Read Angguruk Yali GALATIA 3 Bible Online

GALATIA 3 - Angguruk Yali bible

GALATIA 3

¹Galatia hinap nori, henepelehen sohu-sohu ane turuk lahebon ari san hinindi hareyap heneptisi? Yesus e fam telfahon ino hit honolohotman seleg toho wirim tirikik fug?

²We alem misig kapal hisaminon aru fahet hebeloho hiyag nemek: Musa wene fam haharehon hikit toho turuk latikipmu Allahn hime fanowon og hisarisi ano? Wene hiyag hisarusama holtikipteg tem toho hinindimu wenggel harikipmu og hisarisi ano?

³Hiren sohu-sohu ane eneg turuk lahep? Allah hime fanowon fam ak teberikibon ari nininggareg ninine roho seneg lamuhuk peruk lahep?

⁴Hit hunubam atisiyon obog toho ari saplangge hunubam atisi? Nori, saplangge hunubam atisi fug.

⁵Allahn ahime fanowon og hisarisireg fano ane aben tuk fug teg ane hit sehelimuwen turuk latisi. Ari roho turuk latisi ane ari Musa wene fam haharehon hikit toho tirikip ane fahet turuk latisi ano? Wene hiyag hisarusama holtikipteg tem toho hinindimu wenggel harikip ane fahet turuk latisi ano?

⁶Abrahamen Allah fam indimu wenggel haruk latfag ane fahet Allahn at fahet fano peruk latfag. Alem ari fahet Abrahamen turuk latfag ane ulug haharoho imbibag.

⁷It Allah fam inindimu wenggel haruk inap arimano Abraham umalikisi wereg ulug honoluk toho welamok.

⁸Ap Yahudi inap fuhon famen Allah fam inindimu wenggel haruk halug Allahn inibil atuk lit ili og eneptukon fahet atam haharoho imbibag. Imbibag ane ari hikit toho Abraham fam wene fanowon hiyag utuk lit, ”Ap o pumbuk obog toho hat inindi hasug lamuhubon arimano mondabi fano welamuhup,” ulug hiyag itfag.

⁹Abraham Allah fam wenggel hibagma Allahn hi ribag hag toho ap obog toho inindi Allah fam wenggel harukon Allahn hi enebuhu.

¹⁰Ap Musa wene apma wereg inap arimano huluwap eneptuk lit komo yig isaruk ane apma wereg. Suwesingga atam haharoho emberuk lit, ”Ap san Musa wene fam mun ane man ane haharoho werehon hikit toho turuk eleg halug huluwap turuk lit komo yig umuhup,” ulug haharoho imbibag.

¹¹Musa wene fam haharoho werehon hikit toho turuk ane ariyen ap misig oho Allah alukema indi pikit am fug teg. Tam haharoho imbibag ane ari seleg atisi, ”Ap eke indi pikit toho werehon ino indimu Allah fam wenggel haruk lit wereg ane ariyen oluk teg lit welaruhu,” ulug haharoho imbibag.

¹²Musa wene fam haharoho werehon alem Allah fam indimu wenggel haruk ane wereg eleg. Ap san Musa wene ino hikit toho turuk halug eneg Musa wene ari fam oluk welam teg.

¹³Musa wene ino fam huluwap neneptuk lit komo yig nisaruken Kristus inowen windat nenepfag. Windat neneptuk lit nit fano amag ulug huluwap neneptuk lit komo yig nisaruk ane ino hebeloho inggareg ubam atfag. Atam haharoho emberuk lit, ”Ap sa e fam teleg lit weregma at huluwap turuk lit komo yig umuhup,” ulug hahareg lit wereg.

¹⁴Allahn Abraham hi ruruk lit sali imbibahon ino Allah unuk enepeleg inap winon ininggikmu aruhu ulug Yesusen ari tibibag. Yesusen ari tibibagma Allahn hime fanowon og hisahuk ibag ane hikit toho nit At ubam ninindimu we tem ulug wenggel harukon og nisarisi.

