Read Angguruk Yali 2 KORINTUS 1 Bible Online

2 KORINTUS 1 - Angguruk Yali bible

2 KORINTUS 1

¹Allahn tam perisiyon hikit toho Yesus Kristus inowen an Paulus nubam yonggo laruk laruhun ulug hiyag nitisiyon ino men nenere Timotius menen suwesingga tu hit fahet emberuk lahe. Allah umalikisi o Korintus welahebon men ap obog toho inindi fanowon o Akhaya kinang fam obog toho welahebon fahet suwesingga tu emberuk lahe.

²Ninikni Allah men Nonowe Yesus Kristus menen hit fahet Inindi henesug lit hit hinindi yuwahap heneptuk lamuhuben sembahyang uruk lahe.

³Nonowe Yesus Kristus Ikni Allah ap obog toho indi nenesuhon Ninikni inowen nit ninindi yuwahap neneptuk lit onggon neneptukon ino wel turuk lahe.

⁴Nit ninindi anggin toho weregma Aren ninindi yuwahap neneptuk lit onggon neneptukmu niren ap winon alem eke hag eke hag unubam atukon it arimano inindi yuwahap eneptuk lit onggon enebehe ha reg. Onggon neneptuk ane Allahn nit nunubam emberisiyon ino fam niren oho it ler eneptuk lahe.

⁵Alem angginon Kristus ubam atfahon ino sebe roho nit nunubam atuk. Ari hag toho Kristus famen fano ane nin sebe roho nunubam emberuk lit onggon neneptuk.

⁶Alem angginon nit nunubam atuk halug hit hinindi yuwag atuk lit fano amag ulug nit nunubam emberuk. Nir oho ninindi se roho welahe ane ariyen hir oho hinindi se roho welamuhup. Alem angginon nit nunubam atukon hag toho hit hunubam atuk halug Allahn hit hinineyap heneptukmu hiren oho hinindi yuwag toho wereg lit ha ruk teg lamuhup.

⁷Alem nit nunubam atukon ino hir oho hunubam atuk, nit ninindi yuwag toho welahema hir oho hinindi yuwag toho welamuhup. Hit ari roho welamuhup ane fahet nonoluk teg lit niren it fano welamuhup peruk lahe.

⁸Nori, Asia kinang famen nit nunubam atisiyon hir oho honoluk amag ulug hiyag husul. Niren ha fug tohon alem humon angginon nunubam atisimu mondabi war amul ulug ninindi anggin atisi.

⁹We tem toho pinggi nunusulusa peruk latukuk. Ari peruk latukuk angge famen nit nininggarehen perukon fam wenggel hahup tohon ulug Allah ap warehon onolukap eneptukon ino fam wenggel hawag ulug alem nunubam atuk latisi.

¹⁰War atuk ane nenekol toho welatukukon Aren windat neneptisi hag toho fobik oho windat nenebuhu. Fobik oho Aren eneg nit windat nenebuhu ulug ubam ninindi wenggel haruk lit tem toho peruk lahe.

¹¹Ari fahet nit fano welamag ulug hiren let neneptuk lit sembahyang uruk lamuhup. Allahn nit fahet inilaheg perisireg let neneptisiyon ino fahet ap anggolowen Ninikni uruk lit wel turuk lamuhuben hiren nit fahet oho Allah fam sembahyang uruk lamuhup.

¹²Ninindimu un ane het toho foroho lahe fug ulug nenehiyeg toho wereg lit tu uruk lahe: Kinangma tuman mun ane man ane turuk latukukon hit fahet wenggel haruk lit nenele uruk latukuk ane arimano Allahn let neneptukmu nenele si uk fug angge ninindi wirik toho wenggel haruk lit turuk latukuk. Nininggareg fahet mun ane man ane alem nonoluk ninap welahe puk fug angge Allah indi nenesuhon inowen ninineyap neneptukmu hit hunubam turuk latukuk.

¹³Niren suwesingga hahatuk laheyon arima hiren kim halug hinindimu anggar am tehon eneg hahatuk lahe. Uruk latukuk ane fahet winon hinindi anggar atisi hag toho welamuhuk li anggolo hinindi anggar aruhu lit teg peruk lahe. Yesus waruhu sambil ino hiren nit fahet henehiyeg toho welamuhup hag toho niren oho hit fahet nenehiyeg toho welamuhuk.

¹⁵Ari roho nindi wenggel harikikteg hit henembeg tam waruhuk perikik. Waruhukteg wene hiyag hisarukmu Allahn inggik pireneg angge fano angge hunubam umbuhu perikik.

¹⁶Hit henembeg waruhukteg Makedonia lahukteg nin suhuloho Makedonian hit henembeg waruhukmu hiren an hondog naplug Yudea lahuk perikik.

¹⁷Ari roho waruhukteg lahuk ulug fano wenggel ha fug anggeyen irikik ano? Waruhuk irikik ane ari at amuwen wenggel harisireg irisi peruk lit ”yu” uruk ane men ”fug” uruk ane men ambi reg peruk lahep ano?

¹⁸Niren sali hit hunubam emberukukon ”yu” men ”fug” men ambi reg eleg ulug ari Allah unuk fam tem toho uruk lahe.

¹⁹Yesus Kristus Allah amloho fahet an men Silwanus men Timotius menen hit sehelimuwen hiyag hisa waharukukon At Yesus ino ambilikmu ”yu” men ”fug” men ambi roho wereg eleg. At ambilikmu we ”yu” eneg wereg.

²⁰Allahn sali imbibahon obog toho arimano Yesus fam teko larukmu ”yu” uruk. Aren ”yu” urukmu niren hebeloho Yesus unuk fam ”Amin” uruk lit Allah wel turuk lahe.

²¹Allah inowen niret hiret Kristus men mangnowap neneptuk lit unduhuk nunubaharisireg ahaluwe fanowon nununggulmu hilil neneptisi.

²²Nit fahet An ngi aruhuk ulug enehangge nunubam emberuk latisi. Fano ane Allahn fobik og hisahuk ulug tug toho foroho lit orohole imbik waharuk hag toho Allah hime fanowon nit nunundama og nisarisi.

²³Allahn anden wenggel haruk ane oluk tehen anden iminon aren tem toho uruk ulug hol niyamisi: An hit henembeg wale angge famen hit hinindi siyag am ulug nindiyen pok atikik.

²⁴Hininggareg hinindiyen Allah fam wenggel haruk lahebon niren milal heneptuk lit mingming heneptuk lamuhuk perukuk fug. Henehiyeg toho welamuhuben iren perukon eneg ler eneptuk lamuhuk perukuk.