Read Angguruk Yali YOSUA 10 Bible Online

YOSUA 10 - Angguruk Yali bible

YOSUA 10

¹Yosua inowen Yerikho inap onowe men unusibag hag toho o pumbuk Ai kibareg Ai inap onowe men pin unusibareg wereg lit o Gibeon inap Yosua ambeg libahon unubam hit men nit men mangno roho welamuhuk ulug sali imbibagma Gibeon inap arimano Israel inap enesehelimu welatfag. Sebe roho wereg urukmu Yerusalem[5] inap onowe suwon raja Adoni-Zedek umalikisi menen holfareg inindimuwen peruk lit,

²”O Ai pumbuk tot tegma o Gibeon pumbuk humon ap suwon raja wereg ambeg hag toho wereg lit ap obog toho enehako roho turuk angge famen Israel inap inibil atusa,” ulug enekol anggolo haruk latfag.

³Enekol anggolo hibareg Adoni-Zedek inowen o Hebron inap onowe raja Hoham, o Yarmut inap onowe Piream, o Lakhis inap onowe Yafia, o Eglon inap onowe Debir enembeg lalihip ulug ap mon enepfagma libareg ap suwon arimano unubam hiyag isaruk lit,

⁴”Gibeon inaben Yosua umalikisi Israel inap men mangno roho welamuhuk ulug sali emberuson fahet Gibeon inap unusuhuken nambeg wamuhupmu an men ambiyeg tog abik lahuk,” ulug hiyag isibag.

⁵Ari ulug hiyag isibagma Yerusalem inap, Hebron inap, Yarmut inap, Lakhis inap, Eglon inap onowesi, it ap suwon fuwaben itano unumalikisi Amori inap sehen senehon men palu arik watfareg Gibeon inap unusuhuk ulug o Gibeon libareg waling enesug lit tog aptuk latfag.

⁶Tog aptukmu Gibeon inaben Yosua o Gilgal weregma lalihip ulug ap mon enepfagma libareg Yosua fam hiyag utuk lit, ”Amori inap onowesi tom fene werehon obog toho mangno urusareg nit nunusul ulug ninibam kik waharusama nit hat hamingmingangge hinggik kobog nunubahamihin fug! Nit nenembeg folo-folo waruhunteg windat nenebuhun,” ulug hiyag itfag.

⁷Hiyag itfagma Yosua umalikisi enembong se roho tog elma larukon arimano men sehen senehon winon obog tohowen o Gilgalen wilip atug libag.

⁸Wilip atug larukmen NINIKNI Allahn Yosua fam ele uruk lit, ”Anden Amori inap hinggikmu embeminen it fahet hakol eleg toho lamihin. It arimano ap misihen oho hat apmayap habuhu fug,” ulug hiyag itfag.

⁹Hiyag itfagma o Gilgalen wilip atug hubanggo eneg o Gibeon libareg Amori inap enepeleg toho weregman unubam tog kilabik libag.

¹⁰Tog kilabik waharukmu Amori inap arimanowen yet isibagma NINIKNI Allahn enekolap eneptukmu inindi sohu rehen la-wam turuk lit weregma Yosua umalikisi menen Amori inap anggolo roho o Gibeonen unusurukmu nin wilip atug libahon arimano mug eneplug o Bet-Horon horogma kenken keyen wamburuk lit o Azeko men Makeda men imbisik libag.

¹¹Israel inap onolohotman wilip atfareg linggik-longgo ibahon arimano o Bet-Horon punumuwen altukmu wamburukmen NINIKNI Allahn osit humon helep hahon poholman pilabik watfareg unusil o Azeka imbisik libagma war atfag. Osit helep hahon inowen unusibahon arimano anggolo regma Israel inaben sehen fam unusibahon we tor angge unusibag.

¹²NINIKNI Allahn Amori inap arimano Israel inap ininggikmu og isibag sambil ino Yosua inowen NIKNI Allah fam heng timin ulug Israel inap iniline ele uruk lit, ”Mo, o Gibeon unggulmu la fug angge welamin! Pikalem, o Ayalon tonggo emberimu unduhuk lit yatuk lamin!” ulug sembahyang ibag.

