Read Angguruk Yali FILIPI 1 Bible Online

FILIPI 1 - Angguruk Yali bible

FILIPI 1

¹Nori, nit Paulus men Timotius men Yesus Kristus amingmingangge welaheyon itanowen suwesingga tu haharoho emberuk lahe. Hit Allah umalikisi obog toho Yesus Kristus apma welahebon o Filipiyon men hiniknisi fet henesuhon men let heneptukon men hunubahet suwesingga tu haharoho emberuk lahe.

²Ninikni Allah men Nonowe Yesus Kristus menen Inindi henesug lit hit hinindi yuwahap heneptuk lamuhup ulug sembahyang uruk lahe.

³Nundaman hit fahet wenggel haruk sambil Allah fam sembahyang uruk lit hit fahet oho Nikni uruk lahi.

⁴Nikni Allah fam sembahyang uruk lit likiya hupmu hit obog toho fahet nahiyeg toho welahi.

⁵Wene holtuk ane ket ak teberikip sambil inowen wene anden hiyag isarukmu let naptuk latikip hag toho ketiya oho let naptuk lahepma an nahiyeg toho wereg lit Allah fam Nikni uruk lahi.

⁶Hit wereg ambeg yabuk fanowon ak teberisiyon Allah inowen seneg lit weregman eneg Yesus Kristus waruhu sambil ino obog aruhu. Ari tem toho aruhu ulug noluk teg lahi.

⁷Hit obog toho an nindi anggen pulmu welahepma ihi ane ari eneg hit fahet wenggel ha reg lahi. Allahn indi nasug lit og nitisiyon ari hit men ambiyeg let toho seneg lahe. An ninggik hele waroho wereg lit wene fanowon fahet ili waruk lit nele ine roho hiyag isaruk lahimu hiren let naptuk lahep.

⁸Nonowe Yesus Kristus nit fahet indi nisaruk hag toho anden oho hit fahet nindi anggolo wenggel haruk lit henembeg wale peruk lahi. Anden tem toho ihi ane ari fahet Allah oluk teg.

⁹Mun ane man ane honoluk atuk lit hinindi anggar aruhumu ap hinindi enesug ane su amag ulug sembahyang Allah fam uruk lahi.

¹⁰Hinindi anggar aruhumu siyahon embeselug fanowon eneg tuk teg lamuhup. Ari turuk lamuhupmu Kristus waruhu sambil ino hit hinindimu siyahon eleg angge we fano roho welamuhup.

¹¹Ari turuk lit weregma Nonowe Yesus Kristus inowen anggen fanowon anggolo hit hunubam yihik feruk laruhumu anggen fanowon ari famen Allah wel turuk lit hi ruruk lamuhup.

¹²Nori, hit honoluk aruhuwen misig hiyag hisamin. Aben an nubam turusa ane ariyen wene fanowon su atisi.

¹³Wene su atisimu ap unggum kong turuk ibam werehon men ap winon obog toho arimano men an fahet Kristus amingmingangge wereg ulug ninggik hele wat naptusa ane ari onoluk atisi.

¹⁴Ninggik hele wat naptusa ane ariyen nonori wene onolukon anggolo arimano Nonowe Kristus fam inindi wenggel haruk lit inindi se atusa. Se atusama enekol eleg toho wene enele ine roho hiyag isaruk.

¹⁵Wene hiyag isaruk inap arimano ekeyen te enehummu het-pet toho wereg lit suwahal ul ulug wenggel haruk lit wene hiyag isaruk, ekeyen inindi fano wenggel haruk lit Kristus awene hiyag isaruk.

¹⁶Wene aru fahet anden ili waruk laruhuken ninggik hele waroho welahiyon ari it arimanowen onoluk teg lit Allah inindi reg lit Kristus awene hiyag isaruk.

¹⁷It winon arimanowen inindi piren teg lit mun angge man angge og nisawag ulug wene hiyag isaruk. An ninggik hele waroho wereg lit nindi mondabi siyag amag ulug iren ari turuk.

¹⁸It inindi piren toho wenggel haruk lit werehon oho misig toho wenggel haruk lit werehon oho ari imbisiyek. It arimanowen inindi ekeyon-ekeyon wenggel haruk lit Kristus awene hiyag isaruk angge famen wene su atukon ari fahet nahiyeg haruk lit welahi hag toho fobik oho nahiyeg toho welaruhuk.

¹⁹Siyag toho welahi angge famen hiren an fahet oho sembahyang uruk lahepma Yesus Kristus ahime fanowon inowen oho let naptukmu Allahn windat nabuhuwon ari an noluk.

²⁰Wene hiyag isil noruk lit ninggali eleg toho hiyag isaruk laruhuken Allahn let nabuhu ane fahet teko lahu ulug nindimu tem toho wenggel haruk lahi. Indam an nambong se roho Kristus wel tirikik hag toho ketiya aben nubam turuk ane ariyen Kristus unuk palimu aruhu peruk lahi. Nebe noluk welaruhuk halug oho war aruhuk halug oho At eneg palimu aruhu.

²¹An nebe fano wereg lit noluk welaruhuk halug Kristus apma welaruhuk, nebe war aruhuk halug oho mondabi fano welaruhuk ambeg hiyag nuruhu.

²²Kinangma tuma noluk welaruhuk halug anggen yihik feruk lit wereg laruhukon war aruhuk ane fahet oho noluk welaruhuk ane fahet oho nungge fahet fano pemin, an napeleg.

²³War aruhukteg Kristus min welaruhukon fahet nindi peruk lahi. Ari fano anggolo famen hit henesehet teg lahepma hit fahet kinangma tuma noluk welaruhuk. Fumag fil lahuk ano fumag fil lahuk ano nindi nonghong uruk.

²⁵Ari roho noluk welaruhukon fahet tem toho nindimu noluk toho welahi. Nindimu noluk toho welahiyon ariyen hit min mangno roho wereg lit let henebuhukmu hit obog toho Allah fam hinindi wenggel haruk lit henehiyeg anggolo roho welamuhup.

²⁶An hit henembeg waruhukmu an nubam turusa ane fahet hiren Yesus Kristus fam anggolo wel turuk lamuhup.

²⁷Ari regma Yesus Kristus awene fanowon ino hikit toho til noruk lamuhup. Henembeg waruhuk halug nilen kim hisahuk, waruhuk fug halug nisanggowen holeg laruhuk. Hinindi misig toho wereg lit wene fanowon fam hiren hinindi wenggel haruk lamuhuben hit henebe misig mangno roho wereg lit ari til noruk lamuhup.

²⁸Seliyon fahet henekol anggolo roho welamuhup fug. Henekol toho welamuhup fugmu it seliyonen te, ”Nit mondabi apma amuhuk, it palimu amuhup,” ulug onoluk aruhu. Allahn hinineyap heneptukmu palimu amuhup.

²⁹Hit fahet Allahn indi hisarisimu Yesus Kristus fam hinindimu wenggel haruk lit weregma hir oho At umalikisi aruma wereg ulug aben hunusuruk lamuhup.

³⁰Anggin ane anden waruk lahiyon ari hiren oho waruk lahep. Indam anggin ane warukmu niyaruk latikip angge ketiya hiren holtuk lahebon ari hiren oho senetuk lahep.