Read Angguruk Yali ROMA 7 Bible Online

ROMA 7 - Angguruk Yali bible

ROMA 7

¹Nori, Musa wene fam tuk hag teg ane urukon hit honoluk teg lahepma anden tot hiyag hisamin. Ap misig oluk wereg lit tuk hag teg ane ari apma wereg angge famen war aruhumu eneg seleg aruhu.

²Hiyap misig ap ohowonen ahun ino oluk weregma aben nungge-nungge tuk hag teg ane apma wereg lit sebe roho welamuhup angge famen ahun ino war atuk halug nubam seleg aha ulug ap eke hilamin puk teg.

³Ahun ino oluk weregma ap ekeyen pal taruk halug tuk fug teg ane siyag ane tehek peruk. Ahun war atuk halug eneg te nubam seleg aha ulug ap eke hila reg.

⁴Nori, hit Musa wene fam aben tuk teg ane ino apma welatikip angge famen Kristus ebe min war atikipmu hit hunubam seleg ahama ap eke Hinikni roho welaruhu. Allah olohotma wereg lit anggen fano yihik feruk lamuhuken Kristus Allahn olukap tibahon ino nit ngi roho welamuhuk.

⁵Atam Kristus ngi roho welam fug anggeyen nunubabut miningon welatukukmu siyahon ino nit nunundama nohoruk lit weregma Musa weneyen eleltisimu tu hilimin ari hilimin ulug nininggik nunuyug mingming neneptuk latisi. Mingming neneptukmu anggen siyahon filik turukon eneg yihik feruk latukuk.

⁶Musa wene fam aben tuk hag teg ane apma weregma nininggik hele warehon hag toho welatukukmu Kristus men war atukukon ariyen seleg atisi. Seleg atisimu Musa wene haharehon apma wereg lit turuk latukuk ane embeselug nunubabut keron fam Allah amingmingangge roho Ahime fanowon apma welamuhuk.

⁷Ihi ane ari hag toho wereg halug Musa wene fahet siyag awene uk teg? Eleg-o nori, Musa wene apma welahiyon ariyen siyag ane turuk lahiyon fahet an noluk atuk. Musa wene fam, ”Hilamin puk fug,” ulug komo eneptuk ane hahareg lit werehon ari hahatep fugmu anden helele peruk ane napeleg lalepma wenggel hele fug.

⁸Musan haharoho imbibahon inowen komo naptisimu siyahon inowen wal niyaruk lit tu hilimin ari hilimin ulug hiyag nitisi. Musan haharoho imbibahon inowen komo naplep fugmu siyahon ino eleg lalepma wal neyelep fug. Wal neyelep fugmu siyag ane tele fug.

⁹Indam Musa wene apma welam fug angge selma welatikikon inowen komo naptuk ane ino holtikikmu siyag angge nundama welatisiyon ino oluk atisimu an war atikik.

¹⁰War aruhu rohon an fano amag ulug Musa wene inowen komo naptisi angge famen komo naptisi ane inowen miyaloho hik niyarisimu war atikik.

¹¹Musan haharoho imbibahon inowen komo naptisimu siyahon inowen ele si ane nele ying naptuk lit pinggi nuwatisi.

¹²Musa wene fam haharoho werehon aru fanowon wereg lit komo eneptuk ane haharehon ino oho Allahn ngi reg lit pikir ane turukon fanowon eneg wereg.

¹³Ihi ane ari hag toho wereg halug fanowon eneg werehon inowen tem toho an nuwatisi? Eleg-o, nori. Siyahon ino anden tem toho siyag ane eneg turuk ulug oluk amag perisireg Musa wene fanowon ino fam an siyahap naptisi. Siyag ane fahet we tem toho siyag anggolo reg peruk lamuhuken komo eneptuk ane nunubam arik waharisi.

¹⁴Musa wene ari alem te Allah famen wilip atfahon nit nonoluk angge famen an ap kinangmon nubabut miningon fam welahiyon ino siyahon amingmingangge amag ulug siyahon inggikmu atikik.

¹⁵Anden turuk lahi ane napeleg toho wereg lit anden nahiyeg peruk lahi ane ari turuk lahi fug, nirim peruk lahi ane ari turuk lahi.

¹⁶Anden tuk hag teg ane wereg angge famen nirim peruk lahi ane ari turuk lahi. Turuk lahiyon ari fam Musa wene tuk hag teg ane fahet fano wene wereg ulug selehap turuk lahi.

¹⁷Ihi ane ari hag toho wereg halug siyag ane turuk lahiyon ari an ninggareg nindiyen turuk lahi fug, siyahon an nundama werehon ariyen mingming naptukmu turuk lahi.

¹⁸Turuk lahiyon ari an ap kinangmon wereg lit nubabut miningon werehen nundama fanowon eke wereg eleg ulug an noluk. Nindimuwen fano ane tele peruk angge famen ninggiken turuk lahi fug.

¹⁹Fano ane fahet nahiyeg toho welahi angge famen nebeyen turuk lahi fug. Siyag ane fahet nirim peruk lahi angge famen ninggiken turuk lahi.

²⁰Siyag ane fahet nirim peruk lahi angge famen turuk lahi halug siyag ane ari an nindiyen turuk lahi fug, siyahon nundama werehon ariyen turuk.

²¹Nindimuwen fano ane timin peruk angge famen siyag ane eneg nubam atuk. Ari roho eneg wereg lit nubam seleg atuk eleg.

²²Nubam seleg atuk eleg angge famen Allahn komo naptuk ane fahet nindimuwen nahiyeg toho welahi.

²³Nindimuwen nahiyeg toho welahi angge famen ninggik nuyuhen tuk fug teg lit weregma yer isalug noluk atuk. Ninggik nuyug aruman tuk fug teg lit werehen nindimuwen timin peruk lahiyon men hili roho wereg. Ninggik nuyuhen siyag ane eneg tuk hag tehen an hele pug toho siyahon apma hik niyarukmu welahi.

²⁴An siyag toho welahi nahun! An nebe war atuk hag toho welahiyon aru san windat nabuhu?

²⁵Nonowe Yesus Kristus inowen windat naptisimu Allah wel turuk lahi.

²⁶An nindimu Allahn komo naptukmu holtuk lit amingmingangge welatmin peruk lahi angge famen nebeyet ninggiket nuyuhet siyahonen mingming naptukmu welahi.