Read Angguruk Yali 1 KORINTUS 15 Bible Online

1 KORINTUS 15 - Angguruk Yali bible

1 KORINTUS 15

¹Nori, wene fanowon anden hiyag hisarikikmu hiren holtikibon ino fam hinine roho unduhuk lahebon ari fahet ketiya nin honolukap henepmin.

²Wene ari hininggik kobog isa fug anggeyen hinine roho senetuk lamuhupmu anden hiyag hisarikikon ino hag toho wene ino fam mondabi fano amuhup. Alem elegman amu ane fahet wenggel helep halug mondabi siyag alep.

³Wene palimu werehon an hiyag nutusama ninggikmu atisi hag toho hir oho hininggikmu amag ulug anden hiyag hisarikik. Ihi ane aru atam haharoho imbibahon hikit toho Kristus ino siyag ane niren turukon fahet war atfag.

⁴Atam haharoho imbibahon hikit toho kinangma sale fisibagma inggik hinahaneg angge olukap tibag.

⁵Olukap tibagma Kefas iline atam inam atfareg fobik otsi nisanggowen iniline inam atfag.

⁶It iniline inam atfareg otsi winon teng-teng angge 500 palu roho weregma iniline inam atfag. It iniline inam atfag inap arimano ketiya obog toho onoluk weregma we tor angge eneg war atusa.

⁷Ariyen nin fobik Yakobus iline inam atfareg fobik wene fahet mon enepfag inap arimano iniline oho inam atfag.

⁸Fobik fotog-fotogma an malik uwan angge indag atukon hag toho weregma an niline inam atisi.

⁹Anden Allah umalikisi wene holtuk inap unusimin ulug mug eneplug laruk latikikon fahet it wene fahet mon enepfag inap arimano palimu weregma an siyahon it enepma welahi.

¹⁰Allahn an fahet indi niyarisimu an welahiyon ari hag toho ketiya oho an welahi. An Allahn indi niyarisireg og nitisiyon ari saplangge og nitisi fug, hebeloho anden yabuk wituk lit nine roho wituk lahimu it winon obog toho arimanowen witukon men ambi reg eleg. Yabuk wituk lahiyon ari an namu wituk lahi fug, Allahn an fahet indi niyarisireg nineyap naptisimu wituk lahi.

¹¹Ari fahet iret andet hiyag hisaruk lahema hiren oho holtuk lit hinindi wenggel haruk lahep.

¹²Niren Kristus ap warehon wereg ambehen Allahn olukap tibag ulug hiyag hisaruk laheman hit winonen te ap warehon fobik onoluk amuhup fug uruk lahep ane ari nangginoho uruk lahep?

¹³Ap warehon onoluk amuhup fug halug Kristus oho oluk atfag fug.

¹⁴Allahn Kristus olukap telep fugmu niren wene hiyag hisaruk laheyon oho saplangge uruk lalaman hahen hiren hinindi wenggel haruk lahebon oho saplangge wenggel haruk lalep.

¹⁵Niren Kristus fahet Allahn olukap tibag uruk laheyon olukap telep fugmu hahen hiren enele si uruk pelep. Ap warehon oho tem toho onoluk amuhup fug halug Allah olohotman oho niren si ane uruk lala.

¹⁶Tem toho Allahn ap warehon onolukap enebuhu fug halug Kristus oho olukap tibag fug.

¹⁷Kristus oho Allahn olukap telep fug halug hit hinindimu saplangge wenggel haruk lalebon ari fam siyahon sehelimu hit welalep.

¹⁸Ari hag toho Kristus fam wenggel haruk inap tam war atuson arimano oho mondabi siyag alep.

¹⁹Nit ketiya nonoluk welahe li ariya eneg Kristus inowen fanowap nenebuhu ulug wenggel haruk lamuhuk halug nit ap kinangmon enepma wereg lit ninilaheg toho welamuhuk.

²⁰Ari reg angge famen Kristus ino ap warehon wereg ambehen Allahn olukap tibag ane ari ap war atuson arimano Onowe wandabon amag ulug atam olukap tibag.

²¹Ap misihen tibahon famen ap kinangmon war atuk ane inam atfag hag toho ketiya oho ap misihen tibahon famen ap war atuson onoluk amuhup.

