Read Angguruk Yali GALATIA 5 Bible Online

GALATIA 5 - Angguruk Yali bible

GALATIA 5

¹Kristus inowen nit nunubam angginon werehon seyap neneptisimu nunubam se roho welahe. Hit hunubam seyap heneptisiyon ino hinine roho seneg lit hunubam angginon emberukon ino apma suhuloho kuhuk puk fug.

²An ninggareg Paulusen hit hunubam uruk lahiyon tu: Hiren nenembilahap pal neneplihip uhup halug Kristus ino hit fahet welam fug teg.

³Anden nin sebe roho uruk lahiyon aru: Ap sa nambilahap pal nabukag uruk halug Musa wene fam werehon obog toho turuk laruhu.

⁴Musa wene fam ninindi pikit aruhu peruk lamuhup halug Kristus hininggik kobog isaruk lit Ninikni Allah indi nenesuhon ino oho ambol fil welamuhup.

⁵Allah hime fanowon nunubam weregma Kristus fam ninindi wenggel harukon fahet Allahn ili og neneptuk lit ninindi pikirap nenebuhu ulug nangno ruruk lahe.

⁶Yesus Kristus men mangno roho werehon arimano enembilahap palehon oho paleg elehon oho alem hag toho wereg eleg. Kristus ubam wenggel haruk lit ap inindi enesug ane inam atukon palimu reg.

⁷Tam fano roho welatikip angge famen ap san hinindi ninap heneptuken tem toho uruk ane hininggik kobog isarikip?

⁸Hit wol heneptisiyon inowen imbisiyek ulug hiyag hisarisi fug.

⁹Pali sig turukon seni men mangno roho esetuk halug seni obog toho unduk siyag turuk.

¹⁰Nonowe fam mangno roho welahema hiren oho amu ane peruk lamuhup fug ulug anden tem toho hit fahet peruk lahi. Ap san hit hinindi nina feseruk halug at ino alem angginon ubam aruhumu ha ruhu.

¹¹Nori, nungge fahet an nuwabul ulug mug naplug laruk? Anden ambilahap paltuk awene hiyag isaruk lalema nuwatep fug. Ambilahap paltuk awene hiyag eselema teltuk ahen fahet helep atohen unuyug sultuk toho unuselep fug.

¹²Hit hinindi nina feseruk inap arimano unuwali og eneplepman fano.

¹³Nori, hit hunubam anggin toho welam fug angge se roho welamag ulug Allahn wol heneptisi. Wol heneptisimu nit nunubam angginon elehen se reg lahereg siyag ane tehe ha reg lahe puk fug. Hit-hit honori men hinindi roho wereg lit let-ler atuk lamuhup.

¹⁴Musa wene haharoho werehon ino obog toho misig aru fam hahareg lit werehon te, ”Hinggareg hindi reg lahen hag toho hori winon oho hindi enesug laruhun.”

¹⁵Hit-hit yun pal-pal atuk lit pil isaruk lamuhup halug hit-hit isag-isag amuhup tohon honoluk toho welamuhup.

¹⁶Anden fahe hiyag hisihi ane fahet nin sebe roho hiyag hisamin: Allah hime fanowon inowen milal heneptukmu mun ane man ane turuk lit hit ap kinangmon hinindimuwen tila peruk ane turuk lamuhup fug.

¹⁷Ap inindimu wenggeltuk ane ariyen Allah hime fanowonen wenggeltuk ane apmayap timin peruk lit weregma Allah hime fanowon inowen wenggeltuk ane ariyen ap inindimu wenggeltuk ane apmayap timin peruk. It piren itanowen ari turuk lit seli roho werehen hiren tila peruk lahep ane tuk fug teg lahep.

¹⁸Allah hime fanowon inowen hit sen henesug laruhumu Musa wene apma welamuhup fug.

¹⁹Ap kinangmonen turuk ane selehon te tu: Pabi ane turuk lit sabelep unubam tag tohon men inindimuwen hilila perukon men

²⁰usa ane turuk lit sik war eneptukon men hit-hit honori men seli roho wereg lit hili roho werehon men tu helele ari helele perukon men ap per eneptuk lit inggareg fahet eneg wenggel harukon men suwahal uruk lit ap uwag yinggoho werehon men

²¹aben angge nangge lalep perukon men ik olokon nalug nenek turuk lit abuwap fahet eneg wenggel harukon men ari hag toho nin winon eke wereg. Obog toho ihiyon aru indam oho komo heneptikik hag toho ketiya oho hiyag hisaruk lahi. Ap san ari hag toho turuk laruhu halug at ino Allah wereg ambeg kuhu fug.

²²Hime fanowon ap fam wereg lit anggen yihik ferukon te tu: Ap inindi enesug lit enehiyeg toho werehon men inindi hondo reberuk lit mangno roho werehon men fano ane eneg wenggeltuk lit indi fano roho werehon men Allah fam indi fano roho wenggel harukon men

²³indi wiyig toho werehon men ubabut haloho werehon men obog toho arimano fahet uruk lahi. Anggen fanowon aru yihik feruk inap arimanowen Musa wene fam telep fug ibag ane pisan isaruk elehen alem unubam am fug teg.

²⁴Ap sa Yesus Kristus inowen ngi roho werehon arimano inindimuwen hilila peruk lit tila perukon men inindi miningon men teltuk ahen fam mangno roho tel eneptusa.

²⁵Hime fanowon Allahn nunubam emberisimu hime inowen sen nenesugmu mun ane man ane tul peruk lamuhuk.

²⁶Aben wel nenebukag ulug hemetog til noruk lamuhuk fug. Nit-nit sohobol-sohobol atuk lit nininggarehen angge fahet nenengge lalep puk fug.