Read Angguruk Yali EFESUS 4 Bible Online

EFESUS 4 - Angguruk Yali bible

EFESUS 4

¹An Nikni unuk fahet penjara kilap naptuson inowen hit komo henepminon tu: Allahn An numalikisi amuhup ulug mumal heneptisi ane hikit toho welamuhup.

²Hinindi apma roho wiyig toho wereg lit hinindi imbik wamburuk lamuhup. Ap winon ler eneptuk lit hinindi enesug lamuhup.

³Allah hime fanowon inowen mangnowap heneptisimu hiren mangno atuk ane yami ruruk lamuhup.

⁴Hime fanowon misig apma henebe misig mangno roho wereg lit misig ane roho peruk lit yet teg lamuhup ulug wol heneptisi.

⁵Nonowe misig, tem peruk ane men ikma pilap eneptuk ane men misig,

⁶mun angge man angge Inikni Allah misig eneg wereg. Poholma werehon obog toho Allahn wal tibareg inggareg walinggoho weregma misig oho selma welam fug teg.

⁷Nit welaheyon aruma Kristus inowen wirim nisarisireg indi nisaruk lit wal taneg og nisarisi.

⁸Og nisarisiyon fahet haharoho imbibahon tu imin, ”At ibam wereg ambeg palimu lahamin ulug seliyon ininggik hele waroho hondog eneplug lahibag. Lahibareg Aren fano-fano angge ap fibir eneptuk latfag,” ulug haharoho imbibahon wereg.

⁹Lahibag ane haharoho weregma tam kinangma waleg apma wambik watfareg lahibag fug?

¹⁰Wambik watfahon ino suhuloho lahik oho lit mun angge man angge pohol atogman atogma werehon seneruhuk ulug lahibag.

¹¹Fibir eneptuk lit it ap winon unubam, ”Notsi, hit mon henebuhuk”, it winon unubam, ”Fobik aruhu ane fahet ap hiyag isaruk lamuhup”, it winon unubam, ”Wene hiyag isa laruk lamuhup”, it winon unubam, ”Wene holtuk inap fer enesug lamuhup”, it winon unubam, ”Ikma wamburukon milal eneptuk lamuhup,” ulug hiyag isarisireg in eneptisi.

¹²In eneptisiyon arimanowen Allah umalikisi wene holtukon iniyabuk fano roho wituk lamuhup ulug wanggun ininggikmu umbukag ulug in eneptisi. Kristus ebe weregma hit wanggun hininggikmu senehon arimano At inggik uyug hag toho fano roho welamuhup.

¹³Nit arimanowen tem toho ubam wenggel haruk lit nenebe misig toho At min mangno roho wereg lit Allah amloho fahet nonoluk toho welamuhuk. Ap suwon inindi anggat teg hag toho nir oho ninindi anggat toho wereg lit e ubahare fituk hag toho nir oho Kristus ineyon ino apma wereg lit fituk lamuhuk.

¹⁴Wene eke hag eke hag hiyag nisarukmu siyeluwen e ondomi mulilik la mulilik wam turuk hag toho welamuhuk fug. Malik toron indi anggat teg eleg angge weregma aben indi nina feseruk lit enele si uruk lit funggalem siyahon hondog eneplug laruk hag toho welamuhuk fug.

¹⁵Ninindi misig weregma pikir ane eneg seneg lit ap ninindi enesug lit Kristus ino nununggul weregma At fil amuhukteg fituk lamuhuk.

¹⁶Unggul palimu weregma ebe abirangge umanggenen ahandip tegma ine roho weregma inggik uyuhen tuk teg ane turuk halug ebe fano roho fituk lit weregma nonori ninindi enesug lit fano welamuhuk.

¹⁷Ninikni Allahn ari roho komo eneptuk laruhun ulug hiyag nitisimu nele ine roho hiyag hisaruk lahi. Ap Allah wene wenggel ha fug angge wereg lit sibiling-sibiling ane uruk inap hag toho welamuhup fug.

¹⁸It inindimu hik teg lit wereg, inindi ebet ha fug angge wereg lit sohu-sohu ane eneg turuken Allah men ambimu welam fug anggeyen yatma enemu wereg.

¹⁹Siyahon tu fanowon tu ulug inindi wenggel ha fug anggeyen pabi ane til noruk lit inindi fano reg eleg angge enebuwap fahet eneg wenggel haruk.

²⁰Hit Kristus honoluk teg lahebonen ari roho peruk lamuhup fug.

²¹Hit Kristus fahet holtikipteg At awene hiyag hisarukmu wenggel harikipteg Nonowe Yesus tem toho peruk lahep.

²²Hiren tu helele ari helele wenggel haruk lit indam turuk latikibon inowen henele yong heneptuk latisimu hinindi filik turuk latisiyon nonggoloho embeseruk lamuhup.

²³Hiren wenggel haruk latikibon eleg atisimu hinindi keron hilaruk lamuhup.

²⁴Allahn indi wenggel harisireg ap keron ubabut fanowon indi pikiron wirim harisi. Allahn wirim harisiyon ino hiren wan turuk lamuhup.

²⁵Honori hit men werehon unubam henele si uk fug anggeyen fuki roho eneg uruk lamuhup. Nit nenemu-nenemu welahe fug, nununggul misig weregma inggik uyug welahe.

²⁶Hinindi ahe laharuk halug honolok ane tuk fug. Hinindimu honolok weregman eneg mo ubuk uhu fug.

²⁷Iblis wamag ulug kolowap tuk fug.

²⁸Yoholiyangge waruk hinap welatikibon fobik eke yoholiyangge wahup fug. Ap enenggengge elehon hiren minggiroho og isaruk lamuhuben hininggareg hininggik ine roho yabuk fanowon wituk lamuhup.

²⁹Henembilik fam henele siyahon uk fug. We fano ane ila perukon eneg uruk lit ap onggon eneptuk lamuhupmu henele holuhupteg inindi fano amuhup.

³⁰Allahn mondabi fanowap henebuhu sambil ino fano welamuhuben hit fahet enehangge embemin ulug ahime fanowon og hisarisimu At indi siyahap tuhup fug.

³¹Hinindimu siyag werehon, hinal ke het laruk lahebon, honolok harukon, henele hum toho urukon, ap enebug urukon, ari obog toho umbusuhup. Siyag-siyag ane obog toho tuk fug.

³²Hit-hit fano ane turuk lamuhup, hit-hit hinindi reg lit welamuhup. Hiren siyag ane tirikibon Allahn Kristus amep fam ambolma emberisi hag toho honoriyen hunubam siyag ane turukon henembolma embeseruk lamuhup.