Read Angguruk Yali 2 KORINTUS 3 Bible Online

2 KORINTUS 3 - Angguruk Yali bible

2 KORINTUS 3

¹Uruk lahe ane aru fam nininggareg wel tehe ha reg? Ap winon eke henembeg waharuk lit suwesingga inggareg waharukon fahet hinindi anggarap turukon unug hisaruk hag toho niren oho ari hag toho suwesingga embehe ha reg ano? Hiren suwesingga fam nit wel neneptuk lit embehep ha reg lahep ano?

²Suwesingga niren tohon ap inindi anggarap eneptukon ino hit henebe welahep. Suwesingga ino nit ninindimu hahareg lit weregma ap obog tohowen kim halug inindi anggar atuk lamuhup.

³Hit henebe Kristus asuwesingga welahebon ari seleg teg. Niren wene hiyag hisaruk lit suwesingga ino haharoho emberukuk. Emberuk lit ahaluwe eleg atukon fam hahatukuk fug, Allah oluk werehon ahime fanowon inowen hahatisi. Helep anggeyon fam hahareg eleg, ap inindi fam hahareg lit wereg.

⁴Allahn nit fano let neneptuk lit wereg ulug Kristus apma wereg lit tem toho peruk lahe.

⁵Misig oho nininggareg nenemuwen mun ane man ane tuk teg lahe peruk lahe fug. Niren tuk teg laheyon ari Allahn tilihip urukon ariyen turuk lahe.

⁶Allahn sali keron imbibahon ino hikit toho nit amingmingangge welamag ulug ine og nisarisireg unduhuk nunubaharisi. Sali keron ino emberuk lit haharoho imbibag fug, Allah hime fanowon og hisahuk ulug eneg sali imbibagma haharoho imbibag ane ariyen ap ware feserukmu hime fanowon inowen ap onolukap eneptuk.

⁷Sali tamon ino emberuk lit helep anggeyon fam ubale ware felug hahatuk latfag. Sali ino fam ap war atukon welatfag angge famen Allah asinandi umbagpag turukon inowen imbibag. Imbibagma Musa orohole umbagpag turukon kun atuk angge famen Israel inap inil hutuk-hatak uruken at yet ha fug teg latfag. Ap war atukon sali ino amingmingangge unubam umbagpag turukon anggolo weregma

⁸Allah hime fanowon amingmingangge unubam umbagpag turukon mondabi palimu wereg.

⁹Alem hunubam umbuhuk ulug hiyag isaruk ahun amingmingangge arimano palimu weregma ili og henebuhuk ulug hiyag isaruk ahun amingmingangge arimano mondabi palimu wereg.

¹⁰Atam palimu wereg lit umbagpag turuk peruk latfahon ino ketiya palimu wereg lit umbagpag turukon men wirim teg elegma atamon ino apma weregma kun teg lit wereg.

¹¹Kun teg lit werehon ino umbagpag turuk halug kun atuk elehon ino mondabi palimu wereg lit umbagpag turuk.

¹²Ari roho ninindimu tem toho wenggel haruk lahe ane ariyen nenembong se roho wene hiyag isaruk lahe.

¹³Musa inowen orohole umbagpag turukon kun atikim Israel inaben yet hahup tohon ulug orohole sale fibahon ino hag toho nit welahe fug.

¹⁴Ari tibag angge famen inindi sohu atfag. Sale fibahon ino hikit toho ketiya oho sale fibag angge ino saleg lit wereg. Sale fibag angge inowen hondo reg lit weregma wene atamon ino kim haruk lit uruk. Kristus inowen eneg saleg angge ino leho fuk teg lit wereg.

¹⁵Ketiya oho Musa wene ino kim haruk lit urukmu saleg angge inowen inindi salegma uruk.

¹⁶It arimano ke hareyon embeselug Ninikni fam inindi wenggel haruk halug inindi saleg angge ino Allahn oho fesuhu.

¹⁷Ninikni ino hime fanowon weregma Allah hime fanowon ino unubam wereg inap arimano enemu unduhuk lit wereg.

¹⁸Nit nonorohole saleg angge inowen mapmu reg elehen Allah umbagpag turukon ino palimu weregma yet haruk lahe. Umbagpag turuk angge Allah famen nenebene waharukon ino Allah hime fanowon weregma nit nenebe Aren ninap neneptukmu At wirimangge hag toho wereg lit mondabi palimu fanoma welamuhuk.