Read Angguruk Yali FILIPI 3 Bible Online

FILIPI 3 - Angguruk Yali bible

FILIPI 3

¹Nori, we Nonowe fam wenggel haruk lit henehiyeg toho welamuhup ulug we ita hiyag hisihi. Atam haharoho emberikikon ino fahet nin yoho eke embemin. Ambi ane eneg hahatuk lahi ulug nirim puk fug angge hinindi anggar amag ulug nin eke tu emberuk lahi.

²Olomene onolokon arimano fahet honoluk teg lit yet teg lamok. Un ane turuk lit si ane uruk inap enele holuk fug. Enembilahap paltuk lit ket-ker ane uruk inap onombolim la fug.

³Enembilahap paltuk ane alem fahet tot hiyag hisamin: Nit Allah hime fanowon nunubam weregma nit At ubam uruk ninap welaheyon arimano nenembilahap paleg ninap welahe. Nit iren hag toho wenggeltuk lahe fug. Nit nenehap selmon fahet wenggel ha fug angge Yesus Kristus Nonowe wereg ulug wel turuk lahe.

⁴An oho nahap selmon fahet wel ta reg lahi. Ap winonen enehap selmon fahet wenggel haruk halug anden oho ari roho wenggel hihi ha reg lahi.

⁵An indag napfag sambilen hup likinenam atfagma nambilahap pal napfag. Nikni numba Ibrani inap yuhon welatfagma Israel nahun wereg lit nunggul unuk Benyamin nahun welahi. Musa wene holtuk latikikon ununggul unuk Farisi inap men wereg lit fano peruk latikik.

⁶Yesus unuk uruk inap unusimin ulug likiya hupmu mug eneplug laruk latikik. Musa wene fano ulug holtuk lit Allah iline siyag ane tuk fug angge fano ane eneg turuk lahi peruk latikik.

⁷Ari turuk latikik nahun famen Kristus noluk atisimu fano peruk latikikon fahet siyag peruk lahi.

⁸Ihiyon ari eneg uruk lahi fug, mun ane man ane siyag peruk lahi. Yesus Kristus ino an Nowe wereg ulug noluk atisimu mun ane man ane siyag tehen At eneg fanowon wereg peruk lahi. Kristus ngi aruhukteg At men mangno roho welaruhuk ulug anden mun ane man ane turuk latikik ane ninggik kobog isarikikon filik turuk angge amben hag toho wereg peruk lahi.

⁹Musa wene fam haharoho imbibag ane hikit toho turuk latikik angge famen Allahn ili og nabuk fug teg ane turuk latikik. Kristus fam nindi wenggel haruk laruhukmu at indi fano wenggel haruk ulug Allahn ili og nabuhu. Allah fam indi wenggel haruk inap arimano Aren ili og eneptuk.

¹⁰Allahn Kristus olukap tibagma ine roho oluk werehon ino fahet nindi anggar amag peruk lahi. Kristus ubam alem angginon imbibahon ino hag toho an oho At men mangno roho weregma nubam turuk lamuhup. At ino ware fisibag hag toho an oho ambi roho nuwabuhup peruk lahi.

¹¹Ari roho wereg lit ap war atukon wereg ambehen an oho noluk aruhuk peruk lahi.

¹²Aren og nuruhuwon fahet mondabi ngi atikik peruk lahi fug. Yesus Kristus inowen an sen naptisimu Aren og nuruhuwon an seneruhukteg ngi aruhuk ulug til noruk lahi.

¹³Nori, an noluk atisimu mondabi senetikik peruk lahi fug. We misig eneg peruk lahiyon aru: Nambol fil werehon aru embeselug naluke fil werehon aru eneg ngi aruhuk ulug yami ruruk lahi.

¹⁴Ap sa tam atmisi ulug pupu angge laruk inaben peruk hag toho Allahn onggo fanowon og nuruhuwon fahet sat toho laruk lahi. Allahn An men mondabi onoluk welamuhup ulug wol neneptisimu an oho Yesus Kristus fam nindi wenggel haruk lahi.

¹⁵Nori, hit hinindi fano roho welahebon arimanowen ihi ane aru hag toho peruk lamuhup. Hiren alem eke hag eke hag hunundaman peruk lahep ane ari Allahn hinindi anggarap henebuhu.

¹⁶Allahn nit og nisarisiyon ari likiya hupmu sat toho senetuk lamuhuk.

¹⁷Nori, hir oho an welahi hag toho welamuhup. Anden turuk lahi hag toho ap winonen turukmu yer isahupteg hiren oho ari roho turuk lamuhup.

¹⁸Indam angge nele irikikteg warikikteg ketiya oho uba yatuk lit hiyag hisaruk lahi. Ap anggolo arimano ininggareg ininggik fam turuk ane ariyen Yesus e fam telfahon ino men hili roho wereg.

¹⁹Ininggarehen siyag ane tul perukon fahet eneg inindi pulmu werehen it arimano mondabi siyag amuhup. Ininggali hawon famen enewelwel tubat taruk lit kinangmon fahet eneg inindi wenggel haruk.

²⁰Nit ninibam yug toho welamuhuk ambeg poholma wereg. Nonowe Yesus Kristus ino poholman fobik fanowap nenebik oho wambik waruhu ulug nangno ruruk lahe.

²¹Nit nenebe siyahon war amuhukon aruma An ninggareg fanowon hag toho welamag ulug Aren ninap nenebuhu. At inggik ineyon inowen mun ane man ane tuk hag teg lit obog toho inggarehen seneg laruhu.