Read Angguruk Yali YOSUA 11 Bible Online

YOSUA 11 - Angguruk Yali bible

YOSUA 11

¹Israel inaben ap arimano obog toho apmayap eneptusa urukmu hol hibareg o Hazor inap onowe suwon Yabin inowen Israel inap men ambiyeg tog abuhuken ap suwon-suwon wol enepmin ulug otsi mon enepfagma o Madon inap onowe suwon Yobab men Simron inap onowe suwon men Akhsaf inap onowe suwon men

²ap suwon winon inibam ik eleruk fil tom fam welatfahon men Ik Sene Galilea ik ambut fil Yordan tonggoma welatfahon men hubula fil punu alo ke welatfahon men ik saho ahik ayegma o Dor kinang fam welatfahon men wol enebik libag.

³Nin Kanaan inap yali fil hubula fil welatfahon men Amori inap men Het inap men Feris inap men Yebus inap punumu welatfahon men Hewi inap tom Hermon alma o Mizpa kinang fam welatfahon men oho wol enebik libag.

⁴Wol enebik libagma ap suwon arimano onotsi sehen senehon obog toho men enebe ik yinggi saho ahik ayegma werehon mondeg hag toho winag isa fug toho enembohom kuda men kereta wam kudan lisoho walug laruk angge men walug Yabin ambeg watfag.

⁵Watfareg ap suwon arimano mangno atuk lit Israel inap men tog abuhuk ulug onotsi men ik Merom elerukmu o misigmu o sabo wiroho welatfag.

⁶Weregma NINIKNI Allahn Yosua fam ele uruk lit, ”Ap arima unubahet hakol ha fug! Sono mo tiya hagma Anden it obog toho unusuhukteg wareg angge Israel hinap hininggikmu umbuhuk. Umbuhukmu hiren enembohom kuda lahup fug ulug enendeng paltuk lit kereta iren tohon indokma yale fusuhup,” ulug hiyag itfag.

⁷Hiyag itfagma ap seliyon arimano ik Merom elerukmu o sabo witfag ambeg enepeleg toho weregman Yosua otsi sehen senehon obog toho men watfareg unusul ulug enembeg kibag.

⁸Kurukmu NINIKNI Allahn ap seliyon arimano Israel inap ininggikmu imbibagma apmayap enepfareg wilip atfahon arimano mug eneplug laruk lit ik eleruk fil o pumbuk suwon Sidon men o Misrefot-Maim men yali fil o Mizpa tonggoma libag. Ari roho turuk lit ap arimano mulangge unusurukmu misig oho wilip atfag fug.

⁹Wilip atfag fugmu Yosua inowen NINIKNI Allahn hiyag itfag ane hikit toho enembohom kuda enendeng paltuk lit kereta iren tohon indokma yale fisibag.

¹⁰Ari tibareg Yosua ino suhuloho watfareg o Hazor ilmig toho kibag. Indam o pumbuk winon o Hazor walinggoho welatfahon obog toho tot tegma we Hazor eneg su reg latfahon fam pin halog toho kuruk lit ap obog toho abet hiyabet maliket onowe suwon men unusibareg o pumbuk ino harep pisatfagma ap misig oho oluk welatfag fug.

¹²Onoluk welatfag fugmu o pumbuk walinggoho welatfahon arimano obog toho Yosua ino ilmig toho kuruk lit NINIKNI Allah amingmingangge Musa inowen hiyag itfag ane hikit toho it onowesi suwon obog toho unusibag.

¹³Unusibareg Yosua inowen o Hazor harep pisatfag hag toho o pumbuk ilmig toho kibahon winon punu alo ke witfahon arimano harep pisatfag fug.

¹⁴Pisabuk fug angge abet hiyabet maliket obog toho unusibagma ap misig oho oluk welatfag fugmu Israel inaben it enenggengge men enembohom men obog toho huhulangge hilibag.

¹⁵NINIKNI Allahn atam amingmingangge Musa fam ele ibag ane ino nin Musan Yosua fam hiyag itfagma Yosua inowen il misig oho umbusuk fug angge NINIKNI Allahn ibag ane hikit toho turuk latfag.

¹⁶Ari roho turuk lit Yosua ino kinang ino atogman atogma tog abil laruk lit tom pulmu werehon men anggen ke ik ambut fil werehon men o Gosyen kinang obog toho men punu alo ke hubula fil werehon men ik Yordan tonggo men ilmig til libag.

¹⁷Kinang arimano obog toho Tom Leimu famen tulug o pumbuk Baal-Gad tom Libanon men tom Hermon men honggolegma tonggo ino fam ilmig tahuk ulug Yosua inowen amusun toho tog aptukmen eneg ap suwon kinang seneg latfahon arimano sen enepfareg obog toho unusibag.

¹⁹Tog abil laruk lit it inibam pumbuk obog toho ilmig toho kibagma we Hewi inap o Gibeon welatfahon arimanowen eneg tog abuk fug angge Israel inap men mangno roho welamuhuk ulug sali imbibag.

²⁰NINIKNI Allahn ap o pumbuk winon arimano inindi arikap tibisibagma Israel inap men tog abil larukmen eneg Israel inaben inindi enesug lam fug angge abet hiyabet maliket obog toho unusibag. Unusibag ane ari NINIKNI Allahn Musa hiyag itfag ane hikit toho tibag.

²¹Ari tibag li Yosua inowen Enak inap unuwag yaron inibam o Yehuda kinangma men o Israel kinangma men tom fam o Hebron men Debir men Anab men o pumbuk winama oho welatfahon arimano fobik oho welamuhup fug ulug obog toho unusuruk lit inibam oho halog tibisibag.

²²Enak inap arimano Israel kinang famen mondabi elehap tebeseruk lit we Enak inap o Gaza men Gat men Asdod men welatfahon arimano eneg unusibag fug.

²³Ari roho turuk lit Yosua inowen NINIKNI Allahn hun Musa hiyag itfag ane hikit toho kinang arimano obog toho ilmig tibareg Israel inap ununggul unuk wal taneg ngi amuhup ulug og isibag. Og isibagma kinang ino fam tog aptuk ane eleg atuk lit ap inindi yuwag toho wereg latfag.