Read Angguruk Yali 2 KORINTUS 4 Bible Online

2 KORINTUS 4 - Angguruk Yali bible

2 KORINTUS 4

¹Allahn indi nenesug lit namingmingangge welamag ulug nunubaharisimu nit nenekol toho welahe fug.

²Hik tegman turuk ane fahet ap ininggali atukon ari niren embeserukuk. Nenembilik piren toho wereg lit Allah wene fahet un ane hiyag isaruk lahe fug. Niren tem ane eneg fag toho hiyag isaruk lit ap obog tohowen Allah alukema nit nunubabut pal nisaruk lit it fano wereg pukag ulug ap onolohotman in atuk lahe.

³Wene niren hiyag isaruk laheyon fahet it siyag amuhup inap arimanowen eneg wene saleg angge apma wereg lit mapmu rehon hiyag nisaruk peruk.

⁴It arimano inindi Allah fam wenggeltuk elehon kinang tuma ikni roho werehon inowen inindi nonghonga feseruk lit inil hupni feserisi. Inil hupni feserisimu Allah ahuhe amloho Kristus umbagpag turukon ino awene fanowon asinandi ino yet ha fug teg.

⁵Nininggareg fahet hiyag isaruk lahe fug, Yesus Kristus Nonowe wereg ulug hiyag isaruk lit nit Yesusen perisiyon hikit toho hit henemingmingangge welahe ulug ap hiyag isaruk lahe.

⁶Allahn wal turuk lit hik werehon seleg amag ibahon inowen nunundama selehap neneptisimu ap winon onoluk atukmu seleg tegma laruk lit Allah umbagpag turukon ino amloho Yesus Kristus orohole fam yet haruk lamuhup.

⁷Fano-fano angge aru inggila siyag angge fam hililip toho foroho lahe. Foroho lit nit ninine eleg angge weregma Allahn sebe roho og nisaruk lit ninineyap neneptukon aru seleg atmisi.

⁸Siyahonen hondo neneptuk angge famen al senggeloho lin uruk lahe fug, ninindi nonghong uruk angge famen mondabi ninindi abir atisi fug.

⁹Nunusul ulug mug neneplug larukmu Allahn nit nunumbaharisi fug, miyaloho hik nisarusa angge famen war atukuk fug.

¹⁰Yesus oluk atfag ane nit nunubam weregma seleg aruhuwen At ware fisibahon ino nit At men laruk lahe.

¹¹Nit nenebe ilamna welaheyon famen Yesus oluk atfag ane inam aruhuwen nit nonoluk welahema Yesus unuk fahet likiya hupmu nunusuk oho turuk.

¹²Nit war am hag toho welahe, hit honoluk welam hag toho welahep.

¹³Haharoho imbibag ane aru wereg, ”Anden tem toho wenggel haruk lahi ane ariyen fag toho uruk lahi.” Imbibag ane ari hikit toho hime fanowon ino ambi roho nunubam weregma niren tem toho wenggel haruk lahe. Tem toho wenggel haruk lahe ulug fag toho nenele uruk lahe.

¹⁴At Nonowe Yesus olukap tibahon inowen nir oho At men mangno roho nonolukap nenebuhuwon fahet nonoluk. Nonolukap nenebuhureg Aren hit men mangno roho alukema nunumbahaku.

¹⁵Allahn tuhu ane ari obog toho hit fahet teko lahu. Hit fahet teko lahumu Allah ap indi enesug lit weregma ap anggolo amuhupteg iren Allah fam Ninikni uruk lit wel turuk lamuhupmu Allah unuk palimu aruhu.

¹⁶Nit nenehap selmon siyahap neneptuk angge famen hup eke waharukon fam eke waharukon fam Allahn ninindi kerap neneptuk lit fanowon og nisaruken ninindi nonghong uruk eleg.

¹⁷Alem ketiya nunubam werehon aru ilamna werehon turuken se reg lit wereg. Se reg lit werehon ariyen Allahn onggo fanowon mondabi palimu werehon sebe roho og nisahu.

¹⁸Aben yet harukon fahet wenggel ha fug anggeyen aben yet ha fug tohon fahet wenggel haruk lahe. Aben yet harukon ari ilamna werehen eleg aruhumu aben yet ha fug tohon ari eneg mondabi welaruhu.