Read Angguruk Yali 1 KORINTUS 9 Bible Online

1 KORINTUS 9 - Angguruk Yali bible

1 KORINTUS 9

¹Yesusen an mon naptisi fug ano? An oho seleg toho welahi fug ano? Anden oho Nonowe Yesus harikik fug ano? Yesus unuk anden hiyag hisarikikmu hit famen anggen wilip atisiyon hag toho welahep fug ano?

²Ap winon fahet mon naptisi fug halug hit fahet tem toho mon naptisiyon welahi. Hiren Nonowe fam wenggel haruk lahebon ariyen an mon naptisi ane fahet enehangge hit welahep.

³An fahet nabug uruk lit pet naptuk inap unubam hebeloho ninggareg fahet tu imin:

⁴Nit suburu men ik men nengge ha fug teg lahe ano?

⁵Niren wene hiyag isil noruk lit wene holtuk hiyap wa fug teg lahe ano? Nonori wene hiyag isaruk inap winon men Yesus otsi yuhon men Kefas men arimano hiyap ohowon wereg angge famen niren te wa fug teg lahe ano?

⁶An men Barnabas men oho nininggareg nininggik fam yabuk wit taruk lahe. Wit taruk lahema iren eneg yabuk umbusuk fug angge wituk lamuhup peruk lahep? Niren umbusuk teg angge famen embeseruk lahe fug.

⁷Ap ekeyen tog lahaptukmu ap sa ibil atuk halug wam war um fug teg ano? Ap san yabuk wituk halug suburu na fug teg ano? Ap san wam domba foroho lit wereg halug esetukmu na fug teg ano?

⁸Uruk lahiyon aru ap kinangmonen peruk ane uruk lahi fug, Musa wene fam atam ari roho haharoho imbibag fug?

⁹Musa wene fam haharoho imbibahon te, ”Wam sapiyen suburu roti anggen loloho pilaptuk lit nahu rohon ulug haren ambilik pug tuk fug”. Ibag ane ari wam sapi fahet Allahn ibag ano?

¹⁰Nit ap fahet Aren wenggel hibareg ibag ano? Yu, nit fahet ari haharoho imbibag. Yabuk wituk ahun inowen suburu minggiroho nahuk peruk lit wit tawag. Anggen loltuk ahun inowen anggen minggiroho nahuk peruk lit lol tawag.

¹¹Niren anggen fanowon Allahn ngi rohon hit sehelimu fok turuk halug anggen kinangmon hiren te nahup fug ulug og isaruk lamuhuk fug peruk lahep?

¹²Ap winonen og neselep perukon hiren og isaruk lahep angge famen nit tam og nisawon og nisa fug teg lahep? Hiren nit og nisa reg angge famen niren hila fug teg lahe. Kristus wene fanowon sok lar aruhu rohon nininggareg naruk angge yami raruk lahe.

¹³Allah ibam foroho inap arimano it naruk angge o fanowon ino famen minggiroho og isarukmu narukon ari hit henepeleg? Allah fahet hubu lahabul ulug lahaptuk inap arimanowen fumag minggiroho narukon ari hit henepeleg?

¹⁴Ari hag toho wene hiyag isaruk inap arimano it fahet naruk angge wene famen eneg og isa reg ulug Nonoweyen ele imbibag.

¹⁵Nonoweyen ele imbibagma anden hila reg lahi angge famen misig oho hilarikik fug. Hilarikik fureg fobik an og numuhupmu hilahuk ulug obog toho aru anden haharoho emberuk lahi fug. Hiren angge anden helelema war ale ari fano peruk lahi. Ari fahet anden wel taruk lahi ane ari ap misihen elehap tuk fug teg.

¹⁶An wene hiyag isaruk nahun welahi ulug wel ta fug teg lahi. Allahn ap hiyag isahun ulug ele nubam emberuk lit mingming naptisireg nubam emberisiyon ari eneg tuk teg lahi. Wene hiyag isaruk lale fug halug an siyag ale.

¹⁷An ninggareg nindiyen perukon fam til noruk lalema hahen onggo og nutuk lalep halug fano. Fano angge famen ninggareg nindiyen perukon fam til noruk lahi fug. Wene hiyag isaruk laruhun ulug Nikniyen an nubam emberisi.

¹⁸An nubam emberisi halug onggo nunggeyon og num teg? An onggo og num hag tohon te tu: Onggo og nutuk elegma wene hiyag isaruk lit fano peruk lahi. Wene hiyag isaruk lahiyon fahet aben onggo og num teg angge famen hilaruk lahi fug.

¹⁹Ap enepma welam fug angge seleg toho wereg lit ap anggolo an nibil amuhupteg wene holukag ulug ap enemingmingangge atikikteg fano peruk lahi.

²⁰Yahudi inap nibil amuhupteg wene holukag ulug Yahudi inap sehelimu wereg lit an Yahudi inap hag toho atikik. Musa wene apma wereg inap sehelimu wereg lit Musa wene apma wereg ahun hag toho atikik. Musa wene apma welahi fug angge famen it arimano an nibil amuhupteg wene holukag ulug an oho Musa wene apma atikik.

²¹Musa wene apma wereg eleg inap sehelimu wereg lit Musa wene apma wereg eleg ahun hag toho atikik. Kristus wene imbibahon apma welahiyon ariyen Allah wene haharoho imbibahon pisan isalug selma welahi fug. Selma welahi fug angge famen Musa wene apma wereg eleg inap nibil amuhupteg wene holukag ulug it hag toho atikik.

²²Inine eleg inap sehelimu wereg lit an oho it inine eleg hag toho nine eleg toho welatikik. It inine eleg inap an nibil amuhupteg wene holukag ulug it hag toho atikik. It ap arimano sehelimuwon tot fanowap enebuhuk ulug it obog toho wal taneg werehon fahet an oho it wereg hag toho welaruhuk perikik.

²³Wene hiyag isaruk lahiyon ari an oho ngi aruhuk ulug obog toho aru til noruk lahi.

²⁴Ap sa tam lamisi ulug ap anggolo pupu angge laruk angge famen we misig atam larukon ino eneg onggo og utukon hit henepeleg? Hir oho tam pu roho lahupmu onggo og hisahuwen ari hag toho laruk lamek.

²⁵An tam lahi ha reg peruk ahun inowen likiya hupmu wal haruk lit mun angge man angge anggolo namin fug peruk lit osoko rebeselug wereg. It arimano sa tam lamisi ulug pupu angge larukon aliliyangge ilamna werehon ununggulmu pug teberuk. Niren til noruk lahe ane aliliyangge mondabi welaruhuwon eleg aruhu fuhon nununggulmu pug nunubahakup ulug turuk lahe.

²⁶Ari fahet turuk lit an laruk lahiyon saplangge fahet laruk lahi fug. Ap yik aptuk lit ap winonen te ininggik amu ke tahan tebeseruk angge famen anden te ninggik amu ke hik haruk lahi fug,

²⁷an ninggareg apmayap taruk ane milal taruk lahi. Ap winon fahet wene hiyag isaruk lahi angge famen ninggareg miyaloho hik niyahu rohon ulug an ninggareg apmayap taruk ane milal taruk lahi.