Read Angguruk Yali GALATIA 4 Bible Online

GALATIA 4 - Angguruk Yali bible

GALATIA 4

¹Anden fahe hiyag hisihi ane fahet nin sebe roho hiyag hisamin: Ikniyen lin isaruk angge ngi atuk umalik ebe totma aben komo ruruk lit kultuk. Mun angge man angge ikniyen tohon ngi reg angge famen ap enemingmingangge hag toho wereg. Malik ebe ikniyen pibahon hikit toho su atug ikniyen tohon arimano ngi aruhu.

³Ari roho nit men wirim teg. Nir oho nenebe totma kinang seneg lahe perukon arimano enepma wereg lit enemingmingangge welatukuk.

⁴Allahn teko lahu pibag sul ino inam atfagma amloho monde fibahon ino hiyap eke famen indag atfareg Musa wene apma atfag.

⁵Allahn ap Musa wene apma werehon windar enebuhu ulug amloho monde fibagma nir oho At umalikisi atukuk.

⁶Hit Allah umalikisi welahepma Allahn amloho ahime fanowon ino nunubam emberisimu ninindi anggar atisi. Hime fanowon inowen, ”Niyon, Nikni,” uruk lit heng turuk.

⁷Ketiya hit welahebon amingmingangge welahep fug, umalikisi welahep. Umalikisi welahebon ariyen Allahn anggengge og hisahumu hir oho ngi roho welamuhup.

⁸Indam Allah henepelegma Allah fug famen palimu welahe urukon enemingmingangge welatikip.

⁹Ketiya hiren Allah fahet honoluk atikip. Nori, hebeloho fano roho imin: Allahn hit fahet oluk atisi. Hit fahet oluk atisi angge famen nungge fahet kinang seneg lahe perukon inine elehon enenggengge elehon arimano hebeloho inibil laruk lahep? Nungge fahet enemingmingangge amul peruk lahep?

¹⁰Hup eke sakan tirikim usa uruk lahep, pikalem eke inam atikim usa uruk lahep, mo ilig am wirig am turukon fahet usa li inam aha uruk lahep.

¹¹Anden hit fahet asengseng ane turuk lit sat harikikon saplangge tirikik peruk lahi.

¹²Nori, an hit hag toho atikikteg hir oho an hag toho amuhup ulug heng heneptuk lahi. Hiren misihim oho siyag ane an nubam tirikip fug.

¹³Ouk nubam weregma atam wene hit hiyag hisarikikon ino hit honoluk.

¹⁴An nubam ouk atisi ane fahet siyahonen wal hisarukmu hiren ninirim ulug umbusuk angge famen an fahet siyag perikip fug. Siyag perikip fureg malaikat Allahn monde ferukon hag toho hiren an hondoko kilap naptikip. Yesus Kristus ino hondoko kilaplep hag toho an kilap naptikip.

¹⁵Hondoko kilap naptikip sambil ino henehiyeg anggolo roho welatikip angge famen henehiyeg harikip ane ketiya kema wereg? Hinil hililuk teg lalepma hililoho an og netebon fahet fag toho ap hiyag isa reg lahi.

¹⁶We tem ane anden hit hiyag hisaruk lahiyon ari fahet hit men seli atukuk?

¹⁷It arimano inindi misig toho wereg eleg anggeyen hit hininggik lit henebul ulug yami heneptuk. Hit an min nininggik ahandip toho welahe ane kong tebeseruk lit nit nonombolim wamag ulug iren hit hininggik lit heneptuk.

¹⁸Alem fanowon fahet ap winonen hininggik lit heneptuk halug ari fano peruk lahi. Fano peruk lahi angge famen an hit sehelimu weregma eneg fug, likiya hupmu alem fanowon fahet hininggik lit heneplepma ari fano.

¹⁹Nori an numalikisi, hiyaben malik indag tuk oho lit ouken nenek turuk hag toho anden oho hit fahet ouk waruk lit nin sebe roho indag heneptuk lahi. An nubam ouk weregman eneg Kristus ubabut fanowon hit hunubam aruhu.

²⁰An ketiya hit sehelimu welale peruk lit nele olok toho uruk lahi ane fanowap ta hag teg lale peruk lahi. Anden hit hunubam nungge ane tihi ha reg, napeleg toho welahi.

²¹Nori, Musa wene apma welamuhuk peruk lahep angge famen Musa wene holtuk lahep fug? Ari hiyag nemek.

²²Abraham umalikisi piren indag atfahon fahet tu haharoho imbibag: Amingmingangge hilibahonen umalik misig, uhe yuhonen umalik misig, piren indag enepfag.

²³Hiyap amingmingangge hilibahonen malik indag tibahon ino ap ahaluwe fam indag tibagma uhe yuhon famen malik indag tibahon ino sali imbibahon hikit toho indag tibag.

²⁴Hiyap piren itanowen tibag ane ari wirimangge ulug wenggel haruk lamuhup. Allahn sali piren imbibahon itano fam hiyap piren itano men wirim teg: Sali misig Sinai punu fam imbibahon ino umalikisi ap enemingmingangge amuhup ulug indag enepfahon ari Hagar men wirim teg.

²⁵Hagar urukon ari Arab kinang fam werehon arimanowen Sinai punu fahet uruk. O pumbuk Yerusalem ketiya werehon ino fam wereg inap obog toho ap enemingmingangge werehen Hagar ino men wirim teg.

²⁶Yerusalem poholma werehon ino uhe yuhon ino men wirim tehen at ino nit ninisinga wereg.

²⁷Ari fahet haharoho imbibahon te tu, ”Malik indag ta fug angge ibili atuk lahenon hahiyeg toho welaruhun. Malik endebuk oho lit ouken nenek turuk ane hubam atisi fuhon hahiyeg toho wereg lit yunggultuk laruhun. Hiyap ahunen embeserisiyon inowen malik anggolo enderuhumu hiyap ahun werehonen malik tor angge enderuhu.”

²⁸Nori, Allahn ele sali imbibagma Ishak indag atfag hag toho hit welahep.

²⁹Atam malik ap ahaluwe fam indag tibahon inowen malik Allah hime fanowon ino fam indag tibahon ino watmin ulug mutug laruk latfag hag toho ketiya oho ari turukmu welahe.

³⁰Suwesingga atam haharoho imbibahon fam nungge ulug hahatfag? ”Hiyap hamingmingangge amloho men huhe yuhon amloho men ambiyeg wereg lit hanggengge ngi amuhup tohon hamingmingangge amloho men yanggal enebin,” ulug haharoho imbibag.

³¹Nori, nit ketiya welaheyon hiyap amingmingangge ino umalikisi welahe fug, uhe yuhon ino umalikisi welahe.