Read Angguruk Yali ROMA 5 Bible Online

ROMA 5 - Angguruk Yali bible

ROMA 5

¹Yesus Kristus unuk fam nit ninindimu tem toho wenggel haruk lahema Allahn nit ili og neneptisimu At min mangno roho welahe.

²At ubam ninindi wenggel haruk lahe ane ariyen Allahn indi nenesug lit werehon ino men mangno amuhup ulug sok hut neneptisi. Allah indi nenesuhon ino min mangno roho wereg lit Allah wereg ambeg lehoma lahuk ulug nangno ruruk lit nenehiyeg toho welahe.

³Ihiyon ari eneg fug, aben nunusurukon fahet eke nenehiyeg toho welahe. Nunusurukon ariyen ninindi imbik wamburuk ane nonoluk atuk.

⁴Ninindi imbik wamburuk laheyon ariyen mun angge man angge fam wal nisarukmu osokowa fusuk teg lahe. Osokowa feseruk laheyon ariyen Allahn let nenebuhu ulug ninindimu nenehiyeg toho welahe.

⁵Allahn let nenebuhu ulug nenehiyeg toho welaheyon ninindi siyag am fug teg. Allah hime fanowon ari og nisaruk lit Aren indi nenesug ane ari nit nunubam atisi.

⁶Nit Allah unuk nenepeleg toho wereg lit ninine eleg toho weregma Allahn teko lahu pibag sambil Kristus nit fahet war atfag.

⁷Ap misihen oho nare indi pikit tohon fahet nuwabukag peruk ane ari se reg eleg. Ap indi mondabi fanowon fahet nuwabukag peruk lit ambong se roho war atukon oho wereg lit teg.

⁸Nit siyag ane turuk lit weregma Kristus nit fahet war atfag ane ariyen Allah nit fahet indi nenesug ane inamap tibag.

⁹Kristus amep fam ketiya ili og neneptisimu we tem toho Allahn nunubam olok ane perukon fobik elehap tuhu.

¹⁰Nit Allah men seli roho welatukuk angge famen amloho Yesus war atfag ane ariyen nit men At men mangno atukuk. Ketiya nit mangno atukukon te At oluk atfag ane ariyen we tem toho nit mondabi fanowap nenebuhu.

¹¹We ari eneg fug. Nonowe Yesus Kristus fam Allah men mangno atukukteg ninindi yuwahap neneptisimu niren Allah wel turuk lit nenehiyeg toho welahe.

¹²Ap misihen siyag ane werehap tibagma war atuk ane inam atfag hag toho ap obog toho arimanowen siyag ane turuk latfagma war atuk ane unubam atfag.

¹³Musa wene uwanma siyag ane turukon kinangma ngi atfag angge famen Musa wene elegma siyag ane turukon Allahn winaharuk latfag fug.

¹⁴Winaharuk latfag fug angge famen ap obog toho Adam weregman ak tibareg war atukmen eneg Musa weregma oho war atuk latfag. Adam tam siyag ane tibahon ino hag toho ap winonen tibag fug angge famen it arimano oho war atuk latfag. Adam ino At fobik waruhu ahun ino wirimangge welatfag angge famen

¹⁵Allah fano ane turukon ino men aben siyag ane turukon men wirim teg eleg. Ap misihen siyag ane tibahon ariyen ap anggolo war atfag angge famen Yesus Kristus ebe misig famen ap anggolo Allahn indi enesug lit fano ane sebe roho og isaruk latisi.

¹⁶Allahn indi nenesug ane ari ap misihen siyag ane tibahon men wirim tuk fug teg. Ap misihen siyag ane tibag ambiyang ino famen alem angginon ubam atfag. Ap anggolowen siyag ane turuk latfag angge famen Allahn ap indi enesug lit ili og eneptisi.

¹⁷Ap misihen siyag ane tibahon famen ap kinangmon war atuk ane palimu atfag. Palimu atfag angge famen Yesus Kristus ebe misig inowen anggolo fanowap enebuhumu palimu welamuhup. It arimano Allahn indi enesug lit wereg ane ariyen alem unubam werehon elehap turuk.

¹⁸Ap misihen siyag ane tibahon ino famen ap obog toho alem angginon unubam atfag hag toho Ap misihen pikir ane tirisiyon ino famen ap obog toho onoluk welamag ulug ili og eneptisi.

¹⁹Ap misihen Allah ele imbisibagma ap obog toho arimanowen siyag ane turuk latfag hag toho Ap misihen Allah ele fano holtisimu ap obog toho inindi pikit atuk lit fano ane turuk.

²⁰Siyag ane ari anggolo amag ulug Musa wene ino pulmu kibag. Siyag ane su atuk lit palimu atisimu Allahn ap indi enesug ane sebe roho mondabi palimu atisi.

²¹Siyag ane palimu atisimu war atuk ane inam atisi ari hag toho Allahn ap indi enesug lit ili og enebuhumu Nonowe Yesus Kristus unuk fam ap obog toho onoluk welamuhup.