Read Angguruk Yali EFESUS 3 Bible Online

EFESUS 3 - Angguruk Yali bible

EFESUS 3

¹An Paulus welahiyon aru At Yesus Kristus ot ulug hele waroho penjara kilap naptuson inowen hit Allah unuk henepeleg toho welatikibon fahet Allah fam sembahyang uruk lahi. An hele wat naptusa ane ariyen hit fano amuhup.

²Ninikni Allah ap obog toho indi enesug lit werehon inowen hit fahet wene hiyag isa lawag ulug an unduhuk nubaharisiyon holtikip.

³Allahn undama hirako pibag ane an nubam inama ferisi ane fahet suwesingga tu palimu il misig imbihi.

⁴Allahn Kristus fahet undaman pibag ane ari an nubam inama ferisimu nindi anggar atisireg tot noluk teg lahi ane ari fahet suwesingga emberuk lahiyon aru uruk lit hir oho honoluk aruhu.

⁵Allah undaman pibag ane ari fahet ap kinangmon atam welatfag inap unubam inam atfag fug. We ketiya Yesus otsi men ap ketiya wene hiyag isaruk inap nabi men Allah hime fanowon og isaruk lit inama ferisi.

⁶Inama ferisiyon ari Allah unuk enepeleg inap inggarehen numalikisi og isahuk pibahon ir oho fibir enebuhu. Fibir enebuhumu Yesus ebe weregma ir oho inggik uyug amuhup. Allahn Yesus Kristus fam sali imbibahon ino it fahet oho imbibag.

⁷Allah ine werehon inowen an indi nasug lit nineyap naptisireg wene fanowon ap hiyag isa lahun ulug mingming naptisi.

⁸Allah umalikisi sehelimu an oho siyag nahun welatikik angge famen Allahn indi niyarisireg Yesus Kristus anggengge fanowon winahuk fug toho werehon arimano Allah unuk enepeleg inap hiyag isa lahun ulug nubam emberisi.

⁹Allahn mun angge man angge wal tibareg undaman pibag ane ap indam welatfahon unubam awiya oho latfahon teko lahu ane aren fag toho hiyag isahu ulug unduhuk nubaharisi.

¹⁰Wene holtuk inaben wene urukmu aben yet haruk elehonen ap enele yong eneptuk lit inine anggolo roho werehon arimano inindi anggar atuk lit Allah mun ane man ane oluk tehon ino fahet onoluk aruhu.

¹¹Ihi ane ari fahet Allahn atam pibahon ino hikit toho Nonowe Yesus Kristus ubamen teko libag.

¹²Wene ninindimu weregma tem toho peruk lahe ane ariyen ninindi se roho wereg lit Allah ambeg laruk abunggalem haleg lit wereg.

¹³An ninggik hele waroho wereg lahi ane fahet hinindi anggin toho welam fug ulug heng heneptuk lahi. An hele wat naptusa ane ariyen Allahn hit fanowap henebuhu.

¹⁴Mun angge man angge lebe ruruk angge lebe ruruk eleg angge poholma werehon kinangma werehon At ubamen wilip atfagma ununuk suwal enepfag ahun ino fam Nikni uruk lit sembahyang imin ulug nelenggen fam hur atuk lahi.

¹⁶Allah anggengge fanowon anggolo werehon inowen ahime fanowon fam hinineyap heneptuk lit hinindi wirikap henebuhu ulug ubam sembahyang uruk lahi.

¹⁷Kristus indi henesuhon ino kinang fanowon hag toho weregma hit hunumanggen At ubam yaho feruk lit At ubam welahe ulug hinindi haruk lamuhup.

¹⁸Kristus inowen nit ap kinangmon indi nenesug lit werehon fahet kinangma wereg angge nungge fam wirim tuk fug teg. Pohol men kinang men yatma wereg peruk lahe angge famen Kristus apma eneg wereg ulug hit men wene holtuk inap obog toho arimano men hinindi anggar amag ulug sembahyang uruk lahi.

¹⁹Mun angge man angge alem nonoluk peruk ane ari obog toho Kristus indi nenesuhon apma eneg wereg. Alem obog toho Allahn seneg lit weregma hiren At ubam wenggel harukmu Aren hit henebe henehime obog toho sen henesug laruhu.

²⁰Allahn nit og nisarukon ari niren wenggel halug heng turuk laheyon men ambi reg eleg. Ninikni mun angge man angge anggolo og nisarukon inowen ninindi anggarap neneptisimu seleg aha.

²¹At suwon ulug wene holtuk inap ketiya werehon men Yesus Kristus unuk fam fobik welamuhubon menen oho Allah mondabi wel turuk lamuhup. Amin.