¹³Ibagma mo oho pikalem oho la fug angge we nikema unduhuk lit weregman eneg Israel inaben ap seliyon obog toho unusibag. Mo pohol pulmu weregman eneg misihim hunduko welatfareg mo ino ubuk ibag ane ari fahet suwesingga winon fam oho hahareg lit wereg.[6]

¹⁴Yosuan heng tibag ane NINIKNI Allahn hol hibag hag toho indam oho teko libag fuhon fobik oho teko lahu fug. NINIKNI Allahn Israel inap inibil atmin pibag sambil ari eneg Yosua ap kinangmon inowen heng ibag ane hikit toho turuk latfag.

¹⁵Ari tibagma Yosua otsi men o Gilgal o sabo wirig latfag ambeg suhuloho watfag.

¹⁶Watfagma ap suwon fuwaben itano enekolen linggik-longgo uruk lit o Makeda horogma owikmu hirag arik libag.

¹⁷Hirag arik libagma aben Yosua fam enele uruk lit, ”Ap suwon fuwaben itano o Makeda horogma owikmu hirako weregma yet isarukuk,” ulug hiyag itfag.

¹⁸Hiyag itfagma Yosua inowen hiyag isaruk lit, ”Helep humon imbiloho owik elma lare fisik lalihipteg ap suwon itano wilip amuhup tohon ulug kahal enesug lamusan ap winon eke hiyag isalihip.

¹⁹Hiyag isalihipteg HINIKNI Allahn ap seliyon linggik-longgo eheson arimano hininggikmu embehek angge re hiren kel ta fug angge it mug eneplug laruk lit fobik ahason unusik lalihip. Unusuruk lit it inibam pumbuk kuhup tohon ulug kahal enesug lamok,” ulug hiyag isibag.

²⁰Hiyag isibareg Yosua men otsi Israel inap menen ap seliyon anggolo unusibagma we tor angge eneg wilip atfareg inibam pumbuk walinggoho elehet oko kilabegma kibag.

²¹Kibagma it seliyon arimano mulangge unusibareg Israel inap obog toho enebe fano roho Yosua o Makeda horogma o sabo witfag ambeg weregma watfag. Ari tibagma ap misihen oho enekolen Israel inap enebug uruk latfag fug.

²²Yosua otsi suhuloho watfagma Yosua inowen hiyag isaruk lit, ”Owik elma husoho ap suwon fuwaben itano wilip enebik lalihipteg an nambeg hondog eneplug watihip,” ulug hiyag isibag.

²³Hiyag isibag ane ari hikit toho libareg ap suwon fuwaben itano owik elman wiliboho Yosua ambeg hondog eneplug watfag. Ap suwon hondog eneplug watfahon itano o Yerusalem inap onowe, Hebron inap onowe, Yarmut inap onowe, Lakhis inap onowe, Eglon inap onowe men watfag.

²⁴Watfagma Yosua inowen Israel inap obog toho palu arik maniyek ulug wol enepfareg ap sehen senehon onowesi at men ambiyeg tog abik libahon unubam ele uruk lit, ”Nori, hunuyuhen ap suwon aruma enenduhunmu sobir isalihiben maniyek!” ulug hiyag isibagma watfareg ap suwon enenduhunmu unuyuhen sobir isaruk latfag.

²⁵Sobir isarukmu Yosua inowen otsi unubam ele uruk lit, ”Hiren turuk lahebon hag toho NINIKNI Allahn ap seliyon hit men tog aptuk lamuhup inap obog toho unubam turuk laruhu angge re henekolen yuk la fug angge hinindi wirik toho welamuhup,” ulug hiyag isibag.

²⁶Hiyag isibareg Yosua inowen ap suwon fuwaben itano pinggi unusibareg e fuwaben fam song toho lahabe fisik libagma weregman o hup atfag.

