Read Angguruk Yali 1 KORINTUS 7 Bible Online

1 KORINTUS 7 - Angguruk Yali bible

1 KORINTUS 7

¹Ketiya suwesingga hiren an fahet emberikibon ino yet harikikteg anden hebeloho hiyag hisamin: Ap te hiyap oho eleg angge yu wereg lit fano famen

²pabi-pabi ane tuhup tohon ap wal taneg unuhesi og talug lamuhup, hiyap wal taneg enehunsi og talug lamuhup.

³Hiyaben nahun men nohul peruk halug ahunen nirim puk fug. Aben nuhe men nohul peruk halug uheyen nirim puk fug.

⁴Hiyap ebe inggarehen tohon fug, ahunen uhe ngi reg lit wereg. Ap ebe oho inggarehen tohon fug, uheyen ahun ngi reg lit wereg.

⁵Ahun uhe henemu-henemu welamuhup fug. We sembahyang uruk lit yuwag toho welamuhuk ulug ahunen oho uheyen oho nenemu welamuhuk fano peruk halug enemu-enemu welam teg. Tot henemu-henemu welamuhupteg nin fobik mangno roho welamuhup. Ahun uhe mangno roho nohuk fug angge weregma Iblisen wal hisahu rohon mangno roho welamuhup.

⁶Hiyag hisaruk lahiyon aru hit henemu hinindiyen turuk lamuhuben ele haro roho pet neneptuk puk fug.

⁷Ap obog toho an yu welahi hag toho yu welalepma fano famen Allahn niren tuk hag teg laheyon eneg hiyag nisaruk. Hit tuk hag teg lahep ulug Allahn ap eke fam eke roho hiyag isaruk lit ap eke fam eke ane roho hiyag isaruk.

⁸Ap yuwon men hiyap yuwohon men an hag toho welamuhubon ari fano ulug hiyag isaruk lahi.

⁹Ari fano ulug hiyag isaruk lahi angge famen aben hiyap oho eleg angge welahi ha fug teg perukon inowen uhe hilawag, hiyaben ap oho eleg angge welahi ha fug teg perukon inowen ahun hilawag. Uwali inahan turuk lit wereg ane ari siyahen uhe hilawag.

¹⁰Hiyaben ap ohowon fahet, aben hiyap ohowon fahet tot hiyag hisamin. Hiyag hisaminon ari anden fug, Nonowe Yesusen komo neneptuk latfag ane imin: Hiyaben te ahun umbusuk fug teg.

¹¹Ahun embeseruk halug ap winon wa fug angge mondabi yuwog toho welaruhu. Yuwog welam fug teg halug ahun subon men mangno aruhu. Aben oho uhe umbusuk fug teg.

¹²Eke iminon ari Nonowe Yesusen ibag fuhon anden peruk lahiyon hiyag hisamin: Ap wene oluk ahun misihen hiyap wene apelehon oho lit weregma hiyap ariyen nahun men welamuhuk peruk halug umbusuk fug teg.

¹³Hiyap wene olukon misihen ap wene apelehon oho lit weregma ap ariyen nuhe min welamuhuk peruk halug ahun umbusuk fug teg.

¹⁴Ahun wene apelehonen uhe wene olukon ohoma wene apma welamuhup. Uhe wene apelehonen ahun wene olukon ohoma wene apma welamuhup. Wene apma welalep fugmu unumalikisi wene enepeleg inap unumalikisi hag toho welalep. Welalep angge famen ketiya Allah umalikisi wereg.

¹⁵Wene apeleg ahun inowen nuhe embesemin peruk halug uhe wene olukon inowen oho nahun embesemin pukag. Hiyap wene apelehon inowen nahun embesemin peruk halug ahun wene olukon inowen oho nuhe embesemin pukag. Hiren yik suwahal uk fug angge mangno roho welamag ulug Allahn wol heneptisi. Wol heneptisi angge re we wene apelehon inowen eneg embesemin peruk halug ahunen uhe umbusuk teg, uheyen ahun umbusuk teg.

¹⁶Hat uheyen hahun wene apelegma hiyag utuk lit indi anggarap tuk teg ane hat holuk? Hat ahunen huhe wene apelegma hiyag utuk lit indi anggarap tuk teg ane hat holuk?

¹⁷Allahn hit wal taneg hiyag hisarisiyon ari seneg lit welamuhup. Atam Allahn wol heneptisimu welatikip hag toho welamuhup. Anden komo heneptuk lahiyon tu o pumbuk winon wene onoluk inap weregma it obog toho hiyag isaruk lahi.

¹⁸Ambilahap paleg ahun famen Allahn wol tirisi halug fobik awiya wamin puhu fug. Ambilahap paleg elehon Allahn wol tirisi halug ambilahap pal naplep puhu fug.

¹⁹Ambilahap palehon oho ambilahap paleg elehon oho anggin teg eleg. Allah wene tem toho holtukon ari eneg anggin teg.

