Read Angguruk Yali YOSUA 1 Bible Online

YOSUA 1 - Angguruk Yali bible

YOSUA 1

¹Allah amingmingangge Musa ino war atfagma NINIKNI Allahn Musa let turuk latfahon hun Nun amloho Yosua fam hiyag utuk lit,

²”An namingmingangge Musa ino war atisimu Israel inap obog toho kinang Anden hiyag isahukon ino fam kuhuben ketiya wilip atmihinteg haren ik Yordan paloho hondog eneplug lamihin.

³Anden Musa hiyag itikik ane hikit toho kinang hit hunuyuhen sobuhup ambeg arimano Anden hit og hisahuk.

⁴Og hisahukmu lekma ik ambut filen tulug lahareg tom Libanon ik eleruk fil, ik suwon Efrat mo lahik waharuk filen o Het inap enengginang keyen tulug ik saho ahik suwon mo ubuk uruk fil ari obog toho hiren tohon aruhu.

⁵Hat holuk weregma ap misihen oho hat apmayap habuhu fug. Anden Musa let turuk latikik hag toho har oho let haptuk laruhuk. Anden hat humbahuk fug angge hiraham eneg welaruhuk.

⁶Hat hindi wirik toho wereg lit kinang Israel inap unumbasi we tik-tem toho og hisahuk ulug hiyag isiyahon ino haren it ngi amuhuben hiyag isahun.

⁷Ari fahet we tem toho hat hindi wirik toho wereg lit An namingmingangge Musan wene hiyag hitisiyon obog toho hine roho seneg lit ke hareyon la fug angge we ke pikiron eneg laruk laruhun. Laruk laruhun ambeg arimanowen turuk laruhun ane fano teko laruk laruhu.

⁸Musan suwesingga fam haharoho emberisiyon ino hapeleg am fug angge Israel inap unubam hiyag isaruk laruhun. Suwesingga ino fam hahareg ane hat hinggarehen likiya hupmu wenggel halug obog toho hine roho seneg lit o kema-kema laruk lit turuk laruhun ane fano teko lahu.

⁹Hat hindi wirik toho welaruhun ulug Anden hiyag hutuk lahiyon aru holuk toho welamin. O kema-kema larukmu alem mun angge man angge inam aruhuwon fahet hakolen yuk lahun fug! An HIKNI Allahn let haptuk laruhuk,” ulug hiyag itfag.

¹⁰Hiyag itfagma Yosua inowen Israel inap onowesi unubam hiyag isaruk lit,

¹¹”O sabo Israel ninaben wirig laheyon aru walinggoho lalihipteg hiyag isaruk lit: Hup pirenam welamuhukteg ik Yordan paloho kinang Allah NINIKNI inowen hiyag nisahuwon ino fam kuhuken suburu kema laruk lit narukon tug tulusan hiyag isa lalihip,” ulug hiyag isibag.

¹²Hiyag isibareg ap ununggul unuk Ruben inap men Gad inap men Manasye inap minggiroho winon unubam Yosuan hiyag isaruk lit,

¹³”Allah amingmingangge Musa inowen hunubam ele uruk lit, ’Allah NINIKNI inowen kinang ik Yordan mo lahik waharuk fil tuma yug toho welamuhup ulug og hisahu,’ ulug hiyag hisarisi ane fahet honoluk toho welamek.

¹⁴Ari fahet hiyap malik wam hiren tohon ik Yordan paluk fug angge Musan hit hiyag hisarisi ambeg tu welamuhupmu hit henehako roho turuk hinap sehen seneko tam amuhupmu honori men ik Yordan fimag fil nindig amuhupteg it men let toho tog aptuk lamuhup.

¹⁵Let eneptukmen eneg honori oho ik Yordan paloho le fikit Allah NINIKNI inowen hiyag isahu ambeg arimano yuwag toho welamuhup halug eneg hit Musan hiyag hisarisi ambeg tuma suhuloho wamuhupteg yug toho welamuhup,” ulug hiyag isibag.

¹⁶Hiyag isibagma it arimanowen Yosua hiyag utuk lit, ”Haren hiyag nesehenon hikit toho niren turuk lit mon neneptuk laruhun ambeg oho laruk lamuhuk.

¹⁷Musan hiyag nisarukmu holtuk latukuk hag toho haren hele hiyag nisaruk laruhunon oho holtuk lamuhuk. Allah NINIKNI Musa iraham welatisi hag toho hat hiraham oho welaruhu.

¹⁸Mun ane man ane tilihip ulug haren nit hiyag nisarukmu ap san holuhu fug halug at ino war aruhu. Ari fahet hat hindi wirik toho welaruhun!” ulug hiyag itfag.