Read Angguruk Yali ROMA 6 Bible Online

ROMA 6 - Angguruk Yali bible

ROMA 6

¹Allah indi nenesug lit weregma nungge uruk lamuhuk? Aren indi anggolo nenesug lamag ulug siyag ane eneg turuk lamuhuk ano?

²Eleg-o nori. Siyag ane apma welatukuk angge famen embeselug wilip atukukteg nin fobik nangginoho turuk lamuhuk?

³Nit obog toho Kristus unuk fam ikma pilap neneptuson At war atfahon min mangno atukukon hit henepeleg?

⁴Kristus war atfagma kinangma salfag hag toho nit ikma pilap neneptuson ariyen At min war atukukmu kinangma sebe roho sal neneptusa. Ikni Allah ine reg lit werehon inowen amloho Kristus ap war atuk ambehen olukap tibahon hag toho nir oho At men nonoluk atukukmu ap keron hag toho welamuhuk.

⁵Kristus war atfahon nim ambi roho mangno atukuk halug At olukap tibahon ino nim ambi roho mangno amuhuk.

⁶Ninindimu siyag ane turuk latukukon eleg amag ulug siyahon amingmingangge hag toho welamuhuk fug ulug ninindi miningon Yesus men mangno roho e fam tel neneptusa.

⁷Ap eke war atuk halug siyag angge at ubam werehon inggik kobog isahu.

⁸Kristus men ambiyeg war atukuk halug At min mangno roho nonoluk amuhukteg welamuhuk ulug tem toho peruk lahe.

⁹Allahn Kristus olukap tibahon ino nin war am fug tehen nin fobik eke sebe roho war aruhu fuhon ari nit nonoluk.

¹⁰Siyag ane mondabi palimu weregma An apma welaruhuk fug ulug At war atfareg Allah apma fano welaruhuk ulug oluk atfag.

¹¹Ari roho hiren wenggel haruk lit siyag ane hininggik kobog isalug war atikipmu Kristus men mangnowap heneptisimu Allah apma fano welahep.

¹²Hit kinangma welahebon siyahonen hinikni roho sen henesugmu welamuhup fug. Siyag angge inowen mingming heneptukmu tu helele ari helele peruk lamuhup fug.

¹³Hininggik hunuyug ari siyahon aminggin tog atuk lit hare ane tuk nowen og um fug. Nenebe wareg latukukon nonolukap neneptisi ulug henebe Allah og utuk lamuhup. Hininggik hunuyug At aminggin tog aruhumu pikir ane turuk lamag ulug og umuhup.

¹⁴Musa wene apma welahep fugmu Allahn indi henesug lit werehen siyahonen ikni roho sen henesug lit wereg eleg.

¹⁵Nori, ihiyon ari fahet nungge peruk lamul? Musa wene apma welahe fugmu Allahn indi nenesug lit werehen siyag ane turuk lamuhuk? Eleg-o nori.

¹⁶Ap eke nit ninikni roho weregma nit amingmingangge welamul puhup halug at ino ele holtul peruk lamuhup. Siyahon hinikni roho weregma ele holtuk lit siyag amuhup. Hinikni Allah ele holtuk lamuhup halug ili og heneptuk laruhuwon henepeleg?

¹⁷Indam hit siyahon amingmingangge roho welatikip angge famen ketiya hinindi wirik toho wereg lit wene hiyag hisaruson holtikibon fahet Nikni Allah wel turuk lahi.

¹⁸Indam siyahon amingmingangge welatikip angge famen Allahn hininggik lisoho hondog heneptisimu fanowon amingmingangge welahep.

¹⁹Hinindi uwan lahepma wenggel hawag ulug wirimangge fam seleg toho hiyag hisaruk lahi. Indam hininggik men hunuyug men siyahon amingmingangge amag ulug og itikipmu aren hininggik lisoho hunubaharukmu hare ane turuk latikip. Ketiya hininggik hunuyug pikir ane turukon amingmingangge atuk lit Allah ngi reg lit welamuhup ulug og utuk lamuhup.

²⁰Siyahon hinikni roho wereg lit fanowon hininggik kobog isarikipteg wereg lit

²¹anggen ke hahon tahan tarikip? Anggen siyahon ariyen war atuk ane hunubam atisimu ketiya hininggali anggolo roho welahep.

²²Ketiya Allahn siyahon inggikmuwen taluk heneptisimu At amingmingangge roho wereg lit anggen fanowon tahan taruk lamuhupmu anggen ariyen Allah ngi amuhupteg mondabi fanoma honoluk welamuhup.

²³Siyag ane turukon onggo re mondabi war atuk ane wereg. Allah indiyen og nisarukon ari Nonowe Yesus Kristus men mondabi nonoluk welamuhuk.