²²Ap obog toho Adam men sebe roho weregma war atuk hag toho ap obog toho Kristus men mangno roho werehon ariyen onoluk amuhup.

²³Ap wal taneg atam waharukon fobik waharukon hikit toho onolukap enebuhu: Kristus ino wandabon hag toho weregma At waruhu sambil At ngi roho welamuhubon arimano pulmuwon hag toho welamuhup.

²⁴Fobik mun angge man angge obog toho teko lahu. Kinangman palimu welahe perukon men ninine roho seneg lahe perukon men enele palimu werehon men obog toho arimano siyahap enebuhureg Aren inggikmu senehon Ikni Allah og uruhu.

²⁵At ino Onowe wereg lit poholet kinanget Aren eneg seneg lit weregma At men seli roho werehon Allahn uyug alma umbusuhu sambil eneg inggik kobog isahu.

²⁶War atuk ane ino men Allah men seli roho werehon ino obog aruhu sambil Allahn elehap tuhu.

²⁷Mun angge man angge Allahn Kristus uyug alma emberisi. ”Mun angge man angge Allahn uyug alma emberisi,” ulug hahareg lit werehon ariyen Allahn mun angge man angge Kristus uyug alma emberisi ahun inggareg At uyug alma atisi fug ane ari seleg teg.

²⁸Mun angge man angge Kristus apma emberisi halug At amloho yuhon wereg angge re inggarehen Ikni apmayap tahu. Mun angge man angge An nuyug alma emberisi ulug ninggareg oho At apma welaruhuk puhumu mun angge man angge alem Allah fam weregma Aren senetuk laruhu.

²⁹Ihi ane aru ambi reg eleg halug ap winonen ap war atuson unubalma ikma wamburukon arimano nungge fahet ikma wamburuk? Ap war atuson tem toho onoluk amuhup fug halug nungge fahet ap war atukon ubalmangge ikma wambila peruk?

³⁰Nir oho nungge fahet likiya hupmu war amuhuk ulug nenemelmel toho welahe?

³¹Nori, likiya hupmu an nuwabuk hag ane turukmu welahi. Welahi angge famen hiren Nonowe Yesus Kristus fam tem toho wenggel haruk lahepma nindimu nahiyeg haruk lit fano nuwabukag peruk lahi.

³²O Efesusen olomene olokonen nuwabuk oho turukmu yik aptuk lit unusimin ulug tirikik. Tirikik ane ari ap kinangmonen peruk ane fam tirikik halug nalong aruhuk ulug uruk lahi fug. Ap war atuson onoluk amuhup fug halug aben uruk ane hikit toho peruk lamul, ”Nori, nir oho sono war amuhukon horog tehen suburu men ik men naruk lit nenehiyeg toho welamulen maniyek.”

³³Enele si uruk inaben hinindi ninap henebuhup tohon enele holuk fug. Ket-ker ane turuk inap men hininggik ahandip toho welamuhup halug fano ane hunubam werehon siyag aruhu.

³⁴Siyag ane turuk lahebon ari embeselug hinil wirik toho wereg lit siyag ane nin eke tuk fug. Hit winon Allah henepeleg toho welahepma anden komo heneptuk lahiyon ari fam hininggali homok.

³⁵”Ap war atuson nangginoho nin onoluk amuhup? Enebe nin nanggin amuhupteg suhuloho wamuhup?” ulug ap winonen an kapal niyahup lit teg.

³⁶Nare, hat hindi sohu reg lahen hahun hubam nele imin. Nare, haren mun angge man angge yabukmu yatuk lahenon ari ahap selmon filik tulug eneg anggen undamon fam fahaltuk.

³⁷Anggen yabukmu yatuk lahenon ari ebe wereg am fugmen nin fiyaloho nahuk ulug yatuk lahen fug. Anggen yatuk lahenon arimano ahap embeselug tu ei ulug sinali anggen men anggen winon oho yatuk lahen.

³⁸Allahn wilip amag perukon hikit toho eneg wilip atuk: Anggen wal taneg werehon arimano ebe oho wal taneg og isaruk.

