Read Angguruk Yali 1 KORINTUS 12 Bible Online

1 KORINTUS 12 - Angguruk Yali bible

1 KORINTUS 12

¹Nori, Allah hime fanowon inowen nit og nisaruk angge hit honoluk teg lalep peruk lahi.

²Indam Allah unuk henepeleg toho weregma usangge ele uruk eleg angge arimanowen hininggik lisoho hunumbaharukmu hinindi wenggel ha fug angge welatikip.

³Ari roho welatikip hinap hiyag hisaruk lahiyon tu: Ap sa Allah hime fanowon ubam werehon inowen Yesus war amag ulug huluwap tuk fug teg. Ap sa Allah hime fanowon ubam wereg elehonen, ”Yesus Nikni tem toho wereg,” ulug fag toho uk fug teg.

⁴Allah hime fanowon inowen nit og nisaruk angge eke hag eke hag wereg angge famen Allah hime fanowon ino we misig wereg.

⁵Allah amingmingangge iniyabuk eke hag eke hag wereg angge famen Inikni Allah misig iyabuk eneg turuk.

⁶Allah umalikisiyen inine roho senetuk ane ari eke hag eke hag senetuk angge famen Allah misihen eneg ap inineyap eneptuk lit mun ane man ane turuk.

⁷Ap obog toho mangno roho wereg lit inine roho welamag ulug Allah hime fanowon inowen wal taneg eke hag eke hag og isaruk.

⁸Allah hime fanowon inowen ap misig fam hindimu fuki roho wenggel haruk ane hubam weregma ap hiyag isaruk laruhun ulug ubam emberuk. Hime fanowon misig inowen ap eke fam mun ane man ane alem holuk ane hubam weregma ap hiyag isaruk laruhun ulug ubam emberuk.

⁹Ap eke fam hime fanowon misig inowen tem toho wenggel haruk ane og utuk. Ap eke fam hime fanowon misig inowen ouk warukon hihir eneptuk ane hiyag utuk lit

¹⁰ap eke fam poholmonen turuk ane ubam emberuk. Ap eke fam fuluwap turuk ane ubam emberuk lit ap eke fam hime fanowon men siyahon men haltuk ane ubam emberuk. Ap eke fam ele alem haleg elehon uruk ane ubam emberuk lit ap eke fam ele ino hebeltuk ane ubam emberuk.

¹¹Obog toho aru Allah hime fanowon misig ambi rohon inowen hiyag isaruk lit inggareg indiyen ap wal taneg eke hag eke hag hiyag isaruk.

¹²Ebe abirangge misig wereg angge famen inggik uyug wal taneg weregma inggik uyug arimanowet mangno roho ebe misig wereg hag toho Kristus wereg.

¹³Nit obog toho Yahudi ninap men Yunani ninap men ap enemingmingangge roho werehon men ap enemingmingangge roho wereg elehon men nenebe misig hag toho welamuhup ulug ikma pilap neneptusama Allah hime fanowon misig fam ahaluwe naruk lahe.

¹⁴Inggik uyug hariya regma ebe tu wereg uk fug teg, inggik uyug abirangge weregma eneg ebe tu wereg uk teg.

¹⁵Uyug amuwen ele uruk lit, ”An inggik welahi fureg ebe fam wilibig lahi fug,” elep angge famen ebe fam tem toho wilibig eleg?

¹⁶Isanggo amuwen ele uruk lit, ”An il welahi fureg ebe fam wilibig lahi fug,” elep angge famen ebe fam tem toho wilibig eleg?

¹⁷Ebe obog toho il eneg welalepma nangginoho holtuk lalep? Ebe obog toho isanggo eneg lalepma nangginoho amben paltuk lalep?

¹⁸Ari fahet te Allah inggareg indiyen pibareg ebe fam wereg angge wal taneg imbibag.

¹⁹Ebe fam wereg angge we misig fam mangno relepma hahen ebe nungge welalep?

²⁰Ebe fam wereg angge wal taneg anggolo weregma ebe we misig wereg.

²¹Il amuwen inggik fam ele uruk lit, ”An hat elegma namu unduhuk lahi,” uk fug teg. Unggul amuwen uyug fam ele uruk lit, ”An hat elegma namu unduhuk lahi,” uk fug teg.

²²Ebe fam wereg angge misig mondabi ine elehon wereg peruk angge famen mondabi palimu weregma sehet tehon eneg wereg.

²³Nunubam werehon fahet siyag angge peruk lahe angge famen lehoma emberuk lit wel turuk lahe. Nunubam werehon ininggali reg peruk angge famen ar oho alem eke fahet werehen palimuwap turuk lit wel turuk lahe.

²⁴Nunubam wereg angge fahet fanowon wereg ulug wel tuk fug teg lahe. Ap unubam wereg angge aben siyag perukon Allahn ebe fam ahandip turuk lit palimuwap tibag.

²⁵Palimuwap tibag angge ari amu-amu wereg angge famen it-it hili roho welamuhup fug ulug let-ler atuk lamuhup ulug mangnowap tibag.

²⁶Ari hag toho ebe ubam werehon arimano misig ouk turuk halug ebe obog toho ouk atuk. Ebe ubam werehon misig palimu emberuk halug it obog toho enehiyeg haruk.

²⁷Hit obog toho Kristus ebe weregma henebe wal taneg At inggik uyug hag toho welahep.

²⁸Allah wene holtuk inap sehelimu ap winon in eneptisi. Inggik sehelet misig yonggo laruk lamuhup ulug mon eneptuk inap in eneptisi, pirenehon te fobik aruhu ane fahet hiyag isaruk inap, hinahanehon te milal eneptuk inap in eneptisi. In eneptisiyon arimano winonen inine roho turuk lamuhup, winonen ap ouk warukon hihir eneptuk lamuhup, winonen ap ler eneptuk lamuhup, winonen fer enesug lamuhup, winonen enele alem haleg eleg toho uruk lamuhup ulug in eneptisi.

²⁹It obog toho werehon arimano mon eneptuk inap eneg wereg ano? Fobik teko lahu ane onoluk inap eneg wereg ano? Milal eneptuk inap eneg wereg ano? It obog toho inine roho turuk lamuhup ulug Allahn unubam emberisi?

³⁰Ap hihir eneptuk ane men ele alem haleg elehon uruk ane men ele ino hebeltuk ane men turuk lamuhup ulug it obog toho unubam emberisi?

³¹Allah hime fanowon inowen nit anggolo og nisaruk angge famen we palimu werehon eneg yami ruruk lamuhup. Funggalem mondabi fanowon misig hiyag hisamin.