Read Angguruk Yali ROMA 9 Bible Online

ROMA 9 - Angguruk Yali bible

ROMA 9

¹An nele si uk fug angge Nowe Kristus inowen let naptukmu tem ane uruk lahi.

²Allah hime fanowon nubam weregma nahummu siyahen nindi anggin toho wenggel haruk lahi.

³An nori yuhon nununggul unuk misihon arimanowen Kristus fahet inindi anggar alepma an nil eleg atuk lit Kristus men nininggik kobog esele.

⁴An nori Israel inap arimano Allahn An numaliki ulug mumal enepfareg lehoma emberuk lit hit An numaliki weregma An Hinikni welaruhuk ulug sali watfag. Sali watfareg Musa wene fam ari turuk lamuhup ulug og isaruk lit Allah fam sembahyang uruk lamuhup ulug hiyag isibareg fobik fanowap henebuhuk ulug ele it unubam imbibag.

⁵It arimano niniknisi unumbasiyen indag enesuhon weregma Mesias oho iren ondohowon famen indag atfagma ap kinangmon atfag. At Allah ino wereg lit mun angge man angge At apma weregma ap obog tohowen At wel turuk lit eneg welamuhup. Amin.

⁶Allahn tam sali ibahon ari eleg am fug teg. Israel inaben indag enesuhon arimano obog toho fahet Israel ngi inap eneg uk fug teg.

⁷Abrahamen ondohowonen indag enesuhon obog toho fahet oho Abraham umalikisi eneg wereg uk fug teg angge famen Allahn Abraham hiyag utuk lit, ”Ishaken ondohowon fahet eneg hat humaliki uk teg,” ulug hiyag itfag.

⁸Hun Abraham ahaluwe fam indag enepfag angge famen it arimano obog toho Allah umaliki fug. Allahn sali ubam imbibahon inowen endetfahon eneg we tem Abrahamen ondohowon wereg ari uk teg ane ari seleg teg.

⁹Wene atam imbibahon fam Allahn sali imbibag ane tu, ”An waruhuk sambil Sara ap umalik indag tahureg weregma waruhuk.”

¹⁰Ihiyon tu famen we tot seleg teg angge famen hiyap Ribkan tibag ane ari fam mondabi seleg atmisi. Ribka ino ap misig ahun nit nunumba Ishak malik ahummu ribibag.

¹¹Piren umalik itano indag am fugmu siyag ane men fano ane men uwan tuk fugmu Allahn Ribka fam ele uruk lit, ”Malik indag enebuhunon uwan tuk fugmu itano atamon ino ot fobikon amingmingangge aruhu,” ulug hiyag itfag. Allahn teko lahu pibag ane hikit toho ininggik fam turukon fahet winahuk fug angge Allah indiyen wol tibag ane hikit toho misig eneg An namloho aruhu ulug mumal tibag.

¹³Mumal tibag ane hikit toho haharoho imbibahon tu, ”Yakub nindi reg lit Esau nirim teg lahi,” ulug haharoho imbibag.

¹⁴Ari roho weregma niren nungge ehe ha reg? Niren Allah indi siyahon wereg uk teg lahe ano? Eleg-o nori, ari uk fug teg lahe.

¹⁵Allahn Musa fam ele uruk lit, ”An nindi haruk lahiyon ino ubam nindi reg lahi. An nahiyeg peruk lahiyon ubam nahiyeg peruk lahi,” ulug hiyag itfag.

¹⁶Allah amloho atukon ari ap inggareg ino indimu wenggeltukon men ubabut fano ane turukon men fahet namloho puk fug anggeyen Allah indi haruk lit mumal tarukon fahet eneg namloho peruk.

¹⁷Allahn Firaun hiyag itfag ane fahet haharoho imbibahon tu, ”An nine roho welahiyon fahet ap iniline inam aruhumu An nunuk ap kinangmon obog toho werehonen suwap tukag ulug hat unduhuk hubaharikik.”

¹⁸Ap eke Allahn indi rohon ino indi anggarap turuk lit ap eke irim tohon ino indi sohuwa feseruk.

¹⁹Nare, ari ihiyon fahet haren an kapal niyaruk lit, ”Ari roho ehenma Allahn nungge fahet siyag ane nunubam umbuk teg? Allahn peruk ane ap san apmayap tuk teg?” uruk lahen.

²⁰Nare, Allah min suwahal imin peruk lahenon hat san peruk lahen? Ap inggik famen laltuk angge inowen laltuk ahun fam ele uruk lit, ”Nungge fahet aru hag toho lal nabehen?” ulug uk teg?

²¹Kinang laltuk ahun inowen kinang huluwon fam kubag lalmin peruk lit kinang misig tag tebelug kuroho fumag fam fano-fano angge emberukon fahet lalmin peruk lit fumag fam siyag-siyag angge kilaptukon fahet lalmin puk fug teg?

²²Nolok ane ap unubam unug hahukteg nine werehon ari inam aruhu ulug Allahn te kubag nirim perukon arimano halog toho hik isamin perisi angge famen indi imbik wamburuk lit fano roho foroho latisi.

²³Kubag winon fano roho lal eneptisiyon arimano nindiyen nalukema foroho laruhukmu mondabi lehoma welahiyon fahet aben onoluk amuhup.

²⁴Kubag fanowon ari hag toho nit Yahudi ninap oho Allah unuk enepeleg inap oho nit Aren wol neneptisi ninap arimano ari hag toho welahe.

²⁵Atam Allahn hun Hosea ino fam hiyag utukmu haharoho emberuk lit, ”An notsi fuhon famen notsi suwal enebuhuk, nindi reg elehon fam nindi hasug lahi uhuk.

²⁶An notsi welahep fug ulug hiyag isarusa ambeg inowen Allah oluk werehon umalikisi welahep ulug it unubam hiyag isahup.”

²⁷Ari hag toho Israel inap fahet Yesayan ele uruk lit, ”Israel inap umalikisi yinggi ik ayegma mondeg hag toho anggolo welahep angge famen we tor angge welamuhubon itano eneg fanowap enebuhuk.

²⁸Anden tuhuk ulug Ninikni Allah irisi hag toho folo-folo Aren kinangma ari roho mondabi tebuhu.”

²⁹Ihiyon ari hag toho Yesayan tam haharoho imbibahon tu, ”Ninikni Allah otsi sehelimu wereg ahun inowen nit nunumbusagsi winon embeselep fugmen hahen nit o Sodom Gomora hag toho siyag ala.”

³⁰Ari roho weregma niren nungge ehe ha reg? O pumbuk winon Allah unuk enepelehon arimanowen Allah men ininggik ahandip atuk ane yami ruruk latusa fug angge famen Allah men ininggik ahandip atusa. Inindi fam wenggel haruson ari famen Allah men ininggik ahandip atusa.

³¹Israel inap arimanowen Allah men nininggik ahandip amuhuk ulug tuk hag teg ane eneg yami ruruk latusa angge famen hiyaharusa fug.

³²Nungge fahet hiyaharusa fug? Inindimuwen Allah fam wenggel ha fug anggeyen nininggik fam tuk hag teg lahe peruk latusa ane ariyen hiyaharusa fug. Atam haharoho imbibahon hikit toho it arimanowen helep atogma unuyug ahap fele roho kik turusa.

³³Haharoho imbibahon tu, ”O Sion ino fam helep ayeg tohon eke yaho fuhukmu helep ino famen ap enembilan uwag fiyog toho unusuruk lit unuyug ahap fele roho kik turuk lit unusuhu. Ap san At ubam wenggel haruk halug at ino inggali hahu fug.”