Read Angguruk Yali EFESUS 5 Bible Online

EFESUS 5 - Angguruk Yali bible

EFESUS 5

¹Hit Allah umalikisi Aren indi henesuhon wereg lit At ubabut fanowon ino hikit toho hir oho hunubabut fano roho turuk lamuhup.

²Kristus inowen hit indi henesug hag toho hiren oho honori hinindi enesug lamuhup. Niren Allah ahiyehap tul ulug hubu lahapla angge famen Yesus nit fahet nebe nuwabukag pibahon fam onggo pal nisibag.

³Pabi-pabi ane til noruk lit siyag ane eke hag eke hag turuk lit enebuwap fahet eneg til noruk lit wereg ulug aben hit hunubahet ari uruk lamuhup fug. Allah umalikisi wene holtuk inaben tuk hag teg ane turuk lamuhup.

⁴Henele siyahon men sibiling-sibiling ane urukon men ininggali ane urukon men uk fug teg ane uruk lahe ulug obog toho embeseruk lit Allah fam Ninikni uruk lit sembahyang uruk lamuhup.

⁵Pabi-pabi ane turuk inap men siyag ane turuk inap men enebuwap fahet eneg turuk inap arimano men usa ane turuk inap hag toho wereg lit Allah men Kristus men wereg ambeg it arimano obog toho kuk fug teg ulug hinindimu honoluk toho welamuhup.

⁶Aben enele si hunubam uruk lit hinindi ninap heneptukmu holuk fug. Enele si uruk inap arimano Allahn siyahap enebuhuk ulug olok ane unubam umbuhuwen

⁷hit siyag ane turuk inap men mangno roho welam fug.

⁸Hir oho indam hik tegma welatikip angge famen ketiya Ninikni Allah umalikisi roho wereg lit seleg tegma welahep. Hit seleg tegma wereg lit seleg ane eneg turuk lamek.

⁹Seleg tegma welahebon arimanowen fano ane men pikir ane men tem toho uruk ane men turuk lit anggen fanowon yihik feruk lamuhup.

¹⁰Hiren hininggik fam tul puhubon ari fahet Ninikni Allahn fano pemisi ano siyag pemisi ano ulug wal haruk lamuhup.

¹¹Hik teg ambehen aben anggen fanowon yihik feruk eleg hag toho turuk halug onombolim la fug anggeyen fag turuk lamuhup.

¹²Iren hik tegma hirako turuk ane fahet aben hiyag isarukmu ori winon ininggali ha reg.

¹³Mun angge man angge hiraho lit weregma seleg ino ubam atuk halug ebenam aruhu. Ebenam aruhuwon ariyen obog toho mondabi seleg aruhu.

¹⁴Ari fahet hahareg lit werehon niren uruk laheyon tu, ”Nohoruk lahenon in aruhun! Wareg lahenon holuk aruhun halug Kristus umbagpag turukon ino hubam aruhu.”

¹⁵Henepeleg hinap hag toho welamuhup tohon hininggik fam turuk ane hinindimu fuki roho wenggel haruk lit onoluk inap hag toho welamuhup.

¹⁶Osit humon wambik warik ohoma tul peruk lahep ane tehep ha fug nowen ketiya eneg turuk lamuhup.

¹⁷Hinindi sohu roho welam fug anggeyen Ninikni Allahn telep peruk ane eneg yami ruruk lamuhup.

¹⁸Ik olokon narukmu hinindi hareyap tuhu rohon na fug angge wereg lit Allah hime fanowon nunubam amag ulug yami ruruk lamuhup.

¹⁹Allah hime fanowon hunubam weregma Ninikni Allah wel turuk asini men Mazmur men wene uruk sambil hinindimu henehiyeg toho yunggultuk lit henele ahil toho Allah wel turuk lamuhup.

²⁰Ninikni Allah fam sembahyang uruk lit Nonowe Yesus Kristus unuk uruk lit mun angge man angge og nisaruk lahen ulug Ninikni uruk lit likiya hupmu At wel turuk lamuhup.

²¹Kristus fam henekol toho wereg lit honori palimu weregma hininggareg apma roho welahe peruk lamuhup.

²²Hiyap ap oho lahebon hunubam tot imin: Nonowe apma welahep hag toho henehunsi enepma welamuhup.

²³Nonowe Kristus inowen wene holtuk inap fanowap eneptisiyon arimano ngi reg lit wereg hag toho ahunen te uhe ngi reg lit wereg. Kristus ino wene holtuk inap fahet ununggul weregma it At ebe hag toho wereg.

²⁴Wene holtuk inap arimano Kristus apma wereg hag toho mun ane man ane turuk lit uhe ahun apma welaruhu.

²⁵Ap hiyap oho lahebon hunubam tot imin: Kristus inowen wene onoluk inap indi enesug lit wereg hag toho hiren oho hunuhesi hinindi enesug lamuhup. Kristus indiyen wene onoluk inap Anden tohon amuhup ulug nuwabukag pibagma aben ware fibag.

²⁶Wene hiyag isaruk lit ik umag eneptisireg puhun eneptuk lit fanowap eneptisi.

²⁷Wene onoluk inap fano nalukema welamag ulug unduhuk feserisi. Sing angge unubam tag teg eleg angge enehap hilik teg eleg angge unubam siyahon eleg angge we puhun toho fano roho welamuhup perisi.

²⁸Ari hag toho ap inggarehen inggareg fahet indi haruk hag toho uhe oho indi haruk lamag. Uhe indi reg lit werehon ino inggareg fahet indi haruk lit wereg.

²⁹Ap inggareg fahet irim teg eleg angge ebe kul taruk lit hale fat taruk lit wereg. Kristus men wene onoluk inap men ari hag toho wereg.

³⁰At Kristus ebe weregma nit inggik uyug hag toho welahema nit kul neneptuk lit hal neneptuk lit wereg.

³¹Haharoho imbibahon aru hit honoluk, ”Ari fahet ap ikni isinga embeselug uhe men mangno roho welamuhup. Enebe piren angge famen ebe misig hag toho welamuhup,” ulug haharoho imbibag.

³²Map toho uruk lahiyon aru Kristus men wene onoluk inap men mangno roho werehon fahet uruk lahi.

³³Nori, hit hininggarehen hininggareg fahet hinindi haruk lahep hag toho hunuhesi oho hinindi roho welamuhup. Hit hiyaben oho henehunsi enele holtuk lamuhup. Hit obog toho welahebon hunubam ari uruk lahi.