³⁹Ari hag toho ununu wereg angge arimano ambi reg eleg. Ap unu men wam unu men ambi reg elegma suwe unu men tamahu unu men ambi reg eleg.

⁴⁰Poholma wereg angge oho kinangma wereg angge oho amu-amu wereg. Poholma umbagpag turukon kinangma umbagpag turukon amu-amu wereg.

⁴¹Mo asinandi winon, pikalem asinandi winon, suhal asinandi oho winon, suhal oho asinandi wal taneg wereg.

⁴²Ap war atuson onoluk amuhup ane ihiyon ari hag toho aruhu. Niren yatuk lahe angge arimano filik turuk angge famen Allahn olukap tuhumu filik tuhu fug.

⁴³Niren yatuk angge arimano mondabi apma aruhu angge famen Allahn olukap tuhumu mondabi palimu aruhu. Niren yatuk angge arimano ine eleg aruhu angge famen Allahn olukap tuhumu ine anggolo aruhu.

⁴⁴Niren yatuk laheyon aruma ebe ilamna werehon yatuk lahe angge famen Allahn olukap tuhuwon ino ebe mondabi oluk welaruhuwon olukap tuhu. Ebe ilamna werehon wereg halug ebe mondabi welaruhuwon oho wereg.

⁴⁵Ihi ane ari fahet haharoho imbibahon tu wereg: Ap atamon Adam ino fam hime kilapfagma oluk atfag angge famen Adam fobikon ino Allah hime fanowon ap onolukap eneptukon ino atfag.

⁴⁶Atam watfahon ari mondabi werehon watfag fug, we ilamna werehon watfag. Fobik watfahon ari mondabi werehon watfag.

⁴⁷Ap atamon ari we kinang famen werehap tibagma ubabut kinangmon hag toho welatfag. Ap fobikon ino pohol filen wambik watfag.

⁴⁸Ap kinangmon arimano ap atamon kinang famen lalfahon ino ubabut fam eneg weregma ap poholmon arimano At pohol filen wambik watfahon ino ubabut fam wereg.

⁴⁹Ketiya kinangmon ahuhe welahereg fobik poholmon ahuhe amuhuk.

⁵⁰Nori, anden hit hunubam iminon tu: Nenehap selmon tor angge oho Allah ibam kuk fug teg. Filik turuk angge nin atuk lit filik turuk eleg angge am fug teg.

⁵¹Map toho werehon anden tem toho hit hunubam fag timin: Nit obog toho war amuhuk fug angge famen pinggong ele obog-obohon uhu sambil ino ninil misihim lambog uhupmu obog toho nin amuhuk. Pinggong ino ele uhumu ap war atuson arimano onoluk atuk lit enehap siyag teg eleg angge in amuhupmu nit obog toho nin amuhuk.

⁵²

⁵³Filik turuk angge werehon aru ubalma filik turuk eleg angge aruhu, war atuk angge werehon aru ubalma war atuk eleg angge aruhu.

⁵⁴Filik turuk angge werehon aru ubalma filik turuk eleg angge aruhumu war atuk angge werehon aru ubalma war atuk eleg angge atuk lit teko lahu sambil ino Allahn tam ibag ane haharoho imbibahon aru hikir aruhu. ”Allah palimu atuk lit war atuk ane elehap tehek.

⁵⁵War atuk ane palimu welahi peruk lahenon kema welahen? Hayeg fam ap hak eneptuk lahi peruk lahenon kema welahen?”

⁵⁶War atuk ane fahet ayehen hak eneptukon ino siyag ane turukon wereg. Siyag ane turukon ari Musa wene fam ine roho palimu wereg.

⁵⁷Ine roho palimu wereg angge famen Nonowe Yesus Kristus inowen apmayap turuk lit At palimu atfagma Ninikni Allah wel turuk lahe.

⁵⁸Nori, anden nindi henesug lahiyon ihi ane ari fahet yuk lagmag uk fug angge hinine roho unduhuk lit welamuhup. Likiya hupmu henesukun fano roho Allah iyabuk wituk lamuhup. Nonowe men mangno roho wereg lit lisag anggolo roho sat haruk lahebon ari saplangge turuk lahe fug ulug honoluk toho welamuhup.