¹⁵Nori, aben turuk ane fam wirimangge eke hiyag hisamin. Ap ekeyen lin isaruk angge fahet ele hiyag isaruk lit teko lahu ane tu uruk halug ap ekeyen il misig oho pilaptuk lit il misig lahabuk fug teg.

¹⁶Abraham fam sali imbibahon ino inggareg fahet oho at famen ondohowonen ondohowon fahet oho imbibag. Abraham famen ondohowonen ondohowon ulug haharoho imbibag ane ari ap anggolo fahet haharoho imbibag fug. Abrahamen ondohowonen ondohowon ulug hahatfahon ari ap misig Kristus fahet ibag.

¹⁷Anden ihi ane ari iminon tu fahet ihi: Allahn teko lahu pibareg indam sali mondabi imbibag. Sali imbibareg weregman mo ilig am wirig am turukmu teng-teng angge 430 atfagma Musa wene ino inam atfag. Fobik inam atfahon inowen sali imbibahon ino teko lahu fug ulug elehap tuk fug teg.

¹⁸Allahn og isahuk ulug sali imbibahon ino we Musa wene apma wereg inap eneg og isahuk pelepman hahen tam Abraham fam sali imbibahon ino eleg alep angge famen Allahn Abraham fam nindiyen og huruhuk ulug sali imbibag ane hikit toho inggareg indiyen saplangge og itfag.

¹⁹Ari reg angge famen Musa wene nungge fahet hahatfag? Aben siyag ane turukon seleg amag ulug fobik hahatfag. Abraham fam sali emberuk lit ondohowonen ondohowon waruhu ulug imbibag ane hikit toho At waruhumu Musa wene ilamna werehon ino eleg aruhu. Musa wene ino malaikaren ap kinangmon pulmu unduhukon og itfagma aren ap fahet imbibag.

²⁰Ap pulmu unduhukon ino ap fumag-fumag werehon fahet pulmu unduhuk. Allah we misig werehen iraham ubalmangge eke unduhuk fuk fug teg.

²¹Ari roho weregma Musa wene men Allahn nindiyen saplangge og isahuk ulug sali imbibahon men ambi reg elegma hili reg ano? Eleg-o nori. Musa wene tam haharoho imbibahon ino fam ap onolukap enebuk hag teg lalepman Musa wene ino famen ap inindi pikit alep.

²²Ap inindi pikit alep angge famen suwesingga atam haharoho imbibahon ino hikit toho ap kinangma werehon obog toho siyahon apma kilap enepfag. Allahn og isahuk ulug sali imbibahon ino Yesus Kristus fam inindimu wenggel haruk ane ariyen ap tem toho wenggel harukon arimano og isahu.

²³Yesus Kristus ubam wenggel haruk li uwanma Musa wene inowen komo neneptuk lit nininggik hele waroho fet nenesug latfag. Kristus ubam wenggel haruk li inam aruhu ulug wanggi wat nenesug latfag.

²⁴Wanggi wat nenesugmu Musa wene ino fam komo neneptuk lit kul neneptukmu Kristus watfag. Watfagma Yesus fam wenggel haruk lit ninindi pikit atisi.

²⁵Yesus fam wenggel haruk li inam atfagma komo neneptuk lit kul neneptuk ahun apma welahe fug.

²⁶Yesus Kristus ubam wenggel haruk lahebon ariyen hit obog toho Allah umalikisi welahep.

²⁷Hit Kristus unuk fam ikma wambirikibon obog toho Kristus ino sum sukun taruk hag toho sukun tarikip.

²⁸Sum fanowon suknig lahebon ariyen Yahudi inap men Yunani inap men ap enemingmingangge men enemu unduhuk inap men ap men hiyap men hili-hili welam fug tehen Yesus Kristus fam hit obog ambi roho welahep.

²⁹Hir oho Kristusen tohon wereg lahepma Abrahamen ondohowonen indag henesuhon welahep. Allahn sali imbibahon ino hir oho ngi amuhup.