Read Angguruk Yali EFESUS 2 Bible Online

EFESUS 2 - Angguruk Yali bible

EFESUS 2

¹Indam hiren tuk fug ane siyag ane turuk lit ap warehon hag toho welatikip.

²Kinangma tuman kebunggalem siyahon laruk lit siyahon apma welatikip. Siyahon kinang ine roho seneg lit werehon ino aben yet ha fug tohon famen ele holtuk latikip. Holtuk latikip hag toho Allah wene fanowon holtuk eleg inap arimano hime siyahon inowen ketiya sen enesug lit wereg.

³Niren oho indam siyag toho wenggel haruk lit siyahon kinangma werehon fahet tu hilila ari hilila peruk latukukon ari famen siyahon apma it men sebe roho welatukuk. Nunubabut siyag toho welatukukon ari famen iret niret Allahn nunuselep.

⁴Nunuselep angge famen Allahn indi anggolo nisaruk lit At indi fanowonen inilaheg perisireg

⁵Kristus men mangno roho nonolukap neneptisi. Siyag ane turuk latukukon ariyen ap warehon hag toho welatukukmu Allah indiyen nit fanowap neneptisi.

⁶Kristus men mangno roho nonolukap neneptisireg poholma nit welamuhuk ambeg nunubale hale nunubaharisimu kolo reg lit wereg.

⁷Ari teberisimu ap kinangma obog toho welaheyon oho welamuhubon oho onolohotma Allah indi anggolo nisaruk lit Yesus Kristus nit fahet monde fibag ulug onoluk aruhu.

⁸Allahn indi hisaruk lit hiren tem peruk lahep ane ariyen Allahn hit fanowap heneptisi. Hit hininggarehen yami ruruk lit hiyag tarikip fug, Allahn og hisarisi.

⁹Nininggareg nininggik famen turuk lit hiyag tarukuk ulug henewelwel taruk lamuhup fug.

¹⁰Fano ane Allahn tam pibahon hikit toho hiren turuk lamuhup ulug Allahn nit werehap neneptuk lit Yesus Kristus fam wal nenepfag. Fano ane niren turuk lit welamuhup ulug Allahn indi perisireg wol neneptisi.

¹¹Nori, hit indam welatikip ane fahet hinindimu honoluk toho welamek. Yahudi inaben hit fahet enele sahaltuk lit enembilahap paleg elehon wereg ulug henebug uruk latusa. Ininggareg fahet nenembilahap paleg ninap uruk angge famen we ap kinangmon ininggiken turuk ane fahet uruk.

¹²Indam hit Kristus apma uwan kuk fug angge wereg lit Allahn numalikisi og isahuk ulug sali palfag ane hit hununggul unuk Israel elegma selma welatikip. Ap san fanowap nenebuhu ulug hinindi nonghong uruken kinangma tuma ninikni eke eleg peruk lit welatikip.

¹³Indam henepeleg toho wereg lit yatma welatikip angge famen ketiya Kristus amep fam horogma atikipteg At apma welahep.

¹⁴Aren mangnowap neneptuk lit onori men hili roho welamuhuk ulug elehet wibahon ino halog tibareg Yesus war atfahon ino fam misihap enepfag.

¹⁵Musa wene fam ap komo eneptuk ane haharoho imbibahon arimano Aren elehap tibag. Hili roho werehon mangnowap eneptuk lit ap inindi keron hag toho welamuhup ulug At war atfahon ino famen mangnowap enepfag.

¹⁶Hili angge ari Aren elehap turuk lit enebe misig welamuhup ulug Yesus telfag ane ari famen Allah men mangnowap enepfag.

¹⁷Hit yatma welatikibon men it horogma welatuson men hunubam Aren wene fanowon hiyag hisaruk lit, ”Allah men mangno atikip,” ulug hiyag hisarisi.

¹⁸Nit nenebe minggiroho welatukukon Allah hime fanowon ino fam Aren mangnowap neneptisireg Ninikni ambeg larukon Aren kebunggalem hal nisarisi.

¹⁹Kebunggalem hal nisarisimu ketiya hit pohon kik waharuk inap hag toho welahep fug. Allah apma wereg inap arimano men inibam yugmu ambiyeg mangno roho wereg lit owe ot hag toho ketiya Allah umalikisi welahep.

²⁰Hit hinibam ketiya welahebon Yesus otsi Aren mon enepfahon men wene tam hiyag isaruk latfag inap nabi men olun hag toho weregma Kristus o uwag hag toho wereg.

²¹At o uwag weregma o ino yuk tuk fug angge ine reg lit weregma o ino wir aruhumu Allah ibam fanowon aruhu.

²²O ari fam Kristus men mangno roho wereg lit hir oho undamangge wir amuhupmu Allah hime fanowon palimu weregma Allah ibam welaruhu.