unduhuk fibag.

²⁶An nele tem toho uruk lit nindi pikit toho welahi ane fahet ketiya ap inindimu onoluk amuhuben Yesus Kristus fam wenggel harukon Allahn ili og eneptuk.

²⁷Allahn ili og eneptisi angge famen aben nangginoho enewelwel tubat ta reg? Wel tubat ta fug teg. Nungge fahet wel tubat ta fug teg? Ap ininggik fam fano ane turukon Allahn winahuk fug anggeyen inindi fam wenggel harukon eneg fano peruk.

²⁸Anden peruk lahiyon aru: Musa wene haharoho imbibahon ino fam turuk halug Allahn fano puhu fug. We hinindi fam wenggel harukon ari fam eneg Allahn fano puhu.

²⁹Ninikni Allah Yahudi inap fahet eneg wereg? O pumbuk winon fahet wereg eleg? At we tem o pumbuk winon fahet oho Inikni Allah wereg.

³⁰Allah misig inowen ambilahap paleg lit werehonen ubam wenggel haruk halug ili og eneptuk. Ambilahap paleg eleg inap arimanowen ubam wenggel haruk halug oho ili og eneptuk.

³¹Nori, anden uruk lahi ane ari fam Musa wene ino elehap turuk lahi ano? Eleg-o nori, Musa wene ineyap turuk lahi.