Read Angguruk Yali 1 KORINTUS 11 Bible Online

1 KORINTUS 11 - Angguruk Yali bible

1 KORINTUS 11

¹An Kristus ombolim laruk lahi hag toho hir oho an nombolim laruk lamuhup.

²Anden wene hiyag hisaruk latikik ane fahet hiren honoluk toho wereg lit hikit toho turuk lahepma anden fano peruk lit wel heneptuk lahi.

³Honoluk toho welamuhup ulug alem misig tu hiyag hisamin: Hit ap wal taneg arimano Hinikni Kristus weregma hiyap wal taneg fahet iniknisi re enehunsi weregma Kristus Ikni oho Allah wereg.

⁴Ap obog toho ununggul asum wan teg lit sembahyang men wene men hiyag isarukon ariyen inggareg unggul siyahap turuk.

⁵Hiyap obog toho sum ununggulmu yanggulig eleg angge sembahyang men wene men hiyag isarukon ariyen ininggareg ununggul siyahap turuk. Ari roho turuk hiyap ino hiyap onoruk palehon hag toho wereg.

⁶Hiyap ekeyen sum unggulmu yangguluk fug angge laruk halug at ino oruk kong telepma fano. Oruk kong teg lit larukon fahet inggali ruruken sum unggulmu yangguloho larukmu fano.

⁷Allah lehoma wereg lit An nahuhe hag toho welamag ulug ap wal tibagma aben ununggul asum wan tuk fug angge larukmu fano. Hiyap werehon enehunsi enehuhe hag toho welamag ulug Allahn wal tibag.

⁸Ap hiyap famen wereg atfag fug, hiyap eneg te ap famen wereg atfag.

⁹Allahn te aben hiyap let turuk lamag ulug wal tibag fug, hiyaben ap let turuk lamag ulug wal tibag.

¹⁰Hiyaben tuk teg ane eneg turuk lahe ulug malaikat fahet sum enehangge ununggulmu yangguloho welamag.

¹¹Nonowe Yesus fam wenggel harukon arimanowen uheyen namu wirik toho welahi uk fug teg, ahunen oho namu wirik toho welahi uk fug teg.

¹²Hiyap ap famen wereg atfag hag toho ap hiyap famen indag atuk. Ari hag toho it arimano Allah famen eneg wereg atfag.

¹³Hininggareg wenggel hemek: Hiyaben Allah fam sembahyang uruk lit sum unggulmu yangguluk fug angge weregma fano peruk lahep?

¹⁴Ap oruk yaron kong tuk fug angge wereg halug siyahon apma welahi ulug inggali hawag. Ihi ane ari mun angge man angge kinangma werehon hiren yet haruk lahepma seleg atuk eleg?

¹⁵Hiyap onoruk yat toho werehon arimano fahet hiren yer isalug wel eneptuk lahep fug? Oruken unggul hililip tukag ulug og isibag fug?

¹⁶Ap ekeyen suwahal imin peruk halug nit men Allah wene holtuk inap menen suwahal ul fug peruk lahe ane ari at oluk amag.

¹⁷Hiren alem eke hag eke hag turuk lahebon fahet anden komo heneptuk lit wel heneptuk lahi fug. Hit palu ruruk lit wene uruk lahep ambehen alem fanowon emberuk lahep fugmu siyahon eneg hunubam waharuk.

¹⁸Hit wene holtuk inap hag toho palu ruruk lahep angge famen henebe minggiroho welahebon ari fahet atam holtikik. Holtikikon ari tem toho urusa peruk lahi.

¹⁹Hit minggiroho welahebon ari fahet hinindi wirik toho wereg ano ulug wal hisahuwon fahet fano peruk lahi.

²⁰Hit palu ruruk lahebon ari Yesus ebe men amep men fano roho nul ulug palu ruruk lahep fug.

²¹Ahaluwe nul ulug palu ruruk lahebon arimanowen ap ekeyen asuburu anggolo nalug ahum ouken nenek turukmu ap eke suburu hinik toho wereg.

²²Hit hinibam suburu men ik men naruk ambeg wal taneg wereg eleg? Allah umalikisi wene holtuk inap siyahap eneptuk lit enengge ininggikmu elehon ininggaliyap enebul peruk lahep? Ari fahet anden hit hunubam nungge ihi ha reg? Wel nenepmisi peruk lahep angge famen anden wel henebuk fug teg lahi.

²³An noweyen hiyag nitisiyon anden hit tam hiyag hisaruk latikikon tu imin: Nonowe Yesus wabul ulug senetfag sambil ino o hup atfagma suburu wibag.

²⁴Wibareg seneg lit sembahyang ibareg kut-kut otsi og isaruk lit, ”An nebe tu hit fahet og hisamin. An nubam wenggel niyaruk lit aru hag toho turuk lamuhuben naruk lamuhup,” ibag.

²⁵Ari ibagma suburu nibagma ik kubag wibareg hinang isaruk lit, ”Kubag aru wene keron werehen Allahn sali imbibahon hikit toho teko lawag ulug namep inam atuk. Ik aru naruk sambil ino An wenggel niyahuben naruk lamuhup,” ibag.

²⁶Suburu aru men ik kubag aru men naruk lit Nonowe Yesus nit fahet war atfag ulug ap hiyag isaruk lahep, we At fobik waruhu sambil eneg umbusuhup.

²⁷Ap san Nonoweyen telep fug peruk ane turuk lit suburu men ik men naruk halug at inowen Nonowe ebe men amep men unubam siyag ane turuk.

²⁸Ari fahet hit ap misig-misig wal tanehen hit hininggareg hinindimu wenggel haruk lamuhupteg eneg suburu men ik men naruk lamuhup.

²⁹Ap san Kristus ebe men mangno roho welahi ulug indimuwen wenggel ha fug anggeyen suburu men ik men naruk halug inggarehen alem siyahon ubam umbat taruk.

³⁰Ari fahet ap hit sehelimuwon arimano inine elehon men ouk warukon men anggolo werehen winon war atusa.

³¹Nit nininggarehen ninindi wenggel haruk lalaman alem siyahon nunubam alep fug.

³²Ninikni Allahn alem nunubam emberukon ariyen nit komo neneptuk. Ap kinangmon unubam alem werehon Aren kong tuhu sambil nit nunubam aruhu rohon ulug komo neneptuk.

³³Nori, suburu men ik men nul ulug palu amuhup ambehen honori winon mangno isaruk lamuhup.

³⁴Ap eke suburu obok toho wereg halug ibamen tam naruk lamag. Hininggarehen alem nunubam umbat tul ulug palu atuk lamuhup fug. Alem winon werehon an waruhuk sambil hal henebik waruhuk.