Read Angguruk Yali 1 KORINTUS 14 Bible Online

1 KORINTUS 14 - Angguruk Yali bible

1 KORINTUS 14

¹Ap hinindi enesug ane mutug laruk lit Allah hime fanowon inowen nit og nisaruk angge yami ruruk lamuhup. Fobik teko lahu ane ap hiyag isa reg lamuhuben atam yami ruruk lamuhup.

²Ele alem haloho uk fug angge uruk ahun inowen ap unubam ele uruk eleg, Allah ubam ele uruk. Ap unubam imin peruk angge famen ap misihen oho holuk fug teg, Allahn eneg holtuk. Allah hime fanowon inowen at hiyag utukmu alem hirako werehon eneg uruk.

³Fobik teko lahu ane ap hiyag isaruk ahun inowen ap unubam urukmu iren ele holtuk. Aren ap komo enebeheg inineyap enebeheg turukmu inindi se atuk.

⁴Ele alem haleg eleg angge uruk ahun inowen inggareg fahet eneg ineyap taruk, fobik teko lahu ane ap hiyag isaruk ahunen ap winon wene holtuk inap inineyap eneptuk.

⁵Hit obog tohowen henele alem haleg eleg angge uk teg lalepma fano peruk lahi angge famen hit obog tohowen fobik teko lahu ane ap hiyag isa reg lalepma mondabi fano anggolo pelereg nahiyeg hele. Enele alem haleg elehon uruk ane apma reg, fobik teko lahu ane hiyag isarukon palimu reg. Enele alem haleg elehon hebeltukmu eneg pikit toho holtuk lit wene holtuk inap inindi wirik aruhu.

⁶Nori, an hit henembeg walereg nele alem haleg elehon eleman halug hiren holtep ano? Mapmu reg lit werehon Allahn inamap nutuk lit nolukap tirisi ane men fobik teko lahu ane men hiyag hesele fugmu henelong alep fug.

⁷Ari hag toho aben foroho angge ele uruk angge famen ahime eleg angge pinggong men puhuli men fam aben wirim tuk teg. Pinggong men puhuli men enele amu-amu elep fugmu aben tu pinggong ele, tu puhuli ele ulug nangginoho onoluk alep?

⁸Waruk ap wol eneptuk angge ele siyag turuk halug ap san tog abul ulug sehen inggila saloho sing wan toho tug tebelug welam teg?

⁹Hit henele alem haleg eleg angge uruk lit ari hag toho turuk lahep. Henele seleg toho uruk lahep fugmu nangginoho ap winonen henele holtuk lit onoluk aruhu? Hiren henele uruk lahebon saplangge uruk lahepma homhomowen walug laruk.

¹⁰Kinang atogman atogma ap enele urukon anggolo eke hag eke hag wereg angge famen misig oho aben alem haluk fug tohon wereg eleg.

¹¹Anden ele urukon ino fahet an napelehen alem haluk fug teg lahi halug anden at ino ele holuk fug tehen at amuwen ele yig tawag ulug embeselug namu welahimu ar oho amu wereg.

¹²Ari hag toho hit welahebonen oho turuk lamuhup: Allah hime fanowon inowen mun ane man ane og nisahu angge yami ruruk lahep. Aren og nisahu ulug yami ruruk lahebon arimano fam wene holtuk inap komo eneptuk lit inineyap eneptuk lamuhup. Inineyap eneptuk lamuhupmu hit sehelimu oho eleg angge welaruhu fug.

¹³Ap san ele alem haleg eleg angge uruk halug ele hebeloho uruk ane fahet heng turuk lit sembahyang uruk laruhu.

¹⁴Anden sembahyang uruk lit nele alem haleg elehon uruk lahi halug nindimu fuki roho wenggel haruk lahi fugmu nahimeyen eneg ele uruk.

¹⁵Ari roho werehen nungge ane turuk laruhuk? Anden sembahyang uruk lit nahimeyen oho urukmu nindiyen oho tem toho wenggel halug uruk laruhuk. Allah sini yunggultuk lit nahimeyen oho urukmu nindiyen oho wenggel halug sini uruk laruhuk.

¹⁶Haren sembahyang urukmu hahimeyen eneg uruk halug ap holtukon arimanowen hat sembahyang urukon fahet tem toho ulug nangginoho ”Amin” uhup? Uhun ane ari ap arimanowen hol ha fug anggeyen nangginoho ”Amin” uk teg?

¹⁷Haren sembahyang uruk lahenon fano roho Allah wel turuk lahen angge famen ap winon inineyap eneptuk lahen fug.

¹⁸Hit obog toho henele alem haleg elehon fam tot uruk lahepma anden anggolo roho uruk nahun welahi ulug Nikni Allah wel turuk lahi.

¹⁹Nele alem haleg elehon anggolo roho uruk nahun welahi angge famen wene holtuk inap palu roho wereg ambehen it wenggel hawag ulug nele alem fuwaben aben holtuk lit wenggel ha rehon eneg urukon fano peruk lahi. Enele alem haleg elehon teng-teng angge yat anggolo roho urukon fahet siyag peruk lahi.

