Read Angguruk Yali 2 KORINTUS 5 Bible Online

2 KORINTUS 5 - Angguruk Yali bible

2 KORINTUS 5

¹O sabo kinangma wirihon nit welahe ambeg aru halog tuhupmu o poholma werehon mondabi welaruhuwon ap ininggik fam wibuk fug tohon nit welamuhuk ambeg Allahn wit nisahuwon ari nit nonoluk.

²O sabo kinangma wirihon ino poholma o fanowon inowen ungga keron sale fuhu ulug ninindi wenggel haruk lit o sabo miningon fam aru welahe ulug ngesekum turuk lit welahe.

³O keron apma wereg lit nenebiye wereg ninap hag toho welam fug angge nenesum wan toho welamuhuk.

⁴O sabo miningon aru fam ninindi anggin toho wereg lit ngesekum turuk lahe. Sum miningon nonggoloho umbusuk fug anggeyen keron wan tahukmu war atuk ane ino onoluk atuk ane inowen pil isahumu fano peruk lahe.

⁵Ari roho hit hunubam turuk laruhuk ulug nit unduhuk nunubaharisireg mun angge man angge fobik hit og hisahuk ulug wep toho emberisireg orohole imbik waharuk hag toho Allah hime fanowon og nisarisi.

⁶Nit nenebe war atukon aru fam wereg lit Ninikni men hili yat toho welaheyon nonoluk angge famen likiya hupmu ninindi se roho welahe.

⁷Nit ketiya tuma welaheyon aruman ninilen uwan yet haruk lahe fug, fobik aruhu ane fahet tem toho peruk lit wenggel haruk lahe.

⁸Nit nenebe siyahon embeselug pikit Ninikni ambeg lilareg mondabi welala peruk lit ninindi se roho welahe.

⁹Nit ninibam yugmu wereg lir ano, pog ibam wereg lir ano, Allahn nit fahet fano peruk laruhuwen yami ruruk lahe.

¹⁰Nit obog toho Kristus ino alem kong tuhu ambeg heriyeg lit weregma olohotma in amuhuk. Nit in amuhukmu ap obog toho kinangma wereg lit turuk ane hikit toho og isa hahon eneg fanowon ano siyahon ano og isahu.

¹¹Ninikni fam enekol toho wereg ane nit nonoluk tehen ap winon nenele ine roho inindi og eneptuk lahe. Allah alukeman ninindimu hirahowon wereg elehen hiren oho it inindimu hirahowon eke wereg eleg peruk lahep ano ulug uruk lahi.

¹²Ari uruk lit hit henelukeman nininggareg wel tubat tul peruk lahe fug. Ap winonen nit fahet hit kapal hisaruk halug hit henehiyeg toho wereg lit fag toho hiyag isaruk lamuhuben uruk lahi. It ap arimano inindimu fuki roho wenggel ha fug angge enehap selmon fahet eneg wel tubat taruk.

¹³Nenek turukonen ininggareg hal ta fug angge uruk hag toho niren oho ari turuk lit Allah wel turuk lahe. Nininggareg hale fat taruk lit uruk laheyon hit fano amag ulug uruk lahe.

¹⁴Kristus inowen indi nisarisireg nit haloho nunumbaharisi. Ap obog toho fahet ap misig war atfagma it obog toho war atusa ane ari nit ninindimu anggar atisi.

¹⁵Kristus ino ap obog toho fahet war atfahon alem tu: It onoluk werehon arimanowen ininggarehen tohon fahet wenggel ha fug angge it fahet war atfareg oluk atfahon ino fahet eneg wenggel haruk lamuhuben Kristus war atfag.

¹⁶Ap kinangmonen ininggareg unubabut pal-pal atug onoluk tegma niren unubabut pal isalug nonoluk am fug teg. Kristus kinangma weregma niren ubabut pal harukuk halug ketiya ap kinangmon hag toho ubabut pal halug nonoluk am fug teg.

¹⁷Ap sa Kristus men werehon indi keron ubabut fanowon welaruhu. Tamon ambolma atisimu keron tik-tem toho ubam atisi.

¹⁸Obog toho aru Allah famen waharuk. Allah inowen At men nit men misig welamag ulug Kristus fam mangnowap neneptisi. Kristus fam mangnowap neneptisimu niren oho At let turuk lit ap winon mangnowap eneptuk lamuhuken mingming neneptisi.

¹⁹Allahn An men ap kinangmon men sebe roho welamuhuk ulug ap kinangmonen siyag ane turukon winag ha fug angge Kristus fam mangnowap enepfag. Ap mangnowap eneptuk awene ino nit nunubam Aren emberisi.

²⁰Kristus inowen nit mon neneptisimu nit At ubalma wereg lit hit komo heneptuk laheyon ari Allahn komo heneptuk hag toho uruk lahe. Hit Allah men mangno roho welamuhuben henesukun fano reg lit At ngi amuhuben Kristus unuk fam heng heneptuk lahe.

²¹Kristus inowen siyag ane turuk latfag fug angge famen Allahn At ino fam it ili og enepmin pibareg nit fano welamag ulug At siyag ane turuk ahunap tibag.