Read Angguruk Yali GALATIA 1 Bible Online

GALATIA 1 - Angguruk Yali bible

GALATIA 1

¹Yesus Kristus inowen an Paulus nubam yonggo laruk laruhun ulug hiyag nitisiyon ino men an nori men tuma welaheyon obog tohowen hit Allah umalikisi Galatia kinang fam welahebon fahet suwesingga aru emberuk lahe. Ap kinangmonen unduhuk nubaharuk lit misihen oho mon naptisi fug. Yesus Kristus ino men Ninikni Allahn ap war atukon wereg ambehen olukap tibahon ino menen an unduhuk nubaharusa.

³Ninikni Allah men Nonowe Yesus Kristus menen hit fahet Inindi henesug lit hinindi yuwahap heneptuk lamuhup ulug sembahyang uruk lahe.

⁴Ninikni Allahn pibahon hikit toho kinang siyahon ketiya werehon aru famen windar enepmin ulug Nonowe Yesus Kristus ap ininggikmu atfareg siyag ane niren turukon fahet war atfag.

⁵At ino likiya hupmu wel turuk eneg lit welamuhup. Amin.

⁶Kristus inowen indi henesug ulug Allahn wol heneptisi angge famen hiren folo-folo henembol yig utuk lit wene amuwon holtuk lahep ane fahet yihi peruk lit nindi anggin toho welahi.

⁷Wene fanowon winon wereg eleg angge famen ap arimanowen hiyag hisaruk lit Yesus wene fanowon hebel-pebel isaruk lit hinindi nonghongap heneptuk.

⁸Niren ano malaikat poholma werehon misihen ano wene hiyag hisaruk halug niren tam hiyag hisarukuk ane men wirim teg eleg ane hiyag hisaruk ahun at ino war amag.

⁹Atam hiyag hisarukukon hag toho ketiya oho nin sebe roho anden hiyag hisamin: Ap misihen wene tam hiyag hisarukon holtikibon men wirim teg eleg ane hiyag hisaruk halug at ino war amag.

¹⁰Nori, hiren nangginoho peruk lahep? Anden wene hiyag isaruk lit ap kinangmon inindi enehiyehap eneptuk lahi ano? Allah indi ahiyehap turuk lahi ano? Ap kinangmonen an fano ulug wel nabukahon uruk lahi ano? Ap kinangmon enehiyehap eneple halug Kristus amingmingangge ale fug.

¹¹Nori, wene anden hiyag hisaruk lahiyon aru ap enele hiyag hisaruk lahi fug ulug nele ine roho hunubam uruk lahi.

¹²Wene ino ap kinangmonen hiyag nutuk lit milal naptuk latusa fug. Nowe Yesus Kristus ino amuwen eneg hiyag nitisi.

¹³An tam Yahudi inap enewene apma wereg lit turuk latikik ane hiren holtikip. Allah umalikisi mondabi siyahap enebuhuk ulug unusil laruk lit mug eneplug laruk latikik.

¹⁴Yahudi inap enewene an apma wereg lit nori winon ninibam misihon arimano enebe anggolo roho apma weregma an mondabi palimu unduhuk latikik. Ari roho wereg lit niniknisi unumbasiyen ibag ane nasukun fano roho holtuk latikik.

¹⁵An nisinga ahummuwen indag am fugmu Allahn indi niyarisireg An let naptuk laruhuwen mumal tamin perisireg wol naptisi.

¹⁶At fahet Allah unuk enepeleg inap Yahudi inap fuhon arimano hiyag isaruk laruhu ulug an nolohotman amloho unug harisi. Nubam unug harisi sambil ino anden ap kinangmon kapal isaruk lit nenele sahaltul perikik fug.

¹⁷An Yesus fahet noluk am fugmu ap yonggo laruk lamuhup ulug in eneptuson arimano o Yerusalem weregma enembeg lamin perikik fug. Ari perikik fureg o Arab kinangma larikikteg Damsyik suhuloho waharikik.

¹⁸Waharikikteg weregman mo hinahanam larisimu hun Kefas pen hamin ulug Yerusalem larikik. Larikikteg at ibam hup nuwal fimahen welatikik.

¹⁹Larikikteg wereg lit yonggo laruk lamuhup ulug in eneptuson arimano winon isarikik fug, we Yesus ot yuhon Yakobus ino eneg harikik.

²⁰Allah olohotman suwesingga emberuk lahiyon aru nele si emberuk lahi fug, we tem toho emberuk lahi.

²¹O Yerusalem wilip atikikteg o Kilikia men Siria men kinang fam larikik.

²²An larikikmu Allah umalikisi o Yudea werehon arimano an norohole fum toho niyarusa fureg enepeleg toho welatusa.

²³Atam nit nunusimin ulug mug neneplug laruk lit wene fanowon aren siyahap timin perisi ahun inowen wene hiyag isaruk urukon holtusa.

²⁴Aren ari turuk ulug an nubahet holtusareg Allah wel turuk latusa.