Read Angguruk Yali 1 TESALONIKA 2 Bible Online

1 TESALONIKA 2 - Angguruk Yali bible

1 TESALONIKA 2

¹Nori, nit hit sehelimu waharukukteg saplangge hiyag hisarukuk fug peruk lahe ane ari hit honoluk.

²Nit o Filipiyen hit henembeg wam fugmu nininggaliyap neneptuk lit nunusuruk latusa ane hit honoluk. Nunusuruk latusa angge famen Allahn let neneptukmu nenembong se roho wereg lit sat toho hit henembeg Allah wene fanowon hiyag hisa waharukuk.

³Niren komo heneptukuk ane ari hinindi nonghong atuk ane fahet hiyag hisaruk latukuk fug. Ninindimu siyahon hiraho lit nenele si ane hiyag hisa waharukuk fug.

⁴Allahn wene iren fano hiyag isa reg perisireg wene fanowon ino nit nunubam emberisi. Nit nunubam emberisimu uruk laheyon ari aben fano pukag ulug uruk lahe fug, Allahn fano pukag ulug hiyag isaruk lahe. Allah inggarehen eneg nit ninindi wal nisaruk.

⁵Henenggengge og nisawag ulug ninindimu hirako wenggel ha fug angge wereg lit nenele ilaheg toho uruk lit hunuwali senetukuk fug. Ari fahet hit honoluk tegma Allah oho oluk teg lit wereg.

⁶Ap kinangmon hit men ap winon menen nit wel nenebukag perukuk fug. Kristusen mon neneptisi ulug wel nenebukag pila angge famen wel neneptuk ane yami rurukuk fug.

⁷Hit sehelimu nunubabut fano roho wereg lit malik toron isingan walinggoho foroho hag toho fet henesug latukuk.

⁸Fet henesug lit hit fahet ninindi anggolo henesug lit wene eneg hiyag husul fug perukukteg hit fahet ninindi roho wereg lit nininggareg nenebe oho og hisarukuk.

⁹Nori, niren asengseng haruk lit sat toho turuk latukukon hit honoluk. Hit henesuburu eneg naruk lamuhuk fug ulug niren likiya hupmu nininggareg nininggik fam oho turuk lit Allah wene oho hiyag hisaruk latukuk.

¹⁰Hit Kristus fam wenggel haruk hinap henesehelimu wereg lit siyag ane tuk fug angge fano roho pikir ane eneg turuk latukuk. Ari roho welatukuk ane hit honoluk tegma Allah oho oluk teg lit wereg.

¹¹Malik toron ikniyen komo ruruk hag toho niren hit misig-misig wal taneg komo heneptuk lit hinindi wirikap heneptukuk ane hit honoluk.

¹²Allahn An wereg ambeg fanoma welamuhup ulug wol heneptisiyon inowen perukon hikit toho hit fano welamuhup ulug nenele ine roho komo heneptuk latukuk.

¹³Niren Allah wene hiyag hisarukukon holtikipteg ap kinangmon enewene hiyag nisaruk eleg, Allah wene hiyag nisaruk perikip. Hiren perikibon ari fano, ap kinangmon enewene hiyag hisarukuk fug, Allah wene tik-tem toho hiyag hisarukuk. Allah wene fanowon inowen hit hinindi selehap tirisimu likiya hupmu hit fahet Allah fam sembahyang uruk lit wel turuk lahe.

¹⁴Nori, Yesus Kristus fam wenggel haruk inap Allah umalikisi o Yudea werehon arimano hit men ambi roho welahep. Yahudi inaben it unubam siyag ane turusa hag toho hir oho hinibam misihonen hunubam siyag ane turusa.

¹⁵It Yahudi inaben Nonowe Yesus men atam wene hiyag isaruk latfag inap nabi men pinggi unusibareg ketiya nit nunusul ulug mug neneplug laruk. Ari turuk lit Allahn fano peruk ane hikit toho tuk fug angge ap obog toho fahet seliyon eneg peruk.

¹⁶Allah unuk enepeleg inap fanowap eneptuk awene hiyag usul ulug turuk lahe angge famen Yahudi inaben hiren wene hiyag isalihip fug ulug ke paltuk. Ari turuk lit siyag ane palu ril laharukmu anggolo atuken Allah olok peruk aneyen mondabi hondo eneptisi.

¹⁷Nori, nit hit hunumbahalug waharukukteg ninil famen hit yet hisa fug teg lit welahe angge famen ninindi famen nenebe misig mangno roho welahe. Hit henembeg wala ulug wenggel haruk lit tik-tem toho hit pen hisa wamul ulug turuk latukuk.

¹⁸Nit hit henembeg wamul peruk lit an Paulus pirenam hinahanam watmin perikik angge famen Iblisen ke paltisimu wam fug teg latukuk.

¹⁹Nori, hit fahet nenehiyeg toho wereg lit Ninikni Allahn fanowap nenebuhu peruk lahe. Nonowe Yesus Kristus waruhu sambil ino nit neneliliyangge hit eneg welahep.

²⁰Hit fahet eneg nenehiyeg toho wereg lit tem toho palimu welamuhuk peruk lahe.