Read Angguruk Yali 1 KORINTUS 8 Bible Online

1 KORINTUS 8 - Angguruk Yali bible

1 KORINTUS 8

¹Nori, usa ambohom naruk ane fahet tot hiyag hisamin. Aben te, ”Alem ari fahet nit obog toho ninindi anggat teg lahe,” uruk ane nit nonoluk. Alem nonoluk teg lahe uruk ane ariyen hemet turuk ane inam atuk, ap inindi enesug ane ariyen ine atuk ane inam atuk.

²Ap misihen alem noluk teg lahi peruk ahun inowen alem hirahoma werehon indi anggar am hag tohon fahet oluk atuk eleg.

³Ap Allah indi reg lit wereg ahun ino fahet Allahn oluk teg lit wereg.

⁴Usa ambohom naruk ane fahet nit nonoluk ane iminon tu, ”Kinangman usane turukon men Allah hag toho wereg perukon men wereg eleg, we Ninikni Allah misig eneg wereg.”

⁵Aben niniknisi suwon nit sen nenesuhon wereg urukon arimano poholma oho kinangma oho anggolo wereg. Palimu werehon men iniknisi sen enesuhon men tem toho anggolo wereg peruk lahi.

⁶Anggolo wereg angge famen nit fahet Ninikni Allah misig eneg wereg. Mun angge man angge Allahn wal tibagma nir oho Allah apma welahe. Nonowe Yesus Kristus misig eneg wereg, Aren mun angge man angge werehap tibagma nir oho At famen fano wereg lit nonoluk welahe.

⁷Ap winonen ihiyon ari onoluk teg eleg. Ap winonen usane horog ketiya embeserusareg usane fahet enekol toho weregma aben usa ambohom esetuk halug tu usa ambohom ulug enekol haruk. Enekol haruk angge famen wam ino nalug inindi pong-pong angge turuk lit enekol toho wereg.

⁸Allahn nit fahet fano perukmu naruk angge inowen Allah horogma hondog neneplug la fug teg. Wam ari naruk eleg halug nit ninilaheg am fug teg. Wam ari naruk halug nit nenelong am fug teg.

⁹Hiren seleg toho welahe peruk lahep ane ariyen honori inine elehon arimano helep atog famen unuyug kik toho ying am nowen hiren yet teg lit honoluk toho welamuhup.

¹⁰Haren alem noluk tehen seleg toho welahi peruk hahun usa ibam kuhunteg heriyeg lit usa ambohom narukmu hare ine elehon inowen yet hiyahureg nungge puhu? Hare ine elehon inowen indimu akol toho wereg angge famen hat narukmu yet hiyahureg an oho tot nele puhu fug ano?

¹¹Haren turuk lahen ane ariyen hare nele peruk lit werehon ino siyahap turuk lahen. Hare fahet oho Kristus war atfag angge famen haren alem noluk teg lahi uruk lahen ane ariyen hare ebe siyahap turuk lahen.

¹²Honori inindimu enekol toho werehon inindi siyahap eneptuk lahebon ari honori fam eneg siyag ane turuk lahep fug. Kristus fam oho siyag ane turuk lahep.

¹³Naruk angge fahet nare helep fam uyug kik toho kinangma ying atuk halug nare indi nonghonga fesuhuk tohon anden wam usa ambohom mondabi nahuk fug peruk lahi.