²⁰Nori, hinindimu wenggel haruk lit malik toronen wenggeltuk hag toho wenggeltuk lamuhup fug. Siyag ane turukon fahet malik toronen siyag ane tuk fug angge wereg hag toho welamuhup. Hinindi wenggel haruk ane fahet ap suwonen wenggeltuk hag toho wenggeltuk lamuhup.

²¹Wene atamon fam haharoho imbibahon tu, ”Allahn ele uruk lit, ’O pumbuk aru inap fam hiyag isawag ulug ap winon enele enemu uruk inap unubam nele emberuk lahi. Ap pohonen enembilik fam hiyag isawag ulug mon eneptuk lahi angge famen iren An nele holtuk eleg,’ ulug Allahn ele uruk.”

²²Ele alem haleg elehon uruk ane ari ap wene onoluk inap fahet fug, enepeleg inap fahet enehangge Allahn emberisi. Fobik teko lahuwon fahet hiyag isaruk ane ap wene enepeleg inap fahet fug, onoluk inap fahet enehangge emberisi.

²³Allah wene onoluk inap palu roho wereg lit obog toho enele alem haleg eleg angge urukmu ap selmon Allah fam wenggel haruk eleg inap kik waharuk lit hit fahet nenek turuk lahep ano ulug unubam uk fug teg?

²⁴Hit obog toho fobik teko lahuwon fahet urukmu ap keron Allah fam wenggel haruk eleg ahun kik waruhureg holeg lit tem toho uruk puk fug teg? Siyag ane ubam werehon hiren fag turuk halug

²⁵indimu hirako werehon ari inam aruhu. Inam aruhumu at inowen elenggen fam hur atuk lit, ”Allah tem toho hit sehelimu wereg,” uruk lit Allah wel turuk laruhu.

²⁶Nori, ari fahet ketiya nangginoho turuk lamuhuk? Hiren wene ul ulug palu roho wereg lit henebe wal tanehen wene uruk lit ap misihen Mazmur wene urukmu winonen komo eneptuk ane, winonen Allahn ele ubam emberisi ane, winonen ele alem haleg elehon uruk ane, winonen ele ino hebeltuk ane uruk lamuhubon obog toho ari honori inineyap enebul ulug uruk lamuhup.

²⁷Enele alem haleg elehon uruk halug ap pirenen ano enebe anggolo halug hinahanen eneg enebe misig-misig wal tanehen urukmu enele hebeltuk ahun eke welaruhu.

²⁸Hebeltuk ahun eleg halug wene holtuk inap palu roho wereg ambehen it arimano enele eleg angge welamuhup, enemu wereg lit eneg Allah amuwen eneg holukag ulug uruk lamuhup.

²⁹Fobik teko lahu ane fahet hiyag isaruk inap piren hinahan eneg it sehelimu in atug hiyag isarukmu it winonen aluwar isaruk lit enele atog hol haruk lamuhup.

³⁰Ap misig heriyeg lit werehon ino fam Allahn ari-ari imihin ulug ele ubam emberuk halug at ino in aruhureg hiyag isarukmu ap atam hiyag isarukon ino ele eleg angge welaruhu.

³¹Hit obog toho wal taneg misig-misihen wene hiyag isarukmu hit hinindi obog toho anggar atuk lit hinine aruhu.

³²Allahn fulu ane turukon og isarukmu it og isaruk inap arimanowen enemu ane uk fug teg.

³³Ap misihen ele lahaptuk halug it winonen enele pulung-palang urukon Allahn irim teg lit wereg, hit honori men mangno roho welamuhubon ari eneg fano peruk lit wereg.

³⁴O pumbuk obog toho wene holtuk inap hiyag isaruk lahimu wereg hag toho hir oho wene ul ulug palu roho weregma hiyaben enele eleg angge welamuhup. It hiyap arimano unubam wene hiyag nisalihiben in amek uk fug teg. Musa wene fam haharoho wereg hag toho it apma heriyeg lit welamuhup.

³⁵Iren alem eke fahet ap unubam kapal usul peruk halug inibam lahupteg enehunsi fam kapal isaruk lamuhup. Ap wene fahet palu roho wereg ambehen hiyaben enele anggolo roho uk fug teg.

³⁶Wene hiyag isaruk ane ari hit Korintus hinap wereg ambehen alem wilip atisi ano? Hit wereg ambeg eneg wene ino waharisi ano?

³⁷Ap ekeyen Allah hime fanowon inowen hiyag nutukmu fobik teko lahu ane fahet noluk teg lahi peruk ahun inowen fuki roho wenggel haruk halug an nubam Ninikni Allahn hiyag nutuk ane haharoho emberuk lahiyon at ino indi anggar atuk lit oluk atuk.

³⁸Anden haharoho emberuk lahi ane fahet indi anggar atuk eleg halug hiren oho at fahet hinindi wenggel ha fug.

³⁹Nori, ari fahet fobik teko lahu ane nonoluk amag ulug yami ruruk lit enele alem haleg elehon uruk inap men hili ruk fug.

⁴⁰Mun angge man angge fahet henele fano roho uruk lit tul peruk ane hikit toho turuk lamuhup.