Read Angguruk Yali 1 TESALONIKA 3 Bible Online

1 TESALONIKA 3 - Angguruk Yali bible

1 TESALONIKA 3

¹Hit welahep ane fahet tot holtukuk fureg ninindi welam fug ane neneptuken wenggel harukukteg an o Atena namu wereg lit

²nenere Timotius enembeg lamihin ulug monde fik waharikik. At ino Allah let turuk lit nit men Kristus awene fanowon hiyag isaruk lahe. Alem siyahon hunubam atisimu hinindi elek-felek hisa nowen hit hinindi wirikap eneptuk lit Yesus fam wenggel haruk lamuhup ulug komo henebuhuwen Timotius monde fik waharikik. Alem siyahon nunubam atukon ari Allahn tam perisi ane roho nunubam atukon hit honoluk.

⁴Nit hit henembeg waharukukteg ambiyeg wereg lit alem siyahon nunubam aruhu ulug niren tam hiyag hisarukuk. Tam hiyag hisarukuk ane ino ketiya teko laruk ulug honoluk atuk.

⁵Hit Kristus fam nangginoho wenggel haruk ulug nindi welam fug ane naptuken Timotius ino monde fik waharikik. Siyahon wal nisaruk ahun inowen hinindi nin heneptukmu saplangge wene asengseng toho hiyag hisarukuk ano ulug nindi su atisi.

⁶Nindi su atisi angge famen ketiya Timotius nit nenembeg waharisireg Kristus fam hinindi wenggel haruk ane men ap hinindi enesug lahep ane men fahet hiyag nisarisi. Nit fahet likiya hupmu fano peruk lit wenggel haruk lahepma niren hit henembeg lilareg welala peruk lahe hag toho hiren oho nenembeg walepma ambiyeg welala peruk lahep.

⁷Nori, nit alem angginon siyahon nunubam atisimu weregman Timotius inowen it Kristus fam fano wenggel haruk ulug hiyag nisarisimu ninindi yuwag atisi.

⁸Hit Nonowe alukema hinine roho unduhuk lahepma ketiya nir oho fano welahe.

⁹Hit fahet Allah alukema nit nenehiyeg anggolo wereg lit hit fahet it fano wereg ulug Allah fam Ninikni ul peruk ane nungge ehe ha reg?

¹⁰Allah fam likiya hupmu sembahyang uruk lit hit henembeg wamuhukteg Allah fam wenggel haruk ane seleg teg elehon selehap tuhuken nenele ine roho Allah fam heng turuk lahe.

¹¹Ninikni Allah men Nonowe Yesus menen hit henembeg wamuhukon fahet hiyag nisahupmu henembeg wamuhuk.

¹²Nonowe Yesus inowen hit-hit hinindi roho welahep ane anggolowap turuk laruhu. Niren hit fahet ninindi henesug lahe hag toho hiren oho ap obog toho hinindi anggolo isaruk lamuhup.

¹³Allahn hinindi wirikap heneptukmu Nonowe Yesus At umalikisi ngi roho werehon obog toho men wamuhup sambil hit Ninikni Allah alukema siyag ane tuk fug angge fano roho welamuhup.