Read Angguruk Yali 1 KORINTUS 13 Bible Online

1 KORINTUS 13 - Angguruk Yali bible

1 KORINTUS 13

¹Wene hiyag isaruk lit ap enele inine roho uruk hag toho uruk lahi angge famen ap nindi isa fug angge welaruhuk halug pinggong selelem turuk hag toho uruk laruhuk. Malaikat ele ine roho uruk hag toho hiyag isaruk lahi angge famen ap nindi isa fug angge welaruhuk halug waruk ele siyahon hag toho uruk laruhuk.

²Mapmumu werehon obog toho noluk teg lit fobik teko lahu ane hiyag isaruk lahi angge famen ap nindi isa fug angge welaruhuk halug an siyahon hag toho welaruhuk. Allah fam wenggel haruk lit tom eke fam, ”In atmihinteg hik toho lag,” uk teg lahi angge famen ap nindi isa fug angge welaruhuk halug yuhun angge noluk welaruhuk.

³Anden angge obog toho ap enengge elehon og isaruk lahi angge famen aben nebe waroho indokma hik niyahupmu fano nuwatuk puhuk angge famen ap nindi isa fug angge welaruhuk halug Allahn onggo og nuruhu fug.

⁴Ap indi enesug ane ariyen indi hondo reberuk lit ubabut fano roho wereg. At ino ahummu siyag am fug anggeyen hemet turuk lit awelwel tubat taruk eleg.

⁵At ino inggareg fahet wenggel ha fug anggeyen ap winon oho ininggaliyap eneptuk eleg. At ino suwahal uk fug anggeyen ubam aben siyag ane turukon fahet undama het toho foroho lam fug angge wereg.

⁶At inowen siyag ane turukon fahet nirim peruk lit fano ane turukon fahet nahiyeg peruk.

⁷Aben siyag ane tirikim fano ane tirikim at inowen hondo rebeseruk. Siyag ane urukon fano ane urukon fahet tem toho eneg peruk. Siyag ane turukon fano ane turukon fano aruhu ulug indi se roho wereg. Siyag ane tirikim fano ane tirikim indi imbik wamburuk.

⁸Fobik teko lahu ane fahet hiyag isarukon men enele alem haloho uk fug angge urukon men mun ane man ane alem onolukon men eleg aruhu angge famen ap indi enesug ane ari eneg mondabi eleg aruhu fug.

⁹Mun ane man ane ondomi eneg nonoluk angge famen alem nenepeleg. Fobik teko lahu ane fahet ondomi fil hiyag isaruk lahe angge famen alem nenepeleg.

¹⁰Alem ino inam atuk halug ondomi fil nonolukon ino mondabi eleg aruhu.

¹¹An nebe totma wereg lit malik toronen uruk hag toho nele uruk latikik, malik toronen wenggeltuk hag toho nindimu ebet harikik, malik toronen wenggeltuk hag toho wenggel harikik. Ketiya ninggareg su atikikteg totma wenggel haruk latikik ane embeserikik.

¹²Ketiya ik il kul tegma nonorohole siyag toho yet haruk lahe angge famen fobik ik il wirik atukmu yet haruk hag toho nonorohole ambimu weregma yet haruk lamuhuk. Ketiya mapmumu weregma yet haruk hag toho tot-tot yet haruk lahe angge famen fobik inam aruhumu Allahn an nebe yet niyaruk hag toho At ebe abirangge yet hahuk.

¹³Ihiyon ari hag toho alem hinahan eneg welamuhup: Ninindi fam Allah wenggel haruk ane ari men, fano aruhu ulug ninindi se roho wereg ane ari men, ap ninindi enesug ane ari men welamuhup angge famen ap inindi enesug ane ari eneg mondabi palimu wereg.