Read Angguruk Yali GALATIA 6 Bible Online

GALATIA 6 - Angguruk Yali bible

GALATIA 6

¹Nori, ap misihen siyag ane turukmu yet hahupteg hit Allah hime fanowon hunubam werehonen ap ino kebunggalem pikiron fam hondoko emberuk lamuhup. Kebunggalem pikiron fam hondoko emberuk lit henele fano roho komo ruruk lamuhup. Hit hininggareg siyahonen wal hisahu rohon kahaleg lit welamuhup.

²Hit hunubam angginon werehon ari let-ler atuk lit paya roho waruk lit Yesusen wene komo emberisiyon ari hikit toho turuk lamuhup.

³Ap misig palimu wereg eleg angge famen an palimu welahi peruk ahun ino inggareg ubabut haleg eleg anggeyen siyahap taruk.

⁴Ap obog toho wal taneg arimanowen ininggareg ininggik fam turuk ane fahet fano tibihi ano ulug fuki roho kim haruk lamuhup. Fuki roho kim haruk lit ap winonen turuk ane yet halug wirim tuk fug angge at inowen inggareg inggik fam turuk ane fahet wel taruk lamag.

⁵Ap wal taneg Allahn kapal isahuwon fahet iren oho wal taneg hebeloho hiyag utuk lamuhup.

⁶Wene fanowon hiyag isarukmu holtuk inap arimanowen mun angge man angge ininggikmu wereg angge arimano minggiroho hiyag isaruk inap og isaruk lamuhup.

⁷Aben Allah ele ying tuk fug tehen hininggareg hinindi ninap ta fug. Aben ei yag taruk angge ebe yahal taruk lamuhup.

⁸Ap san ubabut siyahon fam yaho fat taruk halug ubabut siyahon inowen war atuk ane inam aruhu. Ap san Allah hime fanowon fam yaho fat taruk halug hime fanowon inowen mondabi oluk welaruhu ane inam aruhu.

⁹Fano ane eneg turuk lit sat ha fug angge turuk lamuhuk. Ninine eleg atuk eleg halug li waharukmu ebe fanowon yahal taruk lamuhuk.

¹⁰Welahe li ariya turuk lamuhukon ap obog toho unubam fano ane turuk lit nonori Yesus fam wenggel haruk inap wereg halug it unubam fano ane anggolo turuk lamuhuk.

¹¹Nori, ninggareg ninggik fam suwesingga ubale hum toho hahare feruk lahiyon aru kim haruk lamuhup.

¹²Henembilahap paliyek ulug mingming heneptuk inap arimanowen we ininggareg ininggik fam turuk ane fahet aben wel nenebukag peruk. Yesus e fam telfahon ino umalikisi wereg ulug unusul ulug mug eneplug laruk ane ninirim peruk.

¹³Ininggareg enembilahap palep angge famen Musa wene fam haharoho imbibahon fuki roho holtuk eleg. Nit nenele holehesa ulug it wel tubat tahuben hit hunubam henembilahap paliyek ulug mingming heneptuk.

¹⁴Yabuk ekeyon-ekeyon turuk lahiyon fahet an ninggareg wel ta fug angge wereg lit Yesus Kristus e fam telfahon ino fahet eneg wel tihi ha reg lahi. At ino e fam telfagma mun angge man angge kinangma werehon arimano warehon hag toho wereg peruk lahi. Mun angge man angge kinangma werehon fahet an oho e fam tel naptusama warehon hag toho welahi.

¹⁵Enembilahap palehon oho paleg elehon oho alem hag toho werehon elegma ap inindi keron indag atukon ari eneg alem hag toho wereg.

¹⁶Ap obog toho alem haloho imbibahon aru hikit toho turuk lamuhubon arimano Israel inap Allahn mumal eneptisiyon hag toho wereg. Allahn it arimano mangnowap eneptuk lit inilaheg ulug ili og eneptuk laruhu.

¹⁷An Kristus anggengge welahimu nebene enehangge werehen fobik ap misihen oho nindi angginap nabuhu fug.

¹⁸Nori, Nonowe Yesus Kristus indi henesug lit hit men mangno roho welaruhu. Amin.