Read Angguruk Yali 1 KORINTUS 16 Bible Online

1 KORINTUS 16 - Angguruk Yali bible

1 KORINTUS 16

¹Wene holtuk inap fahet uang emberukon ari anden o Galatia wene holtuk inap werehon hiyag isarikikon ino hikit toho hiren turuk lamuhup.

²Wene uruk sambil hup wal-wal hit obog toho henebe wal-wal hininggikmu werehon hikit toho tot emberuk lamuhubon ari hinibam tug toho foroho lamuhup. An henembeg waruhukmu eneg andog tuhuk peruk lamuhup fug.

³An henembeg waruhukteg ap eke lalusa ulug suwesingga haharoho ininggikmu umbuhukteg hiren ap fano peruk lahebon itanowen uang emberikip angge o Yerusalem inap og isa lahuben monde fuhuk.

⁴An waruhukteg yet hahuk aneyen it men ambiyeg la reg halug an oho ambiyeg lahuk.

⁵An hit henembeg waruhukon ari o Makedonia lahukteg yuwag toho Makedonia welam fug angge pisan isalug waruhuk.

⁶An waruhukteg hit men o Korintus tot anggolo roho weregman sun li waharukon ino an oho hit min weregman waruhu halug hit men welaruhuk. Welaruhukteg an nindiyen o pumbuk ekema lamin puhuk halug funggalma hiren let nabuhup.

⁷Hup piren hinahan hit men welamuhuk peruk lahi fug, Nikniyen an let naptuk halug an hit men tot anunu roho welaruhuk peruk lahi.

⁸An o Efesus aru weregman Yahudi inaben seni humon esetug naruk sali ino horog atuk halug[2] ari fam an la rehen henembeg waruhuk.

⁹O tuma ngi inap wene holtuk eleg inap winon anggolo seli roho wereg angge famen Allahn sok hut naptisimu wene hiyag isaruk laruhuken tuma welaruhuk.

¹⁰Timotius ino hit henembeg waruhumu hiren at Paulus hag toho Allah wene hiyag nisaruk ahun wereg ulug let turuk lamuhupmu akol eleg toho hit sehelimu welaruhu.

¹¹At apeleg ahun wereg ulug abug uruk lit apmayap tuk fug. An nambeg suhuloho fano waruhuwen hiren kebunggalma let tuhup. At men ori winon men ambiyeg nambeg wamuhup ulug anden it nangno eneptuk lahi.

¹²Nare Apolos ino nonori winon men hit henembeg pen isa lahun ulug anggolo hiyag itikik angge famen ketiya an lamin fug ulug pok atisi. Pok atisireg fobik aren lahuk puhu sambil ino hit pen hisa waruhu.

¹³Hinil wirik toho wereg lit hinindimu tem toho wenggel haruk lit hinine roho unduhuk lamuhup. Henekol toho welam fug angge henembong se roho welamuhup.

¹⁴Mun ane man ane turuk lit ap hinindi enesug lamuhup.

¹⁵Nori, alem misig fahet hit heng heneptuk lahi. O Akhaya inowen Stefanus uhe malik men atam Allahn mumal eneptisimu wene holtuson hit honoluk. Wene holtuk inap iren ler enebuhuk perusareg ketiya Allah iyabuk inine roho wituk.

¹⁶Ap ari hag toho Allah iyabuk wituk lit lisag toho turukon enele hiyag hisaruk ane hiren fuki roho holtuk lamuhup.

¹⁷Stefanus men Fortunatus men Akhaikus men nambeg waharusama nahiyeg toho welahi. Hit men an men nenemu welahe angge famen it nambeg waharusama hit hunubalma angge it wahasa ulug nahiyeg toho welahi.

¹⁸It nambeg waharuson ari famen andet hiret ninindi yuwahap neneptusa. Ap ari hahon hiren oho hinindi enesug lamuhup.

¹⁹Asia inap Allah wene holtuk lit At umalikisi werehonen hi heneptuk. Akwila men Priskila men wene holtuk lit inibam palu ruruk inap arimanowen oho nori ulug anggolo roho hi heneptuk.

²⁰An nori obog tohowen hit fahet nonori ulug hi heneptuk. Hit honori men mako pug toho hi-hi atuk lamuhup.

²¹An Paulus ninggareg ninggiken tu haharoho emberuk lit hi heneptuk lahi.

²²Ap sa Nonowe fahet indi haruk elehon alem siyahon ubam amag. ”Maranata!” Nonowe folo-folo waruhu!

²³Nonowe Yesus hit fahet indi henesuhon inowen fet henesug laruhu.

²⁴Yesus Kristus unuk fam anden hit obog toho nindi henesug lahi.