Read Angguruk Yali GALATIA 2 Bible Online

GALATIA 2 - Angguruk Yali bible

GALATIA 2

¹Mo ilig am wirig am turukmen nunggul hirikenam atisimu Barnabas men Titus men hondog eneplug nin o Yerusalem larikik.

²Allahn lahun ulug hiyag nitisiyon hikit toho larikik. Anden Yahudi inap fuhon arimano wene fanowon hiyag isaruk latikikon fahet wene onoluk inap men onowesi palimu werehon men palu atukukteg nenele sahaltuk latukuk. Anden turuk latikik ane men turuk lahi ane ari men saplangge turuk lahi fureg it inindi anggar amag ulug nenele sahaltuk latukuk.

³An men ambiyeg larukukon nare Titus ino fam Yunani ahun welatisi angge famen ambilahap paliyek ulug hiyag utusa fug.

⁴Nonori enele si uruk inap winon nit sapsabi kuruk latuson arimanowen eneg ambilahap paliyek ulug enele ine roho uruk latusa. It arimano nit sapsabi kuruk lit niniknisi unumbasiyen ibag ane pisan tulusa ano ulug kim nisaruk latusa. Yesus Kristus umalikisi we saplangge werehen niniknisi unumbasiyen ibag ane apma kilap eneptuk lit mingming eneptuk lamuhuk ulug kim nisaruk latusa.

⁵Mingming eneptuk lamuhuk perusa angge famen niren it enele atog warukuk fug. Wene fanowon ino hiren pikit toho holtuk lamuhup ulug enele atog warukuk fug.

⁶It onowesi palimu werehon arimanowen alem winon fahet oho enele ine roho mingming naptusa fug. Allahn te winon palimu reg, winon apma reg ulug onorohole haluk fug tehen anden oho it fahet ap sa hag toho wereg ulug wenggel harikik fug.

⁷Ari reg angge famen it onowesi palimu werehon arimanowen at Petrus enembilahap paleg inap wene hiyag isaruk laruhun ulug Allahn unduhuk ferisi hag toho hat Paulusen oho wene fanowon enembilahap paleg eleg inap hiyag isaruk laruhunen Allahn unduhuk hubaharisi ulug fag toho uruk latusa.

⁸Allahn Petrus fam enembilahap paleg inap enembeg yonggo laruk laruhun ulug ineyap tirisi hag toho an oho enembilahap paleg eleg inap enembeg yonggo laruk laruhun ulug nineyap naptisi.

⁹Yakobus men Kefas men Yohanes men wene holtuk inap iniknisi roho welatuson itanowen Allahn an indi nasug lit nubam emberisiyon ino onoluk atusa. Onoluk atusama nit men mangno roho welahe ulug an men Barnabas men nininggik sen neneptusa. Niren enembilahap paleg eleg inap enembeg wene hiyag isil larukmu iren oho enembilahap paleg inap enembeg wene hiyag isil laruk lamuhup ulug nenele sahaltukuk.

¹⁰Alem misig eneg nunubam heng neneptuson ari ap enengge elehon ler eneptuk ane fahet honoluk toho welamuhup ulug nunubam emberusa. Nunubam emberuson ari fahet nasukun fano roho ler eneptuk lit yami ruruk lahi.

¹¹Welatukukteg hun Kefas ino Antiokhia waharisimu aren siyag ane tirisiyon fahet fag toho pet tirikik.

¹²At inowen enembilahap paleg eleg inap men suburu naruk latisi angge famen Yakobus ori mon eneptisiyon arimano waharusama enembilahap paleg eleg inap wereg ambeg hur atmin fug ulug amu hur atuk latisi. It enembilahap palehonen pet nabusa ulug akolen amumu hur atuk latisi.

¹³Amumu hur atuk latisimu Yahudi inap winon arimanowen oho aren ket-ker ane turuk ane hikit toho turukmu Barnabas ino oho iren indi kahaltuken aren oho ket-ker ane turuk latisi.

¹⁴Iren ari roho turuk latusa ane wene fanowon men wirim teg elehon turukmu yer isarikikteg it obog toho enelukema Kefas fam fag toho hiyag utuk lit, ”Hat Yahudi hahun famen Yahudi inap hag toho welahen fug angge famen nungge fahet ap winon Yahudi inap hag toho welamek ulug inindi kahal eneptuk lahen?” ulug pet tirikik.

¹⁵Nit niniknisiyen indag neneptuk lit Yahudi ninap indag atukuk, Yahudi inap fuhon arimanowen siyag ane turukon hag toho indag atukuk fug.

¹⁶Musa wene fam haharehon hikit toho turukmu ap misihen oho indi pikit am fug teg ane ari nit nonoluk, we Yesus Kristus fam indimu wenggel harukon eneg indi pikit am teg. Niren Yesus fam wenggel haruk lahe ane ariyen ninindi pikit amag ulug At ubam wenggel haruk latukuk, Musa wene fam haharehon hikit toho turukmu ninindi pikit aruhu perukuk fug. Musa wene fam haharehon hikit toho turukmu ap misihen oho indi pikit am fug teg.

¹⁷Niren Kristus fam wenggeltuk ane ninindi pikit amag ulug yami ruruk lahe. Yami ruruk lahe angge famen siyag ane turuk inap hag toho niren oho turukmu Kristus ino siyag ane turukon alem ngi ahun wereg ano? Eleg-o nori.

¹⁸Musa wene fam werehon inowen fanowap nenebuk fug tehen anden tam halog toho apmayap tirikikon nin palimuwap tuhuk halug Musa wene fam haharehon pisan isaruk ahun hag toho unduhuk fat tahuk.

¹⁹Allah apma noluk welaruhuken Musa wene fahet war atikik. War atikik ane ari Musa wene inowen nuwatisi. Kristus men teltuk ahen fam ambiyeg tel neneptusa angge famen an noluk welahi.

²⁰An ninggareg namuwen noluk welahi fug, Kristus nubam weregma noluk welahi. Ap kinangmon welahi angge famen Allah amloho fam nindi wenggel haruk lahi ane ariyen noluk welahi. At inowen an indi niyaruk lit an fahet ap siyahon ininggikmu atfag.

²¹Ari fahet Allahn indi nasug ane anden miyaloho hik isa fug teg lahi. Musa wene fam haharehon hikit toho turukmu ap inindi pikit am hag teg lalepma Kristus ino saplangge war atlep.