²⁰We Allahn hit wal taneg wol heneptisimu welatikip hag toho wereg lamuhup.

²¹Hat ap amingmingangge roho weregma Allahn wol haptisi ano? Nare, hindi anggin toho welam fug. Hiknisiyen hat hinggik kobog hubaharuk halug seleg toho laruk laruhun.[1]

²²Ap amingmingangge roho weregma Ninikni Allahn wol turukon ino ikniyen mingming turuk angge famen Allah amingmingangge roho wereg lit seleg toho wereg. Ap seleg toho werehon ino Kristusen wol tirisi halug at ino oho Kristus amingmingangge wereg.

²³Allahn onggo suwon hit fahet palfagma hit ap enemingmingangge amuhup fug.

²⁴Nori, we Allahn hit wal taneg wol heneptisi sambil welatikip hag toho wereg lamuhup.

²⁵Ketiya hilani malik fahet tot haharoho embemin. It fahet Nonoweyen tot hiyag nisarisi fug. Ninikni Allahn an indi niyaruk lit weregma nele si imin fug ulug anden nindimu peruk lahiyon hiyag hisamin.

²⁶Fobik alem suwon inam aruhumu siyag ahep ha rehen ap hiyap yu welamuhup halug ari fano peruk lahi.

²⁷Hat huhe og talug lahen ano? Nuhe embesemin peruk laruhun fug. Hat huhe og talug lahen fug ano? Nuhe eke hilamin peruk laruhun fug.

²⁸Hat hiyap hilahun halug siyag ane tihi puhun fug. Ari hag toho hilani maliken oho ap hilahu halug siyag ane tihi puhu fug. Ari reg angge famen ap men hiyap men arimano unubam siyahon inam aruhumu inindi siyag am nowen ulug anden komo heneptuk lahi.

²⁹Nori, anden uruk lahi ane aru Nonowe waruhuwon horog teg peruk lit uruk lahi. Hiyap oho lahep angge famen Nonowe waruhuwon horog tehen hiyap oho eleg inap hag toho welamek.

³⁰Uba yatuk lahep angge famen uba yatuk eleg inap hag toho welamek. Henehiyeg toho welahep angge famen henehiyeg eleg inap hag toho welamek. Mun angge man angge onggo waruk lahep angge famen ngi reg eleg inap hag toho welamek.

³¹Mun angge man angge kinangmon hininggikmu wereg angge famen hininggikmu eleg inap hag toho welamek. Kinang ketiya niren yet haruk laheyon aru eleg aruhu.

³²Ari fahet hinindi anggin toho welam fug ulug hiyag hisaruk lahi. Ap hiyap og talug elehon inowen Ninikni Allah indi pulmu wenggel haruk lit Allah ahiyehap timin peruk lit wereg.

³³Ap hiyap ohowon inowen kinangma wereg angge indi pulmu wenggel haruk lit nuhe ahiyehap timin ulug

³⁴indi piren wenggel haruk lit wereg. Hiyap yu werehon men hilani malik menen nenebe oho ninindi oho Allah apma welamuhuk ulug Allah wene inindi pulmu wenggel haruk lit wereg. Hiyap ap ohowon inowen oho kinangma wereg angge indi pulmu wenggel haruk lit nahun ahiyehap timin peruk lit wereg.

³⁵Anden uruk lahiyon aru hit hininggareg fano welamuhup ulug uruk lahi. Kumbi ilil heneptuk lit uruk lahi fug, hiren pikiron fano ane eneg turuk lit Ninikni Allah yabuk wituk lamuhuben hiyag hisaruk lahi.

³⁶Ap misihen hiyap hilamin ulug elenggen kuruk lit weregma hiyap ino tuhum atuk halug ap inowen uwali inahanen saplangge keyen timin fug peruk halug inibam enemu wit tawag. Ari roho turukon ari siyag ane turuk eleg.

³⁷Ap misihen hiyap hilamin ulug misihim elenggen kuruk angge famen undaman te hiyap ino embeselug yu welaruhuk peruk halug yu wereg lit nindi wirik toho welaruhuk peruk laruhu halug hiyap ino fano embeseruk laruhu.

³⁸Hiyap hilaruk inaben oho fano ane turuk. Hiyap hila fug angge yu wereg inaben oho fano anggolo ane turuk.

³⁹Hiyap ahun oluk weregma umbusuk fug teg. Ahun war atuk halug eneg inggareg indiyen ap eke hilamin peruk halug ap wene fam wenggel haruk ahun eneg hilaruk laruhu.

⁴⁰Hiyap ino inggareg indiyen yuwog toho welaruhuk peruk halug ari fano anggolo peruk lahi. Anden peruk ane hiyag hisihiyon aru Allah hime fanowon inowen an let naptukmu hiyag hisaruk lahi.