²⁷Mo ubuk ik ohoma Yosua inowen otsi hiyag isibag ane hikit toho ap suwon wareg angge itano e famen pilabe fisik wambik watfareg owik it tam hirag arik libag ambeg ino hik isibag. Hik isibareg helep humon imbiloho owik elma lare fisibahon ketiya oho wereg.

²⁸O ino sambil Yosua ino o Makeda ilmig toho kuruk lit ap suwon otsi obog toho men unusurukmu ap misig oho wilip atfag fug. Wilip am fug angge weregma it obog toho abet hiyabet maliket unusuruk lit Yosua inowen tam o Yerikho inap onowe fam tibag hag toho o Makeda inap onowe fam oho tibag.

²⁹Ari tibareg Yosua otsi Israel inap obog toho men Makeda embeselug o Libna ilmig toho kul ulug libag.

³⁰Larukmu NINIKNI Allahn o Libna inap onowe suwon men oho Israel inap ininggikmu imbibagma Yosua inowen ap obog toho unusurukmu ap misig oho wilip atfag fug. It obog toho unusuruk lit Yosua inowen tam o Yerikho inap onowe fam tibag hag toho o Libna inap onowe fam oho tibag.

³¹Ari tibareg Yosua otsi Israel inap obog toho men Libna embeselug o Lakhis libareg o ino ilmig toho kul ulug o sabo wiroho waling enesug latfag.

³²Waling enesugmu NINIKNI Allahn o Lakhis ino Israel inap ininggikmu imbibagma Israel inaben tog aptukmen eneg o hup misig atfagma o ino ilmig toho kuruk lit Libna inap obog toho unusibag hag toho Lakhis inap arimano oho obog toho unusibag.

³³Lakhis inap unusurukmu o Gezer inap onowe suwon Horam inowen it inibil atmin ulug watfagma Yosua inowen at otsi obog toho men pinggi unusurukmu ap misig oho wilip atfag fug.

³⁴It obog toho unusibareg Yosua otsi Israel inap obog toho men Lakhis embeselug o Eglon libareg o sabo wiroho waling enesug lit o ino ilmig tul ulug tog aptuk latfag.

³⁵Tog aptuk lit we ino sambil o ino ilmig toho kuruk lit Lakhis inap obog toho unusibag hag toho o Eglon inap arimano abet hiyabet maliket obog toho pinggi unusibag.

³⁶Unusibareg Yosua otsi Israel inap arimano men Eglon embeselug o Hebron ilmig toho kul ulug libag.

³⁷Libareg o ino ilmig toho kuruk lit Eglon inap obog toho pinggi unusibag hag toho o Hebron inap men onowe suwon men oho unusurukmu ap misig oho wilip atfag fug. Wilip am fug angge weregma it obog toho abet hiyabet maliket pinggi unusibag.

³⁸Unusibareg Yosua otsi Israel inap obog toho men o Debir ilmig toho kul ulug libag.

³⁹Libareg o Hebron inap men Libna inap men onowesi inim unusibag hag toho o Debir inap onowe suwon men unusurukmu ap misig oho wilip atfag fug. Wilip am fug angge weregma it obog toho abet hiyabet maliket pinggi unusibag.

⁴⁰Ari roho Yosua ino kinang ino atogman atogma tog abil laruk lit tom pulmu werehon men punu alo hubula fil werehon men tom alem ke yali fil werehon men anggen ke ik ambut fil werehon men ilmig taruk lit Israel inap INIKNI Allahn hiyag isibag ane hikit toho ap obog toho onowesi men unusurukmu ap misig oho wilip atfag fug.

⁴¹Ari roho turuk lit Yosua inowen o Kades-Barnea famen tulug o Gaza men Gosyen kinang keyen o pumbuk Gibeon fam ap obog toho apmayap enepfag.

⁴²Israel inap INIKNI Allah inggarehen Israel inap unubahet tog aptuk latfag ane ariyen Yosua ino we misihim eneg tog abil laruk lit ap kinang ino fam welatfahon men onowesi suwon men obog toho apmayap enepfag.

⁴³Apmayap enepfareg Yosua otsi Israel inap obog toho men o Gilgal o sabo witfag ambeg suhuloho watfag.