Read Angguruk Yali 1 KORINTUS 10 Bible Online

1 KORINTUS 10 - Angguruk Yali bible

1 KORINTUS 10

¹Nori, hit honoluk toho welamuhuben anden eke hiyag hisamin. Niniknisi unumbasi obog toho hina apma laruk lit ik ahum pul-ke minggitfagma it obog toho ik fumag nindig atfag.

²It Israel inap Musa otsi amag ulug it ikma wamburuk hag toho hina men ik men fam it obog toho fanowap enepfag.

³It obog toho suburu Allahn og isarukon ambi roho naruk latfag.

⁴It obog toho ik oho Allahn og isarukon ambi roho naruk latfag. Helep Allahn hiyag isibahon ilmuwen ik wilip atfahon it naruk latfag. Helep ino famon ik nibahon ino Yesus Kristus it men ambiyeg laruk latfahon ino famon nibag.

⁵It obog toho ambi roho naruk latfag angge famen it winon anggolo fahet Allahn nirim pibahon arimano anggenman waroho lin ibag.

⁶Ihi ane obog toho aru nit obog toho nonoluk toho welamuhuken nit fahet wirimangge tibag. Iren siyag ane tul peruk latfag hag toho niren oho siyag ane tul peruk lamuhup tohon ulug wirimangge imbibag.

⁷It welatfahon winonen usane turuk latfag hag toho hiren oho ari turuk lamuhup fug. It fahet haharoho imbibahon tu imin, ”Ap arimano suburu men ik men nul ulug hur atfareg nenehiyeg toho welahe ulug yunggultul ulug in atuk latfag.”

⁸Iren pabi-pabi ane turuk latfag hag toho niren oho ari turuk lamuhuk fug. Iren turuk latfag ane ari famen hup misihim ap teng-teng angge 23.000 waroho lin ibag.

⁹It winonen Allah wal haruk latfag hag toho niren oho Kristus wal haruk lamuhuk fug, iren turuk latfag ane ari fahet pisanggowen fato eneptukmu waroho lin uruk latfag.

¹⁰It winonen enele siyag toho uruk lit Allah abug uruk latfag hag toho hiren oho Allah abug uruk lamuhup fug. Iren turuk latfag ane ari fahet Allahn amingmingangge unusimihin ulug monde fibahon inowen ouk unubam imbibagma waroho lin ibag.

¹¹Ihi ane obog toho aru nit fahet wirimangge it unubam atfagma nit nonoluk toho welamag ulug haharoho imbibag. Nit ketiya welaheyon te obog aruhu sambil horog toho welaheyon fahet haharoho imbibag.

¹²An nine roho unduhuk lahi peruk ahun ino mako wambuhu rohon inggareg indiyen fano roho kahaleg laruhu.

¹³Wal hisarukmu ketiya haruk lahebon ari ap inine elehap tuk fuhon seyon inowen eneg wal hisaruk. Allahn ibag ane pisan isa fug teg, hit hunumbahalug hinine elehap turuk lit wal hisahu fug. Mun ane man ane fam wal hisarukmu Aren hondoko wilip heneptukmu hit henemuwen senebuk teg lamuhup.

¹⁴Nori, anden nindi henesug lahiyon arimanowen usane turukon yanggaloho wili feseruk lamuhup.

¹⁵Anden uruk lahi ane ari inindi anggat teg lit werehon arimano unubam uruk lahi. Anden uruk lahi ane fahet hininggareg wenggel haruk latihip.

¹⁶Ik kubag fanowon seneg lit Allah Ninikni ulug sembahyang uruk lit naruk lahema Kristus amep men mangno atuk lahe fug? Suburu kuroho naruk laheyon ari Kristus ebe men mangno atuk lahe fug?

¹⁷Suburu misig weregma nit anggolo welahe angge famen nit obog toho suburu misig ino famen kuroho naruk lit nenebe misig atuk lahe.

¹⁸Israel inap Kristus apma wereg elehon yer esemek: Usa ambohom naruk inap arimano wam ino naruk lit usa ibam ino apma wereg eleg ano?

¹⁹Anden ihi ane tu nungge fahet ihi? Usa ambohom unu ino fahet usa ulug uruk lahi ano? Usa sum fahet usa ulug uruk lahi ano?

²⁰Eleg-o nori. Anden uruk lahiyon aru usane turuk inap arimanowen mungguwat siyahon fam eneg turuk lit Allah wel turuk eleg. Hiren mungguwat siyahon men mangno roho welahebon ari fahet an nirim peruk lahi.

²¹Nonowe amep naruk lit mungguwat siyahon amep na fug teg lahep. Nonowe ahaluwe naruk lit mungguwat siyahon ahaluwe na fug teg lahep.

²²Hiren Allah undama olokap tul peruk lahep? Nit ninine anggolo, At ine eleg peruk lahep?

²³”Mun ane man ane tuk teg lahe,” peruk lahep angge famen mun ane man ane turuk lit fano am fug teg. ”Mun ane man ane tuk teg lahe,” peruk lahep angge famen mun ane man ane turuk lit ineyap tuk fug teg.

²⁴Hit hininggareg henehiyeg toho welamul ulug yami ruk fug anggeyen nonori winon eneg enehiyeg toho welamag ulug yami ruruk lamuhup.

²⁵Wam pasarma onggo paltul ulug imbik kurukon arimano usa ulug hinindi angginen umung-umung am fug angge naruk lamuhup.

²⁶Ari fahet haharoho imbibahon tu, ”Kinang men mun angge man angge kinangma werehon obog toho men Ninikni Allahn eneg ngi reg.”

²⁷Ap wene holtuk eleg ahunen seni osoho felug hit wol heneptukmu lul peruk lamuhup halug lahupteg mun angge man angge hit fahet eseruhu angge usa ulug hinindi angginen umung-umung am fug angge saplangge naruk lamuhup.

²⁸Ap misihen, ”Tu usa ambohom,” ulug hiyag hisaruk halug na fug. At indi anggin aruhu rohon nahup fug.

²⁹Anden uruk lahi ane aru hit hininggareg hinindi anggin amag ulug hiyag hisaruk lahi fug, ap winonen yet hisahupteg inindi anggin amuhup tohon ulug na fug uruk lahi. Anden uruk lahi ane fahet ap ekeyen kapal niyaruk lit, ”Tuk hag teg lahi ane ari ap winon indi anggin aruhu rohon ulug nungge fahet embesemin?

³⁰Anden naruk angge fahet Allah fam sembahyang ulug ninggi ha reg angge famen ap winonen sembahyang uruk lahiyon fahet usa angge aru namihin ulug pet nabuk teg?” ari ulug an nubam kapal niyaruk.

³¹Ari ulug an nubam kapal niyarukmu anden hebeloho hiyag isaruk lit: Suburu men ik men naruk lir ano mun ane man ane turuk lir ano Allah eneg wel turuk lamuhup.

³²Yahudi inap men Yunani inap men wene holtuk inap arimano inindi anggin atuk lit siyag amuhup tohon hiren ari tuk fug.

³³Anden oho ap obog toho inindi fanowap enepmin ulug likiya hupmu yami ruruk lahi. Yami ruruk lahiyon ari ap anggolowen wene holuhupmu Allahn fanowap enebuhuwen ninggareg fahet yami ruk fug anggeyen ap winonen tohon palimu welaruhu ulug yami ruruk lahi.