Read Angguruk Yali EFESUS 6 Bible Online

EFESUS 6 - Angguruk Yali bible

EFESUS 6

¹Hit malik toron welahebon Ninikni Allah apma wereg lit hiniknisi men hinisingasi men enele holtuk lit tuk hag teg ane eneg turuk lamuhup.

²”Hiniknisi men hinisingasi men suwahal uk fug angge hinindi roho welamuhup,” ibag ane hahareg lit werehon aru mondabi palimu wereg. ”Hit kinangma amusun toho wereg lit yaman amuhup,” ulug Allahn sali palfahon komo eneptuk ane aru men mangno roho hahareg lit wereg.

⁴Hit iniknisi welahebonen hunumaliki inindi onolokap enebuk fug angge Ninikni Allahn perukon fam komo eneptuk lit fano ane milal eneptuk lamuhup.

⁵Hit enemingmingangge welahebon hiniknisi kinangmon henekol toho wereg lit Kristus ele holtuk lahep hag toho it enele holtuk lamuhup. Hinindi wirik toho wereg lit

⁶hiniknisi onolohotman fano pukag ulug eneg ler eneptuk lamuhup fug. Kristus amingminganggeyen enesukun fano roho turuk lit wenggel haruk hag toho hir oho hinindi fano roho Allahn peruk ane eneg turuk lamuhup.

⁷Ap iniyabuk wituk lahe fug, Ninikni Allah iyabuk wituk lahe peruk lit henehiyeg toho wituk lamuhup.

⁸Ap enemingmingangge hag toho werehon men enemu unduhukon menen fano ane turuk halug Ninikni Allahn onggo sebe roho og isahuwon fahet honoluk toho welamuhup.

⁹Hit iniknisiyen oho henemingmingangge unubam fano ane ambi roho turuk lit hunusul ulug henele unubam siyag toho uk fug. Iret hiret Hinikni poholma werehon inowen tu ikni tu amingmingangge ulug onorohole yami eneptuk eleg.

¹⁰Hinikni Allah ineyon ino palimu weregma hit apma welahebon oho hinine roho welamuhup.

¹¹Iblis inowen ele si ane uruk lit henele ying henebuhup tohon Allahn sehen hininggikmu embeserisiyon ino fam windat tahuben hinine roho seneg lamuhup.

¹²Nit seli roho wereg lit tog aptuk laheyon ari ap kinangmon men fug. Niren seli roho welaheyon aru re: Inine reg lit kinangma siyahap turukon men onolok werehon kinangma hik teg ambeg tuma wereg lit ap enele ying eneptukon men setan siyag angge pohol filen waharukon men seli roho welahe.

¹³Hunusul ulug tuhup sambil ino ap seliyonen hunusuk nowen hiren windat taruk angge Allahn sehen og hisarisiyon ino seneg lit hinine roho unduhuk lit mun angge man angge hunubam aruhuwon elehap turuk lamuhup.

¹⁴Henebe hik toho la fug angge unduhuk lit welamuhup. Tog abuk oho lit sing ahongge henelunggu ke pug turuk latikip hag toho tem toho uruk ane ari hiren henelunggu ke pug turuk lamuhup. Sing wan turuk latikip hag toho hinindi pikit wenggel haruk ane wan turuk lamuhup.

¹⁵Hunuyug hililip angge men habik men kilaplug tog fahet hulu-hala roho laruk latikip hag toho wene fanowon fam mangno atuk lahe ulug henesukun fano roho laruk lamuhup.

¹⁶Tog piyabangge lahaptuk latikip hag toho hiren Allah fam tem toho wenggel haruk lamuhup. Tog piyabangge ari weregma seliyonen tog indok ambulpul toho hunusuruk halug pi ruhu.

¹⁷Hununggul asum langguk taruk latikip hag toho Allahn fanowap heneptuk angge wan turuk lamuhup. Yaha olokon hubaleg latikip hag toho Allah hime fanowon hunubam weregma Allah wene senetuk lamuhup.

¹⁸Likiya hupmu Allah fam heng turuk lit Allah hime fanowon hunubam weregma hinindimu honoluk toho wereg lit hininggik kobog tubuk fug angge ap wene onoluk inap obog toho fahet sembahyang uruk lamuhup.

¹⁹An nele ine roho ukag ulug sok hut nabuhumu pikir ane uhukon Allahn hiyag nuruhu ulug Allahn undaman perisi ane nambong se roho wereg lit fag toho hiyag isaruk laruhuken hiren an nubahet sembahyang uruk lamuhup.

²⁰Wene fanowon fahet ninggik hele waroho penjara kilap naptusama nindi se roho wereg lit uk teg ane uruk laruhuken Allah fam heng turuk lamuhup.

²¹ An wereg lit turuk lahi ane hiren honoluk amuhuben nenere Tikhikus ninindi reg laheyon Ninikni Allah amingmingangge welahi ulug fano roho werehon ino hit henembeg waruhureg hiyag hisahu.

²²An welahi ane fahet ari roho wereg ulug hit fam hiyag hisaruk lit hinindi seyap henebuhuwen anden at henembeg monde fik waruhuk.

²³Ninikni Allah Nonowe Yesus Kristus menen Inindi henesug lit weregma tem toho peruk lamuhupmu Iren hit obog toho hinindi yuwahap heneptuk lamuhup.

²⁴Ap obog toho Nonowe Yesus Kristus inindi reg lit werehon arimano Aren oho mondabi indi enesug laruhu.