Read Angguruk Yali ROMA 8 Bible Online

ROMA 8 - Angguruk Yali bible

ROMA 8

¹Yesus Kristus fam wenggel haruk inap ketiya unggum unubam umbuk fug teg.

²Hit warehon hag toho wereg lit siyag ane eneg tuk hag teg latikipmu Yesus Kristus inowen hime fanowon fam honolukap heneptukon ino og hisaruk lit selehap hisarisi.

³Musa wene haharoho imbibahon ino nit nunubabut miningon fam tuk fug teg latfahon ari Allahn tibibag. Allahn ari tebemin ulug amloho yuhon monde feruk lit nit siyahon apma welaheyon hag toho Ar oho kik waruhureg siyahon ino elehap tuhuwen monde fibag. Siyahon ino nit nunubam ine roho weregma Allahn alem nit nunubam embelep angge famen amloho kinangma monde fibahon ubam emberuk lit siyag ane ino apmayap tibag.

⁴Apmayap tibagma nit arimanowen tuk hag teg ane hikit toho pikir ane eneg turuk lamuhuk. Nit arimano nunubabut miningon fam welatukukmu Allah hime fanowon inowen nunubabut keronap neneptisimu At apma welamuhuk.

⁵It unubabut miningon fam turuk inap arimanowen miningon eneg wenggel haruk lit wereg. Allah hime fanowon inowen hiyag isarukmu turuk inap arimano Allah hime fanowon inowen hiyag isaruk ane eneg wenggel haruk lit wereg.

⁶Miningon eneg wenggel haruk inap arimano war atukon hag toho wereg. Allah hime fanowon inowen hiyag isarukmu wenggel haruk inap arimano onoluk wereg lit onori men enehiyeg toho wereg lit mangno roho wereg.

⁷Miningon eneg wenggel haruk inap arimanowen Allah komo eneptukmu holuk fug angge enemu ane eneg turuk lit Allah men seli roho wereg. Unubabut miningon weregma Allahn komo eneptuk ane holuk fug teg.

⁸Inindi atamon fam eneg wenggel haruk inap arimano Allahn indi enesug lam fug teg.

⁹Allah hime fanowon tem toho hunubam wereg halug hinindi atamon embeselug hinindi keron weregma Allahn peruk ane eneg turuk lamuhup. Ap eke Kristus hime fanowon indimu eleg halug at ino Kristus ngi roho welaruhu fug.

¹⁰Kristus ino hit men weregma hininggik fam siyag ane tirikibon ariyen henebe warehon hag toho welahep angge famen Kristus inowen hinindi pikirap heneptisimu Allah hime fanowon min mangno roho wereg lit honoluk welamuhup.

¹¹Honoluk wereg lit Allahn Yesus ap war atuk ambehen olukap tibahon ahime fanowon ino hit hunubam wereg halug At Yesus Kristus olukap tibahon inowen hit henebe war atukon hag toho welahebon ahime fanowon ino hunubam emberuk lit honolukap henebuhu.

¹²Nori, nit paleg angge reg ninap welahe. Nunubabut miningon fam eneg wereg lit nunubam paleg angge weregman eneg welamuhuk fug.

¹³Hunubabut miningon fam eneg welamuhupmu warehon hag toho welamuhup. Allah hime fanowon ino hunubam weregma hunubabut miningon fam turuk lahebon umbusuhup halug honoluk welamuhup.

¹⁴Ap obog toho Allah hime fanowon inowen hondog eneptukon arimano Allah umalikisi wereg.

¹⁵Hime Allahn og hisarisiyon inowen siyahon apma hunumbaharuk lit henekolap heneptisi fug. Og hisarisiyon inowen numalikisi amuhup ulug ahime fanowon hunubam emberisi. Hunubam emberisimu, ”Niyon, Nikni,” uruk ane hiyag nisaruk latisimu uruk lahe.

¹⁶Allah hime fanowon inowen hit Allah umalikisi yuhon welahep ulug ninindi anggarap neneptuk.

¹⁷Umalikisi yuhon welahe halug anggengge lin tuhuwon nit ngi amuhuk. Ngi amuhukon arimano re og hisahuk ulug sali watfahon ino Kristus men mangno amuhukteg ngi roho welamuhuk. Ngi roho wereg lit Kristus men mangno roho siyahap nenebuhupmu fobik Allahn nin At men mangno roho fanowap nenebuhu.

¹⁸Nit ketiya welaheyon Allah unuk fahet aben siyahap neneptuk ane men fobik fanowap nenebuhu ane men we tem toho ambi reg eleg peruk lahi.

¹⁹Mun angge man angge Allahn wal tibag angge arimanowen Allah umalikisi fano amuhup sambil ino nit weregma folo-folo inam alep ulug wenggel haruk lit wereg.

