Read Angguruk Yali 1 KORINTUS 3 Bible Online

1 KORINTUS 3 - Angguruk Yali bible

1 KORINTUS 3

¹Nori, tam henembeg waharikikteg hit hunubam nele uruk lit ap Allah hime fanowon apma wereg inap unubam uruk hag toho irikik fug. Kristus fam inindi wirik toho wenggel ha fug angge kinangmon fahet eneg inindi wenggel haruk inap wereg ulug malik fu anggeyon unubam uruk hag toho irikik.

²Suburu ineyon hit henemu na fug teg latikipmu ag eneg mon heneptuk lit suburu og hisarikik fug. Kinangmon fahet eneg hinindi wenggel haruk lit ketiya oho henemu suburu wirik toho na fug teg lahep.

³Honori fahet henehummu siyag toho wereg lit hit honori men hili roho welahebon arimano hiren kinangmon fahet eneg wenggel haruk lit ap kinangmon welahep fug ano?

⁴Ap misihen te an Paulus ibilon welahi urukmu winonen Apolos ibilon welahi uruk lahebon ari ap kinangmonen peruk ane uruk lahep fug?

⁵Apolos ap sa hag toho wereg, Paulus ap sa hag toho wereg? Nonowe amingmingangge roho weregma hiren it enele holtikipmu Nonoweyen hit wal taneg funggalem hiyag hisarisimu hinindimu tem toho wenggel haruk latikip.

⁶Anden ei yatikikmu nare Apolosen hohol yihik ferisimu Allahn eneg ebe kinangma emberisi.

⁷Ei yatukon men hohol urukon men palimu wereg eleg, we Allah ebe kinangma emberukon ino eneg palimu wereg.

⁸Ei yatukon men hohol urukon men eke palimu eke apma wereg eleg, ambi reg lit wereg. Ambi reg lit wereg angge famen it piren yabuk wituson hikit toho Allahn onggo og isahu.

⁹Niren Allah iyabuk wir utuk lit amingmingangge welahema hit Allah angginang welahep, Allah ibam ket witukon welahep.

¹⁰Allahn an mumal naptisireg og nitisi hag toho an ninggik fano roho o wituk nahun inowen Allah ibam wiruhuk ulug olun oho ferikikmu ap winonen oho o ino witil laharuk lamuhup. Ap arimano enebe wal tanehen o aru nangginoho witil laharuk lamuhuk ulug inilen fuki roho kim haruk lamuhup.

¹¹Allah ibam wituk ambeg olun oho ferisiyon ino Yesus Kristus misig eneg wereg. Ap misihen oho o keron witmin ulug olun winon eke wa fug teg.

¹²Olun misig ari fam aben o witil laharuk lit umbagpag turuk angge fanowon men, helep anggen ili ruruk angge men helep ayeg ili faya urukon men e men walangge lilohon men findayo pila men

¹³arimano fam wal taneg witil laharuk halug inam aruhu. Allah waruhu sambil ino indok seneko waruhureg o ino fam hunduhuk fuhumu ap wal taneg wituk lamuhubon arimano indok inowen wal isahu.

¹⁴O wituk angge arimano indoken na fug angge ine roho wereg halug o wituk ahun ino Allahn onggo og uruhu.

¹⁵O wituk angge arimano indoken nahu halug o wituk ahun ino nibam peruk lit indi siyag toho weregma indok ambulpul sehelimu welaruhu angge famen Allahn ebe lisoho wahureg fanowap tuhu.

¹⁶Hit Allah ibam wirihon hag toho welahepma Allah hime fanowon ino hit hunundama werehon ari hit henepeleg?

¹⁷Ap ekeyen Allah ibam siyahap tuhu halug at ino oho Allahn mondabi siyahap tuhu. Allah ibam ino inggarehen ngi reg lit weregma hit Allah ibam welahep.

¹⁸Hit hininggarehen hininggareg henele ying taruk lamuhup fug. Ap misig hit sehelimu werehonen mun ane man ane alem noluk teg lahi peruk halug at inowen we tem toho alem oluk ahun aruhuwen sohu roho welamag.

¹⁹Ap kinangma werehon aruman mun ane man ane alem nonoluk teg lahe peruk lit werehon arimano fahet Allahn sohu-sohu ane eneg turuk peruk. Alem ari fahet tam haharoho imbibahon tu, ”Mun ane man ane alem nonoluk teg lahe peruk lit werehon arimano un ane unundama werehon fam Allahn sen enebuhu.”

²⁰Nin eke haharoho imbibahon tu, ”Alem onoluk inaben unundama peruk ane Allah oluk, iren peruk ane ari obog toho ket-ker ane eneg peruk.”

²¹Ari ulug haharoho imbibagma ap kinangmon fahet henele hemet toho uruk lit wel eneptuk lamuhup fug. Obog toho iminon aru hiren ngi reg lit welahep:

²²An Paulus men nare Apolos men, Kefas men, kinangma werehon men oluk atuk ane war atuk ane men ketiya werehon fobik aruhuwon men obog toho ari hit ngi reg lahep.

²³Kristus inowen hit fahet ngi reg lit weregma Kristus ino Ikni Allahn ngi reg lit wereg.