Read Angguruk Yali 2 KORINTUS 8 Bible Online

2 KORINTUS 8 - Angguruk Yali bible

2 KORINTUS 8

¹Nori, niren hit hunubam hiyag husulon te Allah umalikisi o Makedonia aru werehon Allah indiyen it inindi fanowap eneptisi ulug hiyag husul.

²Allahn unubabut wal isaruk lit mun ane man ane siyahon fam wal isarisi angge famen enehiyeg anggolo wereg. Enehiyeg haruk lit it enenggengge eleg angge famen inindi wiyig teg lit sebe roho og isa hag toho wereg.

³Enengge og isaruk lit it ininggikmu werehon eneg og usul puk fug angge nin sebe roho og isarukmu anden yer isarikik.

⁴It ininggareg inindiyen enele ine roho nunubam heng uruk lit Allah umalikisi niren oho ler enebuhuken hit hinindiyen hiyag nisalihip urusa.

⁵Ininggikmu werehon eneg embelusa perukuk angge famen ininggikmu werehonet enebeyet sebe roho Ninikni Allah og utusa. Ninikni og utuk lit nit let neneptuson oho Allahn peruk ane roho let neneptuk latusa.

⁶Fano let neneptukmu yer isarukukteg Titus fam nenele ine roho hiyag utuk lit haren fanowon ak teberikinon ilanma obog tibik lamihin ulug hit henembeg monde fik wahe.

⁷Allah fam wenggel haruk lit wene hiyag isarukon men mun ane man ane alem honoluk teg lahebon men henesukun fano reg lit hinindi nenesug lahebon men ari roho turuk ane anggolo hit hunubam werehen tung inap hag toho wereg lit hinindi fano roho ap enenggengge elehon ler eneptuk lamuhup.

⁸Anden uruk lahi ane aru hit mingming henepmin ulug uruk lahi fug. Ap winonen enesukun fano roho turukon fahet hiyag hisaruk lit hinindi wirik toho wereg lit ap hinindi enesug lam teg ano ulug hunubabut tam wal hisaruk lahi.

⁹Nonowe Yesus Kristus hit indi henesug latisiyon ino honoluk atisi. Hit henenggengge eleg hinap welatikip angge famen anggolo foroho lamuhup, At anggengge anggolo foroho latfag angge famen hit fahet anggengge eleg ahun hag atfag.

¹⁰Ap ler eneptuk ane aru fahet an nundaman peruk lahiyon hit hininggareg fahet wenggel haruk lamuhuben hiyag hisaruk lahi. Alem aru hiren mo atamon fam ak teberikipteg hininggarehen obog tubuhuk perikip.

¹¹Hinindimu tila perikibon hininggik fam ketiya turuk lamek. Obog toho tuhuk peruk lit hininggik fam werehon ari hikit toho turuk lamuhup.

¹²Henesukun fano roho og usul puhubon hikit toho og isahupmu Allahn fano puhu. Hininggikmu elehonen emberukon oho Allahn yet hahu, hininggikmu werehonen emberukon oho Allahn yet hahu.

¹³Ap winonen anggin angge warukon og eneplihip ulug lisoho hit hunubam emberuk lahi fug. Hiret iret ambi roho waruk lamuhup ulug hunubam emberuk lahi.

¹⁴Hit hininggikmu oho it ininggikmu oho ambi roho foroho lamuhuben ketiya hit hininggikmu anggolo werehen it ininggikmu elehon werehap enebuhup. Fobik hit hininggikmu eleg halug iren hit hininggikmu werehap henebuhup.

¹⁵”Ap ekeyen anggolo andog tibahon ino alindik atfag fug. Ap ekeyen tor angge andog tibahon ino eleg atfag fug,” ulug haharoho imbibahon hikit toho peruk lamuhup.

¹⁶Allahn Titus asukun fanowap tirisimu anden peruk lahi ane hag toho aren oho hit fahet indimu we tem let henebuhuk peruk lit wereg. Ari peruk lit werehen Allah Nikni ulug wel turuk lahi.

¹⁷Anden Titus fam it enembeg lahun ulug hiyag itikikmu at inggareg indimuwen asukun fano roho enembeg lahuk perisi.

¹⁸At ino men ambiyeg wamuhubon nenere misig inowen wene hiyag isarukmu wene holtuk inap obog tohowen fano peruk latuson ino monde fik wahe.

¹⁹Wene hiyag isaruk ane fahet eneg unduhuk ferusa fug. Nenere ino nit men ambiyeg laruk lit Allah fahet emberukon foroho laruhu ulug wene holtuk inap arimanowen at unduhuk ferusa. Allahn it hinindi enesug lamuhup ulug mingming neneptisimu Ninikni Allah wel turuk lit aben nit fahet enesukun fano reg puhuben turuk lahe.

²⁰Allah olohotma anggolo emberuson niren foroho laheyon arimano fahet niren hirag tahup puk nowen at foroho laruhu ulug unduhuk ferusa.

²¹Unduhuk feruson ari Ninikni Allahn eneg fano puhu fug, aben oho fano pukag ulug wenggel harukukteg unduhuk ferukuk.

²²Nenere eke it men ambiyeg wamuhubon ubabut wal harukukteg aren turukmu hikir am teg perukukteg at ino it men monde fik wahe. Ketiya at inowen hiren nele holuhup peruk lit let henebuhuk ulug waruhu.

²³Titus ino an men ambi roho wene hiyag hisaruk ane fahet turuk lit welahe. Ap anggolowen Yesus unuk wel tukag ulug nonori piren itano wene holtuk inaben hit henembeg mon enebik wahasa.

²⁴It itano hi enebuhupteg fano wahasa puhuben hit honoluk amag ulug suwesingga tu emberuk lahi. Anden hit fahet Allah umalikisi welahep ulug it itano onolohotman wel heneptuk latikik. Tem toho irisi puhuben fano ane it unubam turuk lamuhupmu wene holtuk inap winonen oho onoluk amuhup.