²⁰Mun angge man angge wal tibag angge arimano eleg am hag teg lit werehon enemuwen mondabi welala peruk angge famen Allahn wal turuk lit eleg atuk lamuhup pibag ane roho eleg atuk.

²¹Allahn wal tibag angge arimanowen fobik oho eleg am fug angge mondabi fano welamuhuk peruk lit wereg. Wal tibag angge arimano filik atuk ane elehap tuhu sambil ino Allah umalikisi ininggik hele loloho enemu unduhuk lit werehon men mangno roho welamuhup.

²²Hiyap malik endebuk oho lit asengseng haruk hag toho mun angge man angge Allahn wal tibag angge arimano oho asengseng haruk lit werehon nit nonoluk.

²³It eneg asengseng haruk lit wereg eleg. Nir oho Allahn hime pen nisaruk hag toho Allah hime fanowon og nisarisiyon asengseng haruk lit umaliki hag toho indag nenebuhumu nenebe fano amuhukon ino fahet yet teg lahe.

²⁴Yet teg laheyon Yesus Kristus inowen tam fanowap neneptisireg fobik oho fanowap nenebuhu peruk lahe. Aben yet teg lahe perukon teko laruk halug fobik eke teko lahu peruk eleg. Ketiya teko larukmu yet haruk angge fam nangginoho fobik teko lahu ulug yet teg lam teg?

²⁵Ninil fam yet haruk lahe fug angge famen fobik teko lahu ulug nangno ruruk lit we tem toho ninindi yuwag toho wereg lit yet teg lahe.

²⁶Yet teg lit ninine eleg toho weregman Allah hime fano inowen nit let neneptuk. Ninine elehen sembahyang nangginoho ul ulug nenepelehen memeltuk lahema Allah hime fanowon inowen nit sat nim-nim uruk laheyon nunubam wereg lit nit let nenepmin ulug niren uk fug tehon uruk lit sembahyang uruk.

²⁷Sembahyang urukmu ap inindimu hirako wenggel haruk ane olukon Allah inowen te ahime fanowonen At fam heng turuk ane oluk teg lit wereg. Allahn tam pibag hag toho umalikisiyen ubam sembahyang uruk lit heng turukmu ahime fanowon inowen ler eneptuk.

²⁸Ap Allah fam inindi reg lit werehon arimano mun angge man angge alem unubam atuk halug Allahn ler eneptuk lit fanowap enebuhu. It arimano fahet Allahn tam wenggel hibareg wol eneptisi.

²⁹Tam wenggel hibareg mumal eneptisiyon arimano namloho men ambi roho welamuhup ulug in eneptisi. In eneptuk lit An namloho wandabon hag toho weregma it arimano At otsi roho welamuhup ulug in eneptisi.

³⁰Atam-tam in eneptisiyon arimano wol eneptisi. Wol eneptisiyon arimano inindi pikirap eneptisi. Inindi pikirap eneptisiyon arimano mondabi fanowap eneptisi.

³¹Anden ihi ane obog toho ari fahet nin eke ul perukon wereg ano? Allah nit ninibil weregma ap san nit men seli roho welam teg?

³²Allahn namloho nindi puk fug anggeyen nit ap obog toho fahet og nisibag. Og nisibareg mun angge man angge oho amloho men sebe roho og nisa fug teg?

³³Ap sa Allahn mumal eneptisiyon arimano unubam unggum umbuk teg? Unubam unggum emberuk halug Allahn it inindi pikirap enebihi ulug inibil atuk.

³⁴It unubam unggum emberuk halug ap san kong tuk teg? Yesus Kristus ino nit fahet war atfag. War atfag angge famen Allahn olukap tibagma inggik pikit fil heriyeg lit nit ninibil atuk.

³⁵Kristus inowen indi nenesug lit nit men mangno roho weregma ap san minggit nenebuk teg? Siyag ane unubam atukon men, enekol toho werehon men, unusul ulug mug eneplug larukon men, enenggengge elehen suburu obok toho werehon men, eneliplip toho werehon men minggin tog men obog toho arimano weregma minggit nenebuk teg?

³⁶Haharehon hikit toho, ”Hat hunuk fahet nit nunusuhup ulug likiya hupmu neneliplip toho wereg lit wam domba waroho isag tahuk ulug enebug uruk hag toho nit nunubahet uruk,” ulug haharoho imbibag.

³⁷Aren nit indi nenesug lit weregma ihiyon obog toho ari fam nit apma am fug angge palimu welahe.

³⁸Anden tem toho peruk lahi ane tuma imin: War atuk ane onoluk wereg ane men, ap suwon poholma werehon men, kinangman suwon welahe perukon men, ketiya wereg ane fobik aruhu ane men,

³⁹inine rehon poholma kinangma werehon aben yet ha fug tohon men, Allahn mun angge man angge wal tibag angge men obog toho arimano menen Allahn Nonowe Yesus Kristus ino nit nim werehen indi nenesugmu mangno roho welaheyon minggit nenebuhu fug.